၂၈။ပစ္စည်းဥစ္စာကြွယ်ဝသောအရာရှိငယ်တစ်ဦး

တစ်နေ့သောအခါတွင် ငယ်ရွယ်၍ချမ်းသာသော အရာရှိငယ်တစ်ဦးသည် ကိုယ်တော်ယေရှုထံသို့ လာ၍ “ကောင်းမြတ်တော်မူသောဆရာ၊ ကျွန်ုပ်သည် နိစ္စထာဝရအသက်ကိုရရှိရန် မည်ကဲ့သို့လုပ်ဆောင်ရမည် နည်း”ဟု မေးမြန်းခဲ့ပါသည်။ကိုယ်တော်ယေရှုက ထိုသူအား “သင်ငါ့အားအဘယ်ကြောင့် ကောင်းမြတ်သည်ဟုဆိုရသနည်း။ လောကတွင်ကောင်းမြတ်သူတစ်ဦးသာရှိ၍ ထိုသူမှာ ထာဝရဘုရားရှင်ပင်ဖြစ်သည်။ သို့သော်သင်သည် နိစ္စထာဝရအသက်ကိုရလိုပါက ဘုရားရှင်၏ပညတ် တော်များကို စောင့်ထိန်းလိုက်နာရမည်”ဟု ပြန်လည်မိန့်တော်မူလိုက်လေသည်။

“မည်သည့်ပညတ်တော်များကို ကျွန်ုပ်လိုက်နာရမည်နည်း”ဟု ထိုသူကပြန်လည်မေးလျှောက်လိုက် လေသည်။ ထိုအခါတွင် ကိုယ်တော်ယေရှုက “လူ့အသက်ကိုမသတ်ရ၊သူ့အိမ်ရာကိုမပြစ်မှားရ၊ သူ့ဥစ္စာကိုမခိုးရ၊ မုသားမပြောရ၊ မိဘနှစ်ပါးအား ရိုသေမြတ်နိုးရမည်၊သင်၏အိမ်နီးချင်းအား မိမိကိုယ်ကိုချစ်ခင်သကဲ့သို့ ချစ်ခင်ရမည်”ဟု ပြန်လည်မိန့်တော်မူလိုက်ပါသည်။

သို့သော်ထိုလူငယ်မှာ “ကျွန်ုပ်သည်ထိုပညတ်တော်များအား ငယ်စဉ်ဘဝကပင်စောင့်ထိန်း လိုက်နာခဲ့ပါသည်။ ကျွန်ုပ်သည် နိစ္စထာဝရအသက်ကိုရယူရန် မည်သည့်အရာများကို ထပ်မံပြုလုပ်ရပါမည်နည်း”ဟု ပြန်လည်လျှောက်တင်လေသည်။ ထိုအခါတွင်ကိုယ်တော်ယေရှုသည် ထိုလူအားကြည့်၍ ချစ်ခင်တော်မူလေသည်။

ကိုယ်တော်ယေရှုက “သင်ပြီးပြည့်စုံသူတစ်ဦးဖြစ်လိုလျှင်သင်ပိုင်ဆိုင်သောပစ္စည်းဥစ္စာများအားလုံးအားရောင်းချ၍ ဆင်းရဲသူများ အားပေးကမ်းစွန့်ကြဲလိုက်ပါ။ ပြီးလျှင်ငါ၏နောက်တော်သို့လိုက်ခဲ့ပါ။ ဤသို့ပြုလျှင် သင်သည် နိဗ္ဗာန်ရွှေမြို့တော်၌ လည်းစည်းစိမ်ဥစ္စာများပေါကြွယ်စွာရရှိပါလိမ့်မည်။"ဟုဖြေကြားတော်မူလေသည်။

ထိုလူငယ်သည် ကိုယ်တော်ယေရှုမိန့်တော်မူသည်ကို ကြားသောအခါ အလွန်အမင်းစိတ်မကောင်း ဖြစ်သွားခဲ့လေသည်။ အဘယ်ကြောင့်ဆိုသော် သူသည်အလွန်ချမ်းသာသောသူတစ်ဦးဖြစ်၍ သူ၏ပိုင်ဆိုင်မှုများကို တစ်ခြားလူများအားမပေးလိုသောကြောင့်ဖြစ်သည်။ထို့ကြောင့်သူသည်ကိုယ်တော် ယေရှုအားကျောခိုင်းကာထွက်ခွါသွားလေသည်။

ထို့နောက်ကိုယ်တော်ယေရှုသည် သူ၏တပည့်တော်များအား “ချမ်းသာသောသူများသည် နိဗ္ဗာန်ရွှေ မြို့တော်သို့သွားရန် အလွန်ခက်ခဲသည်။ ကုလားအုပ်တစ်ကောင်သည် အပ်နဖါးပေါက်ထဲသို့ ဝင်ရန်လွယ်ကူနိုင်သော်လည်း ချမ်းသာသောသူမှာမူ နိဗ္ဗာန်ရွှေမြို့တော်သို့ဝင်ရောက်နိုင်ရန် အလွန်ပင်ခဲယဉ်းလှ၏” ဟု ဆုံးမတော်မူလေသည်။

ကိုယ်တော်ယေရှု၏ တပည့်တော်များသည် ထိုစကားအားကြားသောအခါတွင် အလွန်အံ့ဩတုန်လှုပ်သွားကြပြီး “ဤသို့ဆိုလျှင် ဘုရားရှင်သည် မည်သို့သောသူအားကယ်တင်နိုင်ပါမည်နည်း”ဟူ၍ မေးလျှောက်ကြလေသည်။

ကိုယ်တော်ယေရှုသည် တပည့်တော်များအားကြည့်၍ “လူတို့သည်မိမိကိုယ်ကိုကယ်တင်ရန် မတတ်နိုင်သော်လည်း ဘုရားရှင်သည်အရာခပ်သိမ်းတို့အားတတ်နိုင်ပေ၏”ဟု မိန့်တော်မူ လေသည်။

ပေတရုက ကိုယ်တော်ယေရှုအား “တပည့်တော်များဖြစ်သော ကျွန်ုပ်တို့သည် ကိုယ်တော်၏နောက်တော်သို့အရာအားလုံးအားစွန့်လွှတ်၍ လိုက်ပါခဲ့ကြပါပြီ။ ကျွန်ုပ်တို့မည်သည့်အကျိုးများခံစားရပါ မည်နည်း”ဟု မေးလျှောက်ကြလေသည်။

ကိုယ်တော်ယေရှုက “ငါ့အတွက်ကြောင့်အိမ်မြေ၊ မိဘ၊ ညီအစ်ကိုမောင်နှမများ၊ သားသမီးများနှင့် ပိုင်ဆိုင်မှုများအားစွန့်သောသူသည်ရှိမည့်အပြင် ထိုသို့စွန့်ခဲ့သောအရာများထက်အဆတစ်ရာမကသော ဆုလာဒ်တို့ကို ရရှိမည့်အပြင် နိစ္စထာဝရအသက်ကို ပါရရှိပါလိမ့်မည်။ သို့သော်ယခုအရေးပါအရာရောက်သူတို့သည် အသုံးမဝင်သူများဖြစ်သွားပြီး၊ ယခုအ‌ရေးမပါသောသူတို့သည်အသုံးဝင်သောသူများ ဖြစ်လာကြလိမ့်မည်”ဟု ပြန်လည်မိန့်တော်မူလေသည်။

မဿဲ၁၉း၁၆-၃၀; မာကု ၁၀:၁၇-၃၁; လုကာ ၁၈:၁၈-၃၀