1. सृष्टि

जम जाएत कर शुरू एकस होईस। परमेसवर हर जम जगहा ला छव दिन में बनाईस। परमेसवर हर जे घरी भूईया ला बनाईस, ते घरी भूईया हर अंधार अऊ खाली रहीस। ओमे काही जाएत नई बनाल रहीस। ते घरी परमेसवर कर आतमा हर पानी कर ऊपरे ऊपरे किन्दरत रहीस।

जे घरी परमेसवर हर कहिस इंजोर होएजा, ते घरी इंजोर होए गईस। परमेसवर हर देखीस की इंजोर हर सुघर हवे अऊ ओला दिन कहिस। ओहर इंजोर ले अंधार ला अलगे करिस अऊ अंधार ला राती कहिस। सिरजे कर आगू दिन परमेसवर हर इंजोर ला बनाईस।

सिरजे कर दुसर दिन परमेसवर हर कहिस अऊ भूईया कर ऊपरे बदरी हर बएनगईस। परमेसवर हर बदरी ला बनाईस अऊ ऊपर कर पानी ले खाले कर पानी ला अलगे करिस।

तीसर दिन परमेसवर हर कहिस अऊ पानी अऊ झुरा जगहा ला अलगे करिस। ओहर झुरा जगहा ला भुइया कहिस अऊ पानी ला समुदर कहीस। त परमेसवर हर देखीस की जेतरा जाएत ला बनाए रहीस ओहर ढ़ेरे सुघर हवे।

परमेसवर हर कहिस सब जाएत कर रुख अऊ गांछी जामे अऊ ओही कस होए गईस। त परमेसवर हर जेला बनाये रहीस ओला देखीस त कहीस सुघर हवे ।

चौथवे दिन परमेसवर हर कहीके बेर, जोंन अऊ तरइया ला बनाईस की भुइया ला इंजोर करे। दिन अऊ राती ला अलगे करे अऊ मौसम अऊ साल ला ठहराईस। त परमेसवर हर जेला बनाये रहीस, ओला देखीस त कहीस सुघर हवे।

पांचवे दिन परमेसवर हर कहिस अऊ पानी में पंऊरे मधे जम जीव मन ला अऊ बदरी में उड़ाए मधे चराई मन ला बनाईस। त परमेसवर हर जेला बनाया रहीस ओला देखीस त कहीस सुघर हवे अऊ ओमन ला आशीष देहीस।

छटवे दिन परमेसवर हर कहीस भुईया में जम मधे कर जीव जन्तु हो। परमेसवर हर जईसने कहीस वइसने होए गईस। चटिक घरऊहाँ जानवर रहीस, चटिक भुईया में घिसले मधे रहीस अऊ चटिक मन जंगल कर जानवर रहीन अऊ परमेसवर हर देखीस त कहीस ढ़ेरे सुघर हवे।

तेकर परमेसवर हर कहिस हमरे कस आदमी ला बनाबो की ओहर हमरे सहींक होहीं। ओकर जग भूई अऊ जम जीव मन कर ऊपरे अधिकार रख ही।

एकरले परमेसवर हर चटिक माटी ला साएनके आदमी ला बनाईस अऊ ओकर नाक में जीये कर सांस ला फुकीस अऊ ओहर जीवित पराणी बन गईस। ओकर नाव आदम धरीस। परमेसवर हर एगोठ बगीचा बनाईस अऊ ओकर पहरा करे बर ऊहाँ आदम ला राखिस।

बगीचा कर मंझार में परमेसवर हर दूई मधे कर रूख ला जगहाईस। जीवन कर रूख अऊ भला, बुरा कर ज्ञान कर रूख। परमेसवर हर आदम ला कहीस “तैं बगीचा कर कोनो रुख कर फर ला खाये सकत हस लेकिन भला, बुरा कर ज्ञान कर रुख ले झईन खाबे। जे दिन तैं ओ रुख कर फर ला खाबे त मर जाबे। ”

तेकर पाछु परमेसवर हर कहीस आदम कर एके झे रहाई ठीक नईये काबर की जानवर में ले आदम कर मदत करे बर कोई नई मिलीस।

एकरले परमेसवर हर आदम ला ढ़ेरे नीन्द में सुताये देहीस। तेकर आदम कर एगोठ पांजर कर हाडा ला हेर के स्त्री ला बनाईस अऊ आदम जग लानीस।

जे घरी आदम हर ओला देखीस त कहीस “एहर तो मोर कस हवे एकर नाव नारी रही। कावर की एहर नर में ले हेरल गईस हवे। ” एकरले आदमी अपन दाई, दाऊ ला छोडके अपन परानी संगे एक तन बने रही।

परमेसवर हर नर अऊ नारी ला अपने कस बनाईस अऊ ओमन ला आसीरवाद देहीस “पूतो, फलो दुधो नहाओ अऊ भूइया में बगर जावा”। परमेसवर हर देखिस की जे जाएत ला बनाए रहीस ओहर ढ़ेरेच सुघर हवे अऊ परमेसवर हर जम जाएत ला देख के ढ़ेरे फुरमा होईस। ए जम जाएत हर सिरजे कर छव दिन में होए गईस।

सातवे दिन परमेसवर हर अपन जम बुता काम ला करके बिसोईस अऊ सातवे दिन ला आसीरवाद देहीस अऊ पवितर ठहराईस। एहीकस परमेसवर हर जम दुनिया अऊ ओकर भीतरी कर जम जाएत ला बनाईस।

A Bible story from: Genesis 1-2

2. पाप दुनिया में घुसथे

परमेसवर हर बगीचा ला बनाये रहीस, ओमे आदम अऊ ओकर परानी ढ़ेरेच ख़ुशी से रहे लागीन। दोनों झन कपड़ा नई पहिरे रहीन। तबोले ओमन नई लजावत रहीन, काबर की दुनिया में पाप नई रहीस। ओमन बगीचा में रेंगत बुलत रहीन अऊ परमेसवर जग गोईठ बात करत रहीन।

लेकिन ओ बगीचा में एक ठे चतुर सांप रहीस। ओहर स्त्री जग पूछिस की “सहीच में परमेसवर हर तोके कहीस हवे की ए बगीचा कर कोनो रूख कर फर ला झईन खाबे। ”

स्त्री हर उत्तर देहीस की “परमेसवर हर हमन के कहीस हवे की भला अऊ बुरा कर ज्ञान कर रूख कर फर ला छोएड के कोनो रुख कर फर ला खाये सकत ही। परमेसवर हर हमके कहीस हे की “जे घरी तुमन ओ फर ला खईहा या छुइहा त मर जईहा। ”

सांप हर स्त्री ला कहीस “ए गोईठ हर सही नइये, तैं नई मरबे। परमेसवर हर जानथे की जे दिन तैं ओ फर ला खाबे त तहुँ हर परमेसवर कस बन जाबे अऊ परमेसवर के जईसन भला अऊ बुरा ला तैं समझे लागबे। ”

स्त्री हर देखिस की फर हर सुघर अऊ लोभ लोभावन दिखत हवे, ओहर होशियार स्त्री बने बर चाहत रहीस। एकरले फर ला टोयर के खाईस अऊ अपन घरदार ला देहीस जेहर ओकर संगे रहीस ओहू हर फर ला खाईस। ।

एकेच दायेर ओमन कर आएख हर उघेर गईस अऊ ओमन अपने ला चिन्हीन की हमरे नंगा हवन। पान मन ला खिलखे कपड़ा बनाके अपन देह ला ढाकेक चाहत रहीन।

त आदम अऊ ओकर परानी परमेसवर कर आरो ला पाईन। जे घरी परमेसवर हर बगीचा में रेंगत रहीस। दोनो झन परमेसवर जग ले लुकाये कर उपाय करीन। त परमेसवर हर आदम ला चिकरीस “तैं कहां हवस” आदम हर कहीस “मैं तुहंके बगीचा में रेंगत सुने, त मैं डराये गयें काबर की मैं नंगा हवों, एकरले हमरे लुकाये गए हवन”।

त पेरमेश्वर हर ओमन जग पूछिस “तुमन ला कोन कहीस की तुमन नंगा हवा? का तुमन ओ फर ला खाया जेला मैं खाए बर मना करे रहें? आदम हर कहीस की तैं जे स्त्री ला मोके देहे हस, ओही स्त्री हर मोके फर ला देहिस। त परमेसवर हर स्त्री जग पुछिस ए “तैं का कर देहे?” स्त्री हर कहिस “सांप हर मोके ठग देहीस”।

परमेसवर हर सांप जग कहीस “तैं श्रापित हवस, तैं अपन पेट कर बल रेंगबे अऊ माटी चाटबे। तैं अऊ स्त्री एक दुसर ले बैर करबे अऊ तोर लईका मन अऊ स्त्री कर लईका एक दुसर ले बैर करही। स्त्री कर लईका हर तोर मुड़ी ला कूंच ही अऊ तैं ओकर एड़ी ला छाब्बे।

तेकर परमेसवर हर स्त्री ला कहीस कि “तैं जबर जियायेन पाएके लईका ला जनम देबे। तोर लालसा तोर घरदार कती रही अऊ ओहर तोर ऊपर अधिकार रखी।

परमेसवर हर आदम ला कहीस “तैं अपन परानी कर बात ला मान के मोर आगयां ला नई माने। अब ले भूइया हर श्रापित होहीं अऊ भूई में काही जाएत ला उपजाये बर तोके जबर जियायेन करे बर परही। तैं मर जाबे अऊ तोर देहे हर माटी में मेराये जाही। आदम हर अपन परानी कर नाव हवा धरीस। जेला कथे “जनम देहे वाली” काबर की ओहर जम आदमी जाएत कर महतारी बनीस। परमेसवर हर आदम अऊ हवा ला जानवर कर छाली ला ओढ़ना बनाये के पहिराईस।

त परमेसवर हर कहिस “आदमी हर हमर कस बन गईसे काबर की ओहर भला अऊ बुरा ला जानथे। ओके जिनगी कर रुख ले जम घरी खाये बर अऊ जिन्दा रहे बर मना करे बर हवे। तेकर परमेसवर हर आदम अऊ हवा ला ओ सुन्दर बगीचा ले निकाल देहीस। परमेसवर हर शक्ती शाली सवरग दूत मन ला बगीचा कर दुरा कर पहरा करे बर राखीस की कोई आदमी ओ जीवन कर रुख कर फर ला खाए झईन पावे।

A Bible story from: Genesis 3

3. जल प्रलय

जबर दिन कर पाछु ए भूईया में ढ़ेरे अकन आदमी रहे लागीन। ओमन ढ़ेरेच बदमास अऊ लड़ाई झगरा करेदार होए गए रहीन। एकरले परमेसवर हर विचार करीस मैं भूईया ला एक जल परलय से नसवाए देहूं।

.

लेकिन परमेसवर कर अनुग्रह सब घरी नूह पर बने रहीस। कसरिहा मन कर मंझार में नूह हर एगोठ धर्मी आदमी रहीस। परमेसवर हर नूह जग कहीस की “मैं ढ़ेरेच बगरा पानी गिरा हूं”। परमेसवर हर नूह ला एकठे बड़खा अकन डोंगा बनाए बर कहीस।

.

परमेसवर हर नूह जग कहीस “ओ डोंगा ला एक सौ ३०० हाथ लम्मा, ५० हाथ चाकर अऊ ३० हाथ ऊँचा बनाबे। ए डोंगा ला लकरी कर बनाबे अऊ ओमे तीन छत बनाबे अऊ ढ़ेरे बगरा कोठरी बनाबे अऊ छत अऊ खिड़की बनाबे”। ढ़ेरेच बगरा पानी गिरही ते घरी नूह अऊ ओकर परिवार अऊ जम कसीन कर जानवर मन भी डोंगा के चलते बाँएच जाहीं।

नूह हर परमेसवर कर बात ला मानिस अऊ अपन तीन बेटा मन कर संगे मिलके एक बडे भारी डोंगा ला बनाईन अऊ ओला बनाया में जबर बछर लागीस। नूह हर आदमी मन ला बगरा पानी गिरे कर गोईठ ला गोईठ ला कहीस, अऊ ओमन ला परमेसवर जग आए बर कहीस। लेकिन ओमन बिसवास नई करीन।

परमेसवर हर नूह अऊ ओकर घर कर जम झेला आगियां देहीस कि अपन बर ढ़ेरे अकन खाना अऊ जानवर मनबर ढ़ेरे अकन चारा जूटाया लेवा। जे घनी जम जाएत हर तियार होए गईस। त परमेसवर हर नूह जग कहीस “तोर परानी अऊ तीनो बेटा बहुरिया मन कर संगे जम मिलायके आठ जन डोंगा में हलेक जावा।

।

परमेसवर हर जम जीव अऊ चराई मन कर नर माता ला नूह जग भेजीस कि ओमन डोंगा में हलेक जाये अऊ जल परलय ले सुघरे सुघर बाएच जाए। जेतना जीव ला बलिदानमें चढ़ाये जाथे ओनर माता कर जोड़ा ला परमेसवर हर भेजीस। जब जम जीव मन डोंगा में आये गईंनतब परमेसवर हर खुद दुरा ला हुरेक देहीस।

फेर बारिस होए लागीस। चालीस राएत अऊ दिन पानी बरसे लागीस, अऊ भुईया ले भी पानी ऊपके लागीस। जे जाएत भुईया में रहीस जम ओ जम जाएत हर पानी में बूइढ़ गईस, बड़खा पहार भी बूइढ़ गईस।

।

जे जाएत झुरा भूईया में रहीस ओ जम जाएत हर नास होए गईस, नूह अऊ ओकर परिवार अऊ जीव जन्तु जेमन डोंगा में रहीन ओमन बांएच गईन। डोंगा पानी कर ऊपरे ऊपरे पऊँरत रहीस।

बारिस कर पाछू, डोंगा हर पांच महीना ले पानी ले पऊँरत रहीस अऊ धीरे धीरे पानी हर अंटाये लागीस। एकठे पहार में डोंगा हर जाएके टिक गईस, तबोले भुईयायां में पानी भरले रहीस अऊ तीन महिना होए गईस तब पहार कर चोटी हर दिखे लागीस।

चालीस दिन कर पाछु नूह हर एक ठे कऊँआ ला उड़वाये देहीस ए देखे बर की पानी हर अंटाईस की नई। कऊँआ हर झुरा भूईया ला खोज देखिस, लेकिन पाँव धरे कर जगहा नई पाईस।

तेकर पाछु नूह हर एक ठे परेवां ला उडवाईस, त परेवां हर भी झुरा भूईया ला नई पाईस, तेकरले ओहर डोंगा में फेरके आये गईस। एक हप्ता कर पाछु ओहर परेवां ला फेर उडवाईस, ए दाएर वो परेवां हर अपन ठोर में जैतून कर पान ला ले आनिस, पानी हर कम होवत गईस अऊ गांछी मन बाढ़े लागीन।

एक हफ्ता कर पाछु नूह हर परेवां ला तीसर दाएर उडवाईस, त परेवां ला बैठे कर जगह मिल गईस अऊ ओहर फेरके नई आईस, काबर की पानी हर अंटावत रहीस।

दूई महीना कर पाछु परमेसवर हर नूह जग कहीस “तैं अऊ तोर घरे भरकर अऊ जम जानवर मन डोंगा ले बहीरे निकेल आवा। फूला फला अऊ भूईया में बगर जावा। एही सहीक नूह अऊ ओकर घराना डोंगा ले बहीरे आये गईन”।

डोंगा ले बहिरे आये कर पाछु, नूह हर एक ठे बेदी बनाईस अऊ ओमें बलिदान चढ़ाये लाईक जानवर मन ला बली चढ़ाईस। परमेसवर हर बलिदान ले ढ़ेरेच फुरमा होईस। नूह अऊ ओकर घर भर ला ढ़ेरे बगरा आशिर्वाद देहीस।

परमेसवर हर जबान करीस कि “में भुईया कर आदमी मन ला ओमन कर बुरा काम ले फेर नास नई करहूँ अऊ फेर भुईया ला पानी गिराएके नई डूबाहूँ, आदमी तो नानबढ ले ही पापी हवे।

परमेसवर हर जबान कर रूप में सोंकाबोडा ला बनाईस अऊ कहीस कि जे घरी सोंकाबोडा हर बदरी में उगही, ते घरी परमेसवर हर अपन जबान ला अऊ अपन लोग मन ला सुरता करही।

.

A Bible story from: Genesis 6-8

4. अब्राम कर संगे परमेसवर कर जबान

जल प्रलय के ढ़ेरे बछर कर पाछु, भूईया में फेर आदमी मन बगरे लागीन, अऊ जम जन एकेकस भासा गोठियात रहीन। परमेसवर हर आगियां देहे रहीस कि भुईया में बगेर जावा लेकिन ओमन एक जगह होए के एक ठे नगर बनाये बर चाहीन। .

ओमन जम झे अऊ परमेसवर हर जे जाएत ला कहे रहीस, ओकर सुरता नई करीन अऊ सवरग पहुँचाये बर एक ठे बड़े भारी ढ़ेरेच रोंट महल ला बनाये लागीन। परमेसवर हर देखीस कि ओमन बुराई करे बर एक संग काम करत हवे। ओमन आगू अऊ बुरा काम ला करही।

एकरले परमेसवर हर ओमन कर भासा ला गडबड़ाए देहीस अऊ ओमन ला भुईया भर में बगराये देहीस। जे नगर ला ओमन बनाये बर शुरू करीन ओला बाबेल बलाये लागीन, जेकर मतलब हवे गडबड़ी।

सैकडों बछर कर पाछु परमेसवर हर अब्राम नाव कर आदमी जग । परमेसवर हर ओकर जग कहीस “अपन गाँव, देश, अऊ परिवार ला छोड़ के ओ देश में चएल जा जेला मैं तोके देखा हूँ। मैं तोके आसीरवाद देहूँ अऊ तोर ले एक बड़का जाति बना हूँ। मैं तोर नाव ला महान बना हूँ। जे तोके आशिर्वाद देही, मैं ओके आशिर्वाद देहूँ, जे तोके सराएप देही, मैं ओके सराएप देहूँ। तोर चलते भुईया कर जम लोग मन आशिर्वाद पाहीं।

अब्राम हर परमेसवर कर आगियां ला मानीस। अपन परानी सारा अऊ जम सेवक मन कर संगे अऊ जे जाएत ओमन जग रहीस ओला लेके अब्राम हर परमेसवर कर देखावल देश में मतलब की कनान डगर निकेल पडीस।

जे घरी अब्राम हर कनान में पहुंचीस, परमेसवर हर कहीस “अपन चारों खुंट ला देख, मैं तोके अऊ तोर लईका मन ला जम भूईया ला दे देहूँ जेला तैं देखत हस”। फेर अब्राम हर ओ गाँव में बएस गईन।

एक दिन अब्राम हर मल्किसेदक जग मिलिस जे “परम प्रधान परमेसवर” कर याजक रहीस। मल्किसेदेक हर अब्राम ला आशिर्वाद देहीस अऊ कहीस “परम प्रधान परमेसवर” जेहर सवरग अऊ भुईया कर मालीक हवे, ओहर अब्राम ला आशिर्वाद दे। अब्राम जग जे जाएत रहीस ओकर दसवां हिस्सा मल्किसेदक ला देहीस।

ढ़ेरेच बछर बीत गईस, तबोले अब्राम अऊ सारा कर एकोठे लईका छऊआ नई रहीन। परमेसवर हर अब्राम जग गोठियाईस अऊ फेर जबान करीस कि तोके एक लईका देहूँ, अऊ तोर वंश हर बदरी कर तरइया कस हो हीं। अब्राम हर परमेसवर कर जबान में बिसवास करीस। परमेसवर हर अब्राम ला धर्मी ठहराईस काबर कि ओहर परमेसवर कर जबान पर बिसवास करीस

फेर परमेसवर हर अब्राम संग एक बात जबान करीस, दुई जन कर मंझार कर सलाव ला जबान कथें। परमेसवर हर कहीस मैं तोके तोर सरीर ले एक ठे लईका देहूँ। मैं कनान देश ला तोर लईका मन ला देहूँ। अझर ले अब्राम कर एकोठे लईका नई रहीन।

.

A Bible story from: Genesis 11-15

5. जबान कर बेटा

अब्राम अऊ सारै ला कनान में आये ले दस बछर होए गए रहीस। तबोले ओमन कर एकोठे लईका नई होए रहीस। एकरले अब्राम कर परानी सारै अब्राम जग कहीस, परमेसवर हर अझर ले हम के लईका नई देहीस हवे मैं तो बुढिया होए जाथों। देख तैं मोर नौकरानी हाजिरा जग शादी कर ले, काबर कि ओहर मोके एक ठे लईका दे सकत हवे।

एकरले अब्राम हर हाजिरा जग शादी कर लेहिस। हाजिरा कर एक ठे लईका होईस अऊ अब्राम ओकर नाव इसमाएल धरिस। तेकर ले सारै हर हाजिरा ला इसगाये लागीस, जे घरी इसमाएल तेरह बछर कर होए गईस, ते घरी परमेसवर हर अब्राम जग गोठियाईस।.

परमेसवर हर कहीस, मैं सर्व शक्तिमान परमेसवर लागों। मैं तुमन कर संगे एक जबान करत हवो, तब अब्राम भुईया में खाप्पोईया गिरीस। परमेसवर हर अब्राम ला कहीस तैं ढ़ेरे अकन जाति कर दाऊ बनबे। मैं तोके अऊ तोर लईका मन ला कनान देश ला देहूँ, मैं सगर दिन ओमन कर परमेसवर बने रहूँ। तोके अपन घरों भर कर जम पुरुष मन कर खतना करेक परही।

तोर परानी सारै, एक ठे लईका जनम देही, ओहर बात जबान कर बेटा हो ही। ओकर नाव इसहाक धरबे। मैं मोर बात जबान ला ओकर जग बनाहूँ, ओ एक बड़खा जाति बन जाही। मैं इशमाइल ला भी एक बड़खा जाति बनाहूँ लेकिन मोर जबान इसहाक कर संगे बने रही। फेर परमेसवर हर अब्राम कर नाव ला बदेल के अबराहम धरीस जेकर अर्थ हवे “जातियों कर मूल पिता” परमेसवर हर सारै कर नाव ला भी सराहा में बदल देहीस जेकर अर्थ हवे “राजकुमारी”।

ओ दिन अबराहम हर अपन घर भर कर जम पुरुष मन कर खतना करीस। एक बछर कर पाछु जे घरी अबराहम हर सौ बछर कर रहीस अऊ सराहा नब्बे बछर कर रहीस। सराहा हर अबराहम कर लईका ला जनम देहीस। ओमन ओकर नाव इसहाक धरीन, जेकस परमेसवर हर कहे रहीस।

जे घरी इसहाक हर जवान रहीस त परमेसवर हर अबराहम कर बिसवास कर परीक्षा लेहिस। “तैं अपन एकलौता बेटा इसहाक ला मोर बर बली चढ़ा। ” अबराहम हर आगियां ला मनीस अऊ अपन बेटा ला बलि चढ़ाये बर तियार होए गईस।

जे घरी अबराहम अऊ इसहाक बलि कर जगहा में जात रहीन, त इसहाक हर पूछीस “दाऊ हमर जग बलिदान करे बर लकरी हवे, लेकिन मेमना कहां हवे? अबराहम हर उतर देहीस “बेटा, परमेसवर हर खुद बली करेबर मेमना ला देही।

जे घरी ओमन बलि कर जगहा में पहुँचीन, अबराहम हर अपन बेटा इसहाक कर गोड हाथ ला बान्धीस अऊ बेदी में सुताये देहीस। ओहर अपन बेटा ला पूजे बर उगाये रहीस त परमेसवर हर कहीस “रुक जा, लईका ला झईन पूज, मैं जानथों की तैं मोके डरथस काबर कि तैं अपन एकलौता बेटा ला बली करे बर तियार होए गए रहे।

ओ जग कर भून्द्रा में अबराहम हर एक ठे बाझल मेमना ला पाईस। इसहाक कर बदले में बली करे बर परमेसवर एगोठ मेमना ला देहीस। अबराहम ढ़ेरेच फुरुमा होए के मेमना कर बली चढाईस।

त परमेसवर हर अबराहम जग कहीस, “तैं अपन जम जाएत ला देहे बर तियार होए गये, अपन एकलौता बेटा ला भी, एकरले मैं तोके आशिर्वाद देहत हवों। तोर लईका छउआ मन ला बदरी कर तरइया मन ले भी ढ़ेरे अकन होंही। तैं मोर आगियां ला माने, एकरले भूईया कर जम कुल तोर घराना कर चलते आसिसित होहीं।

A Bible story from: Genesis 16-22

6. परमेसवर इसहाक बर तियारी करथे

अबराहम हर ढ़ेरेच बुढूवा होए गए रहीस अऊ इसहाक जवान होए गये रहीस, ओकरे ले अबराहम हर सेवक में ले एकठे सेवक ला अपन जाएत सागा जग भेजीस। ताकी ओहर अपन लईका इसहाक बर एकठे परानी लाने।

जबर तान रेंगीस तेकर पाछू परमेसवर हर ओ सेवक ला अबराहम कर जाएत सागा कर मांझारे में रिबिकाह जग पहुँचाईस। ओ रिबिकाह हर अबराहम कर बड़खा ददा कर नतनीन रहीस।

रिबिकाह हर अपन घराना कर आदमी मन ला छोएडके ओ सेवक कर संगे इसहाक कर घरे जाएबर सपेर गईस। जइसने ओ रिबिकाह हर पहुँचीस इसहाक हर रिबिकाह जग बिहाव कएर लेहिस।

ढ़ेरेच बछर बीत गईस तेकर अबराहम हर मर गईस अऊ सब बात जबान जेला परमेसवर हर अबराहम जग करे रहीस, ओहर इसहाक कर होए गईस। परमेसवर हर अबराहम ला कहे रहीस की ओकर खान दान हर ढ़ेरे अकन होहीं। लेकिन इसहाक कर परानी रिबिकाह कर एकोठे लईका छऊआ नई रहीस।

इसहाक हर रिबिकाह बर दुआ करीस अऊ रिबिकाह हर आसापति होए गईस। परमेसवर हर रिबिकाह ला जावां लईका देहीस। ए दुनो लईका रिबिकाह कर पेट में झगरा बाझत रहीन, अऊ रिबिकाह हर परमेसवर जग पूछिस की एहर का होअथे।

परमेसवर हर रिबिकाह जग कहीस तोर दूईगोठ लईका ले दूईगोठ जाती आहीं। ओमन दुनो झे अपने अपन में लड़ही अऊ बड़खा बेटा हर छोटे कर सेवा करही।

जे घरी रिबिकाह लईका मन ला जनम देहीस ते घरी बड़खा बेटा लाल अऊ रांवादार रहीस अऊ ओकर नाव एसाव धरीस। तेकर छोटे बेटा हर बड़खा बेटा कर एडी ला धएरके बहरी निकलीस अऊ ओकर नाव याकूब धरीस।

A Bible story from: Genesis 24:1-25:26

7. परमेसवर हर याकूब ला आसीरवाद देहीस

लईका मन बड़खा होअत गईन, याकूब घर में रहे बर करत रहीस। एसाव खेदा करे बर पतीयावत रहीस। रिबिकाह याकूब ला मया करत रहीस अऊ इसहाक एसाव ला मया करत रहीस।

एक दिन एसाव खेदा करके फिरीस, ते घरी ढ़ेरेच भूखे होअत रहीस। एसाव हर याकूब जग कहीस “तोर रान्धल साग भात ला महूके दम अकन खाए बर दे”। याकूब हर कहीस “अपन बड़े बेटा होए कर हक ला मोके दे”। एसाव हर अपन जेठा होएकर हक ला दे देहीस। फेर याकूब ओके चटिक अकन खाए बर देहीस।

इसहाक अपन आसीरवाद एसाव ला देहे बर करत रहीस। लेकिन एकस करे कर आगू रिबिकाह अऊ याकूब हर इसहाक ला ठगिन अऊ याकूब इसहाक जग गईस अऊ कहीस “मैं एसाव लागो”। इसहाक हर बूढाये गए रहीस अऊ धून्धरा देखत रहीस। तेकरले याकूब हर अपन हाँथ मन में अऊ ढेटू मन में छेरी कर चाम ला पहिरके एसाव कर ओढना ला पहिर लेहीस।

याकूब इसहाक जग आएके कहीस “ मैं एसाव लागो। मैं एकर बर आए हो की तैं मोके आसीरवाद दे”। जे घरी इसहाक हर छेरी कर चाम ला छुईस अऊ ओढना ला सुन्घीस त ओके लागीस की ए एसाव हवे अऊ ओके आसीरवाद देहीस।

एसाव हर याकूब ला नई पतियावत रहीस काबर कि याकूब हर ओकर जग ले जेठ बेटा होएकर हक ला छिन लेहीस अऊ आसिरवाद ला भी छिन लेहीस। तेकरले अपन दाऊ कर मरेकर पाछू याकूब ला मारेबर करत रहीस।

लेकिन रिबिकाह हर एसाव कर ए गोईठ ला सुनीस की एसाव हर याकूब ला मारेबर करत हवे। एकेरले इसहाक अऊ रिबिकाह हर याकूब ला अपन जाएत सागा मन कर संगे रहे बर दुरिहां भेज देहीस।

याकूब रिबिकाह कर जाएत सागा मन कर संगे ढ़ेरेच बछर ले रहीस। ओही घरी ओकर बिहाव होए गईस। ओकर बारहठे बेटा अऊ एकठे बेटी रहीस। परमेसवर हर ओके ढ़ेरेच बड़खा धनी बनाईस।

कनान कर अपन घर ले दुरिया जाये कर बीस साल कर पाछू याकूब अपन परिवार सेवक सेविका अऊ जम भेड़ बकरी मन कर संगे अपन घरे फेरके आए गईस।

याकूब ढ़ेरेच डरावत रहीस काबर की ओ सोचत रहीस की एसाव हर अझर ले मोके मारे बर करत होहीं। तेकरले डगरे में ओहर एसाव बर ढ़ेरेच बगरा भेड़ बकरी मन ला सन्देस कस भेजीस। जे सेवक मन जानवर मन ला लानीस ओमन एसाव जग कहीन “तुँहर सेवक याकूब हर ए भेड़ बकरी मन ला तुँहर जग सन्देस भेजीस हवे, ओ हालू आवथे”।

लेकिन एसाव याकूब ला क्षमा कर देहे रहीस अऊ ओमन एक दूसर ला देखके ढ़ेरेच फुरमा होईन। फेर याकूब कनान में सुघरे सुघर रहे लागीस। तेही घरी इसहाक मर गईस। याकूब अऊ एसाव दुनों झे ओके माटी देहिन। जे बात जबान ला परमेसवर हर अबराहम जग करे रहीस ओहर अब इसहाक जग ले याकूब जग पहुंचिस।

A Bible story from: Genesis 25:27-33:20

8. युसूफ अऊ ओकर घर भर ला परमेसवर बछाथे

ढ़ेरे बछर कर पाछू जे घरी याकूब सियान होए गाए रहीस त ओहर अपन दुलरुवा बेटा युसुफ ला ओकर भाई मन कर हाल खबर ला जाने बरीक ओमन जग भेजीस जेमन भेड़ मन ला चरावत रहीन।

युसुफ कर भाई मन ओके नई पतियात रहीन काबर की ओमन कर दाऊ हर सबले ढेर युसुफ ला मया करत रहीस अऊ युसुफ हर सपना देखे रहीस की अपन भाई मन कर ऊपरे राज करही। जे घरी युसुफ अपन भाई मन जग आईस ते घरी ओमन ओके धरके गुलाम बजरिहा मन जग बेच देहीन।

घर पहुँचे कर आगू युसुफ कर भाई मन युसुफ कर ओढ़ना ला एकठे बकरा कर लहू में रंग देहिन। फेर ओमन ओ ओढ़ना ला अपन दाऊ ला देखाईन। याकूब हर सोचीस की जंगल कर जानवर हर युसुफ के मार देही से तेकर ओके ढ़ेरे दुख लागीस।

गुलाम बजरिहा मन युसुफ ला मिस्र में पहुंचाईन। मिस्र एक बड़खा अऊ धनी देस रहीस, जेहर नील नदी कर धरी में बसे रहीस। गुलाम बजरिहा मन युसुफ ला एक गुलाम सहींक एकठे धनी सरकारी साहेब जग बेच देहीन। युसुफ अपन मालिक कर सेवा बढीया ले करत रहीस अऊ परमेसवर हर युसुफ ला आसीरवादित करिस।

मालिक कर परानी हर युसुफ ला अपन संगे सुतेबर कहीस। लेकिन युसुफ परमेसवर कर आगियां ला मानत रहीस, तेकर युसुफ पाप करे बर मना कर देहीस। ओहर ढ़ेरेच गुस्साईस अऊ युसुफ ला झूट बोलके फंसाईस अऊ ओके बन्दी बनाएके जेहल में डाएल देहीस। लेकिन जेहल में युसुफ हर परमेसवर कर ऊपरे बिसवास करत रहीस। ओकरेले परमेसवर ओके ऊपर अपन दया बनाया रहीस।

कांहीच गलती नई करे रहीस तबोले युसुफ ला दुई बछर ले जेहल में रहेक परिस। एक राएत मिस्र कर राजा फिरौन दूई मधे कर सपना देखीस, जेहर ओके ला ढ़ेरेच गुनायेन में डाएल देहीस। ओकर सपना कर मतलब ला, ओकर सलाव देहे वाला एको झन आदमी मन नई समझाए पाईन।

परमेसवर हर युसुफ ला सपना कर मतलब समझाए कर वरदान देहे रहीस। एकरले फिरोन हर ओके जेहल ले बलुवाईस। यूसुफ हर ओकर सपना कर मतलब ला समझाईस अऊ कहीस “परमेसवर सात बछर बर ढ़ेरेच बगरा अनाज देही। तेकर पाछू सात बछर कर अकाल हो ही।

फिरोन हर युसुफ जग एतेक फुरुमा होईस की ओहर ओके ला फिरोन कर पाछू दुसर जगहा में मिस्र कर सब जाएत कर ऊपर अधिकार रखे बर चुन लेहीस।

सात बछर कर नगद फसल कर घरी में युसुफ हर लोग मन जगले ढ़ेरे अकन अनाज ला जूटाईस। जे घरी सात बछर कर अकाल आईस ते घरी युसुफ हर ए अनाज ला आदमी मन जग बेचीस की कोई भूखे झईन होएं सबे जग खाए बर रहे।

मिस्र अऊ जम देस में ढ़ेरेच अकाल पडीस अऊ कनान में जिहां ला याकूब अऊ ओकर परिवार मन रहत रहीन ऊहाँ ला भी अकाल परीस। अकाल हर ढ़ेरेच जबर जस रहीस।

याकूब हर अपन रोंट लईका मन ला मिस्र भेजीस की ओमन अनाज ले लाने। जे घरी ओमन युसुफ जग अनाज लेहे बर गईन ओमन युसुफ ला नई चिनहीन। लेकिन युसुफ हर ओमन ला चिन गईस।

अपन भाई मन कर जांच परख करीस की ओमन बदलीन हे की नही, युसुफ हर ओमन जग कहीस “तुमन कर भाई युसुफ लागों, झईन डरावा, जे घरी तुमन मोके गुलाम बनाएके बेच देहे रहा तुमन गलत करे रहा। लेकिन परमेसवर हर ओ गलती ला अच्छाई में बदल देहीस। अझेर तुमन अपन परिवार मन कर संगे मिस्र में रहे बर आए जावा। में तुमन कर परिवार ला समभाएल लेहु।

जे घरी युसुफ कर भाई मन अपन घरे फिर आईन अऊ ओमन अपन दाऊ याकूब जग बताईन की युसुफ जियत हवे। ते घरी याकूब ढ़ेरेच फुरुमा़ होईस।

आखिर याकूब सियान होए गाए रहीस। ओ अपन जम परिवार मन कर संगे मिस्र में चएल गईन अऊ सब कोई ऊहाँ रहे लागीन। याकूब हर मरे कर आगु अपन सब बेटा मन ला आसीस वचन देहीस।

जे बात जबान अऊ आसीस वचन ला परमेसवर हर अबराहम ला देहे रहीस ओहर आगू इसहाक में फेर याकूब में अऊ अब याकुब कर बारह बेटा अऊ ओमन कर परिवार में आए गईस। एही बारह बेटा कर लईका छउवा मन ले इसराईल कर बारह गोत्र बनीन।

A Bible story from: Genesis 37-50

9. परमेसवर हर मूसा ला बलाईस

यूसुफ कर मरे कर पाछू जमेच सगा सबंधी मन मिस्र में रहे लागीन अऊ ओकर सन्तान ढेरच बचर ले ऊहाँ रहिंन अऊ ओमन कर ढेरच बगरा लईका छऊआ होईन। ओमन ला इसराइल बलायें लागीन।

सौ बच्छर कर बाद इसराईल मन कर जिनती ढ़ेरेच होए गए रहिस। मिस्री मन यूसुफ अऊ ओकर भलाई ला बिसेर गईंन। ओमन ईसराईली मन जग ले डराये लागीन काबर की ओमन गिनती में ढ़ेरे बगरा होए गए रहीन। एकरले जे फीरोन हर ओ घरी राएज करत रहिस ;ओहर इसराइल मन ला मिस्री मन कर गुलाम बनाईस।

मिस्री मन इसराईल मन ला मजबूर करीन की ओमन बरीक ओमन मान मनिसा कर घर ला अऊ शहर ला बनाये। ऐतेक जियाएन काम कर चलते इसराईली मन कर जीवन हर ढ़ेरेच दुःखी होए गईस लेकिन परमेसवर हर ओमन ला आसिरवाद देहीस, अऊ ओमन कर गिनती हर बढ़ते गईस।

फिरौन हर देखिस की इसराईली मन कर ढ़ेरे अकन लईका होअथे। तेकर ले ओहर आगियां देहिस की जम इसराइली मन कर जनमते बेटा लईका मन ला नील नदी में फ़ेंक के मरुवाए दें।

एक इसराइली स्त्री हर एक ठे बेटा लईका ला जनम देहीस। ओ लईका कर दाई दाऊ मन जेतैंक दिन ले लईका ला लुकाये सकत रहिंन ओतना दिन तक लुकाये के राखीन।

जे घरी लईका कर दाई दाऊ मन ओके लुकाये नई सकीन, ते घरी ओमन लईका ला एक ठे टुकनी में सुताएके के नील नदी कर पानी में काँएस कर मंझारे छोड़ देहींन की ओ मरे ले बांएच जाये। ओकर बढ़का बहिन हर देखत रहिस की ओकर संगे का होहीं।

फिरोन कर बेटी हर अस्नान करे गए रहीस त ओ टोकरी ला देखके ओकर भीतरी झांकीस। त ओमे लईका ला देखिस अऊ अपन बेटा कहिके अपन जग राएख लेहीस। लईका कर देख रेख करे बर ओहर एक ठे इसराइली स्त्री ला राखीस, ओहर नई जानत रहीस की ए स्त्री हर लईका कर दाई लागे। जे घरी लईका हर बाढ़ गईस अऊ अपन दाई कर दूध पीये बर छोड़ देहीस, तेही घरी ओ स्त्री हर लईका ला फिरौन कर बेटी ला दे देहीस। ओहर ओकर नाव मूसा राखीस।

एक दिन कर दिन में मूसा जवान होए गईस त ओहर एक मिस्री ला देखीस की ओहर एक ठे इसराइली गुलाम ला माराथ हवे। मूसा हर अपन संगी इसराएली ला बचाये बरीक गईस।

मूसा हर ओ मिस्री ला माएर दारीस अऊ गाड देहीस। ओहार सोचिस कि कोई ओके नई देखत हवे लेकिन कोई मूसा ला एकस करत देखे रहीस।

जे घरी फिरौन हर सुनीस की मूसा का करीस हवे, त ओमन ओके मारे बर करे लागिन। मूसा मिस्र ले भाएग गईस अऊ रेगिस्तान मतलब बालुए बालू कर भुय्या में चल देहीस जिंहा ला ओहर फिरौन कर सिपाही मन ले बांएच के बढ़िया ले सही सलामत रह सके।

मिस्र ले दुरिहा जंगल में मूसा चरवाहा बन के रहे लगीस ओहर ऊहाँ ला एक स्त्री जग विहाओ करीस अऊ ओमन कर दुई गोट लईका होईस।

एक दिन मूसा भेड़ मन ला चरावत रहीस ते घरी झाड़ी में आगी बरत देखिस। लेकिन ओ झाड़ी हर जएर के राख नई होअत रहिस। मूसा हर ओ झाड़ी ला देखे बर गईस। जे घरी ओ झाड़ी जग पहुंचिस तेही घरि परमेसवर कर गोईठ ला सुनिस। परमेसवर हर मूसा ला कहीस "मूसा, अपन जूता ला उतार दे, तैंए जेजग ठढोए हस ओजग कर भुईया हर पवितर हवे."

परमेसवर हर कहिस “मैं अपन आदमी मन कर दुःख ला देखे हवों। मैं तोके फिरौन जग भेजहुँ की तैं इसराईली मन ला मिस्र कर गुलामी ले छोंडाए के लान बे। मैं तोके कनान देस ला देहूं जे देस ला मैं अब्रराहम, इसहाक अऊ याकूब ला देहे बर जबान करे हवों। ”

मूसा हर पूछिस कि "लोग मन मोर जग पूँछहीँ की कोन तोके भेजीस हवे, त मैं का कहूँ?" परमेसवरकहिस "मैं जो हवों सो हवों" ओमन जग कहबे “मैं हवों ने मोके तुमन जग भेजिस हवे। ओमन जग अइसे भी कहबे कि मैं यहोवा परमेसवर हवों तुमन कर पुरखा, अबराहम, याकूब अऊ इसहाक कर परमेसवर । "मोर एही नाव सब घरी रही।

मूसा डराये गईस अऊ फिरौन जग जाये बर नई करत रहिस। काबर की ओ सोंचिस की मैं बढ़िया ले गोठियाए नई सको, एकरले परमेसवरहर मूसा कर भाई हारून ला ओकर मदेत करे बर भेजीस। परमेसवर हर मूसा अऊ हारून ला चेताये देहीस की फिरौन ढीठ होए जाही।

A Bible story from: Exodus 1-4

10. दस भऊर

मूसा अऊ हारून फिरौन जग गईन अऊ कहिन "इसराईल कर परमेसवर कहत हवे, मोर लोग मन ला जाये दे”। फिरौन हर ओमन कर बात ला नई मानीस। इसराईली मन ला जाये नई देहिस ओमन जग अऊ ढ़ेरे जियायेन बूता करवाईस।

फिरौन हर इसराईली मन ला छोंड़े बर नई करत रहिस। तेकर ले परमेसवर हर मिस्र में दस ठे भऊर ला भेजीस। ए भऊर कर चलते परमेसवर फिरौन ला देखाईस की, परमेसवर फिरौन अऊ मिस्र कर जम देवता ले ढ़ेरे शक्तिशाली हवे।

परमेसवर नील नदी ला लहू बनाये देहीस। लेकिन फिरौन इसराईली मन ला छोड़ेबर तियार नई होईस।

परमेसवर जमेच मिस्र में बेंकचा ला भेजीस। फिरौन मूसा जग हाँथ जोड़ीस की बेंकचा ला भगाये दे। लेकिन जम बेंकचा कर मरे कर बाद फिरौन अपन मन ला कठोर करिस अऊ इसराईली मन ला मिस्र ले जाये नई देहीस।

परमेसवर बर्रो कर भऊर ला भेजीस। फिरौन हर मूसा अऊ हारून ला बलाये के कहिस ए भऊर ला रोक देहीं तब ओ ईसराईली मन ला मिस्र ले जाये देही। जे घरी मूसा बिनती करीस परमेसवर हर जम बर्रों मांछी ला मिस्र ले हटाये देहीस। लेकिन फिरेच फिरौन अपन मन ला कठोर कर देहीस, अऊ ईसराईली मन ला नईच जाये देहीस।

फेर परमेसवर मिस्र कर जम पोसल जानवर मन कर ऊपर रोग भेज के माएर दारिस। लेकिन फिरेच फिरौन कर मन हर कठोर रहिस अऊ ओहर इसराईली मन ला छोंड़े बर तियार नई होईस।

फेर परमेसवर मूसा जग कहिस की फिरौन कर आगु में चटिक अकन राख ला लेके हवा में उडवाओ। जे घरी मूसा उसने करिस तेघरि जमेच मिस्री मन कर ऊपरे दुःखदाई घाव आईस। लेकिन इसराईली मन कर ऊपरे नई आईस। परमेसवर हर फिरौन कर मन ला कठोर कर देहीस, अऊ फिरौन इसराईली मन ला अजाएद नई करीस।

तेकर पाछू, परमेसवर हर कारा ला गिराईस जेमे मिस्री मन कर खेत कर फसल हर मर गईस। अऊ जे लोग मन घर ले बहरी निकले रहीन ओहू मन मर गईन। फिरौन मूसा अऊ हारून ला बलाईस अऊ कहीस, "मैं पाप करे हवों। तुमन जम कोई जाए सकत हा"। मूसा हर बिनती करिस अऊ बदरी ले कारा हर गिरे बर रुक गईस।

लेकिन फिरौन फिरेच पाप करिस अऊ अपन मन ला कठोर करिस अऊ ओहर इसराईली मन ला छोडे बर नई चाहीस।

एकरले परमेसवरहर फम्फा कर घुल ला मिस्र में भेजिस कि जे खेत कर फसल हर कारा ले बॉएच गए रहिस ओला फम्फा हर नास करिस।

फेर परमेसवर अंधार ला भेजिस, जेहर तीन दिन ले बने रहिस। अंधार हर ढ़ेरे जबरजस रहिस की मिस्री मन घर ले निकले नई पाईन। लेकिन जेजग इसराईली मन रहत रहिन, ओजग इंजोर रहिस।

नवो ठे भऊर कर पाछु भी फिरौन इसराईली मन ला नई छोडीस, फिरौन बात ला नई मानत रहिस। तेकर ले परमेसवरहर एकठे आखरी भऊर ला भजे कर विचार करिस की एकरले फिरौन कर मन हर बदल जाही।

A Bible story from: Exodus 5-10

11. पसह

परमेसवर हर फिरौन ला कहीस अगर ओ इसराईली मन ला जाए नई देहि तो, ओमन कर जम जेठ बेटा मन ला अऊ जेठ बछवा मन ला मार दार ही। ऐ गोईठ ला सुन के फिरौन हर परमेसवर कर ऊपरे बिसवास नई करीस न ओकर आगियां ला मानिस।

परमेसवर हर एक ठे उपाय बनाईस की, जम घराना में एकठे शुद्ध मेमना ला निमारके पूजहीं, जे कोई ओमे बिसवास करही ओहर अपन जेठा ला बचाए लेहि।

परमेसवर हर इसराईली मन जग कहीस कि “ओ मेमना कर लहू ला लेके अपन दुरा कर चौखट में लगाए देइहा अऊ बिना अमटावल रोटी कर संगे मेमना कर मांस ला भुन्जके हालू हालू खईहा। परमेसवर हर ऐ भी कहीस कि मिस्र ला छोडके जाए बर तियार होएके ओला खईहा।

इसराईल मन ओ जम जाएत ला वैसने करिन, जेकस परमेसवर हर ओमन ला कहे रहीस। आधा राती परमेसवर हर जेमेच मिस्र कर जेठा लईका मन ला मार दारिस।

जम इसराईली मन कर घर कर दुरा कर चौखट में लहू लगावल रहीस, तेकर ले परमेसवर हर ओमन कर घर ला छोड़ देहीस। मेमना कर लहू कर चलते ओमन बांएच गईन अऊ घर कर भीतरी जम जन सुघरे सुघर रहीन।

लेकिन मिस्र कर आदमी मन परमेसवर कर ऊपर बिसवास नई करिन, अऊ न ओकर आगियां ला मानीन। एकरले परमेसवर हर ओमन कर घर मन ला नई छोडीस। परमेसवर हर जम मिस्री कर जेठा लईका मन ला मार दारीस।

जम मिस्री मन कर जेठा लईका मन मर गईन, फिरौन कर जेठा लईका ले लेके जेहल में हुरकल कैदी मन कर जेठा लईका मन तक मर गईन। मिस्री मन ढ़ेरे दूख कर चलते, बिलक बिलक के रोवत रहिन।

ओही रात के, फिरौन हर मूसा अऊ हारून ला बलुवाईस अऊ कहिस इसराईल मन ला मिस्र ले हालू निकाल के ले जा अऊ मिस्र कर आदमी मन भी इसराईल मन ला हालू हालू निकले बर कहीन।

A Bible story from: Exodus 11:1-12:32

12. निर्गमन

मिस्र ला छोंएड़ के जाये में इसराईली मन ढ़ेरेच फुरमा होइन। ओमन अब गुलाम नई रहीन, ओमन बात जवान कर देस में जात रहीन। इसराईली मन जे जाएत मिस्री मन जग मांगीन, मिस्री मन ओ जम जाएत इसराईली मन ला दे देहिंन। इहाँ तक की ढ़ेरे अकन सोना, चांदी अऊ ढ़ेरे सुघर समान ला देहीन। परमेसवर कर ऊपर बिसवास करके चटिक अऊ देस कर लोग मन इसराईली मन कर संगे मिस्र ले निकलीन।

परमेसवरहर ओमन कर आगु आगु दिन में बदरी कर खूंटा बनके अऊ राती में आगी कर खूंटा बनके चलत रहिस। परमेसवर हर सब घरी ओमन कर संगे रहीस अऊ ओमन कर रेगाई में ओमन ला डगर देखावत रहिस। इसराईली मन ला परमेसवर कर पाछु पाछु चले बर रहीस।

चटीक दिन में फिरौन अऊ ओकर लोग मन कर मन हर बदलीस अऊ ओमन फिरेच इसराईली मन ला अपन गुलाम बनाये बर चाहींन। परमेसवर हर फिरौन ला जिदहा बनाईस की लोग मन समझें की यहोवा ही एक ठे सच्चा परमेसवरहवे, अऊ ए बात ला भी जानें की यहोवा परमेसवरफिरौन अऊ ओकर सब ईस्वर ले ढ़ेरेच सामर्थी हवे।

एकरले फिरौन अऊ ओकर सिपाही मन इसराईली मन कर पिछु पिछु गईन की फिरेच ओमन ला गुलाम बनाएं। जेघरि इसराईली मन मिस्र कर सिपाही मन ला आवत देखींन, ते घरी ओमन समझ गईंन की ओहर फिरौन कर सिपाही लागें अऊ लाल सागर कर मंझार में हमरे फंस चुके हवन। ओमन ढ़ेरे डराये गईन अऊ चिकरे लागीन, “हमरे मिस्र ला काबर छोड़ देहेंन? हमरे मरे वाला हवन”।

मूसा हर इसराईली मन जग कहिस "डरावा मत "परमेसवरआएज तुमन बरीक लड़ही अऊ तुमन ला बचाही। " फेर परमेसवर हर मूसा जग कहिस कि "लोग मन जग कह की ओमन लाल सागर कती आगू बढे"।

फेर परमेसवर हर बदरी कर खूंटा ला हटाईस अऊ ओला इसराईली अऊ मिस्री मन कर मँझारे राखीस। तेकर मिस्री मन इसराईली मन ला देखे नई पाईन।

परमेसवर हर मूसा जग कहिस की ओ अपन हाँथ ला समुन्दर कती बड़ाए अऊ पानी ला दुई भाएग करे। परमेसवर हर धुका ला चलाये के समुंदर कर पानी ला जवनी अऊ डेरी कती ढ़केल देहीस, तेकर समुन्दर कर मंझारे एक डगर बन गईस।

इसराईली मन समुन्दर कर मंझारे झुरा भुंइया में रेंग के निकलीन अऊ पानी कर बड़खा दीवार ओमन कर दुनों कती बन गईस।

फेर परमेसवर हर बदरी कर खूंटा ला हटाईस। तेघरि मिस्री मन देखिन की ईसराईली मन निकलथे, ओहि घरि मिस्री मन सलाव करीन की “चला इसराईली मन कर पीछा करीन”।

मिस्री मन समुन्दर कर डगर ले इसराईली मन कर पीछा करे लागीन, लेकिन परमेसवर हर ओमन कर रथ ला बालू में धसाये देहीस अऊ ओमन ढ़ेरेच डराये गईन। ओमन किरलाए के कहिन "भागा" परमेसवर इसराईली मन कती ले लड़ाई लड़त हवे।

जे घरी जम इसराईली मन सुघरे सुघर समुन्दर कर ओपार पहुचींन, पमेसवर मूसा जग कहिस अपन हाँथ ला फेर से समुन्दर कती बढ़ा। जे घरी मूसा अपन हाँथ ला समुन्दर कती बढ़ाईस, पानी अपन जगहा में फिर के आए गाईस अऊ जमेच मिस्री सिपाही मन पानी में बूईड के मर गईन।

जे घरी इसराईली मन देखीन की जमेच मिस्री मन मर गईन, ते घरी ओमन परमेसवर पर भरोसा करीन अऊ बिसवास करीन की मूसा परमेसवर कर अगमजानी हवे।

इसराईली मन ढ़ेरेच फुरमा होए के ख़ुशी मनाये लागीन, काबर की परमेसवर हर ओमन के मरे ले अऊ गुलामी ले बचाये लानीस। अब ओमन परमेसवर कर सेवा करे बर आजाद रहीन। इसराईली मन दुसर दुसर गीत ला गाए के अपन आजादी ला मनाये लागीन अऊ परमेसवर कर स्तूती करे लागीन काबर की परमेसवर ओमन ला मिस्री सिपाही मन ले बचाये रहीस।

परेमेसवर हर इसराईली मन ला आगियां देहीस की ओमन सब बछर कर तिहार ला मानें अऊ सुरता करे की परमेसवर हर ओमन ला कोन कस करके मिस्री मन जग ले जीत देवाए रहीस अऊ गुलामी ले बचाये रहीस। एक निरदोष मेमना ला पूज के ओला अमटावल रोटी कर संगे खाये बर फसह कर तिहार ला मानत रहीन।

A Bible story from: Exodus 12:33-15:21

13. इसराएली मन कर संगे परमेसवर कर जबान

परमेसवर हर ईसराईली मन ला लाल सागर जग ले ले जाए कर पाछू, ओमन बलुआही भुईया ले रेंग के सीनै पहार जग पहुंचीन। ए ओही पहार रहीस, जीहां ला मूसा हर जरत भुंदरा ला देखे रहीस। पहार जग लोग मन अपन तम्बू ला लगाईन।

परमेसवर मूसा अऊ इसराईली मन जग कहिस, "तुमन अगर मोर आगियां ला मानिहा अऊ मोर बात जबान ला राखीहा, त तुमन मोर निज धन, याजकों कर समाज अऊ पवितर जाति ठहरिहा"।

तीन दिन कर पाछु, जे घरी लोग मन अपने ला आत्मिक रूप ले तियार करीन, ओही घरी परमेसवर सीनै पहार में गड़गड़ाहट, बिजली, धुंआ अऊ तुरही कर आवाज कर संगे उतेर आईस। एकेझे मूसा पहार में चढ़के जाए सकत रहीस।

फेर परमेसवर हर ओमन जग बात जबान करिस अऊ कहीस "मैं यहोवा तुमन कर परमेसवरहवों, जेहर तुमन ला मिस्र कर गुलामी ले बचाईस हवे, तुमन दूसर ईसवर कर आराधना झईन करीहा"।

"मूर्ति झईन बनईहा अऊ ओकर कर आराधना झईन करीहा, काबर की मैं यहोवा जलन रखे मधे परमेसवर हवों। मोर नाव ला बीनकाम कर झईन लेईहा। सबत कर दिन ला पवितर मानीहा। एकर मतलब हवे की हप्ता भर छव दिन तुमन काम कर सकत हवा अऊ सातवाँ दिन तुमन बर बिसोए कर अऊ मोके सुरता करे कर दिन होहीं।

"अपन दाई दाऊ कर आदर करीहा। हत्या झईन करीहा। व्यभिचार झईन करीहा। चोरी झईन करीहा। झूठ झईन बोलीहा। अपन पड़ोसी कर परानी कर लालसा झईन करिहा, न ओकर घर कर अऊ ओकर कांहिच, धन दौलत, कर लालसा झईन करीहा"।

"अपन दाई दाऊ कर आदर करीहा। हत्या झईन करीहा। व्यभिचार झईन करीहा। चोरी झईन करीहा। झूठ झईन बोलीहा। अपन पड़ोसी कर परानी कर लालसा झईन करिहा, न ओकर घर कर अऊ ओकर कांहिच, धन दौलत, कर लालसा झईन करीहा"।

परमेसवर हर इसराईली मन ला एगोठ तम्बू बनाये बर समझाईस जेला ओमन के बनाये बर रहिस। एला मिलन कर तम्बू कहींन। एकर दुईठे बंगीरा रहीस। जेला एकठे बड़खा परदा लगाये के बांटे रहीन। परदा कर पीछू कर बंगीरा में एक झे महायाजक जाये सकत रहीस, काबर की परमेसवर ऊहाँ रहत रहीस।

जे कोई हर परमेसवर कर कानून ला तोड़ही ओहर मिलन कर तम्बू कर आगु कर वेदी में पूजे बर एकठे जानवर ला लानही। याजक ओ जानवर ला पूज के ओला वेदी में जलाया देहत रहीस। ओ जानवर कर लहू ओ आदमी कर पाप ला ढांएप के ओके परमेसवर कर आगु में शुद्ध ठहरात रहिस। परमेसवर हर मूसा कर भाई हारून अऊ ओमन कर लईका मन ला याजक बने बर चुनीस।

सबेच कोई परमेसवर कर आगियां ला मानेबर सलाव करीन, अऊ परमेसवर कर आराधना करे बर अऊ परमेसवर कर लोग होएबर सलाव करीन। लेकिन परमेसवर कर आगियां माने कर सलाव करेकर चटिक दिन कर बाद ओमन ढ़ेरेच बड़खा पाप कर दारीन।

कईयो दिन ले मूसा हर सीनै पहार में परमेंसवर कर संगे गोठियात रहिस। ओकर फेर आए कर जोहाई में लोग मन असकटाये गईन। ओमन अपन सोना ला हारून जग लाएन के अपन बरीक मूर्ति बनाये बर कहिन।

हारून हर सोना कर एकठे बछड़ा बनाईस। लोग मन बऊराहा कस होएके मूर्ति कर आराधना करे लागीन अऊ बकरा पूजे लागीन। ए पाप कर चलते परमेसवर ओमन ले ढ़ेरेच गुस्सा होईस अऊ ओमन ल मरवाये बर सोंचिस, लेकिन मूसा हर ओमन बर बिनती करिस, परमेस्वर हर ओकर बिनती ला सुनीस अऊ ओमन ला नई मरवाईस।

जे घरी मूसा पहार ले ऊतर के आईस अऊ ओ मूर्ति ला देखीस त ढ़ेरेच गुस्साए गईस अऊ ओ पट्टिया ला फ़ेंक के गुरी गुरी कर देहीस, जेमे परमेसवरहर दस ठे आगियां ला लिखे रहीस।

फेर मुसा हर ओ। मूर्ति ला टोएर के धुर्रा कस बनाये देहीस अऊ ओला पानी में मेराये के लोग मन ला पियाईस। पमेसवर हर ओमन कर ऊपरे एक भऊर ला भेजीस अऊ ढ़ेरे अकन लोग मन मएर गईन।

मूसा पहार में फेर चढ़ गईस अऊ परमेसवरजग बिनती करीस की ओमन कर पाप ला छमा करे। परमेसवरहर मूसा कर बात ला मानीस अऊ ओमन ला माफ करीस। मूसा ओ दस आगियां ला पखना कर नावा पटरी में लिखीस। फेर परमेसवर हर इसराईली मन ला सीनै पहार ले बात जबान कर देस कती ले गईस।

A Bible story from: Exodus 19-34

14. बलुवाही भूइया में भूलाईन

परमेसवर हर इसराईली मन ला जम आगियां ला, देहे कर पाछू जेला ओमन के माने बर रहीस ओमन सीनै पहार ले निकल के जात रहीन। परमेसवरओमन ला बात जबान कर देस कती ले गईस जेला कनान कहथे, परमेसवर ओमन कर अगुआई करत रहीस। बदरी कर खूंटा हर ओमन कर आगु आगु चलीस अऊ ओमन पीछू पीछू चलते गईन।

परमेसवर हर अबराहम, इसहाक अऊ याकूब जग कहे रहीस की बात जबान कर ओ जगह ला देहुँ, लेकिन अभीन ऊहाँ ढ़ेरे अकन लोग रहत रहीन। ओमन कनानी आदमी कहात रहीन। कनानी मन परमेसवर कर अराधना नई करत रहींन अऊ परमेसवर कर आगियां ला नई मानत रहीन। ओमन झूठा ईशवर कर अराधना करत रहीन अऊ ढ़ेरे बगरा बुरा काम करत रहीन।

परमेसवर हर इसराईली मन जग कहीस बात जबान कर देस ले जम कनानी मन ला तुमन के भगायेक परही। ओमन कर संगे दोस्ती झईन करिहा अऊ ओमन कर संगे विहाओ झईन करिहा। ओमन कर जम मूर्ति ला नाश कर देईहा। अगर मोर बात ला नई मनीहा, ते घरी तुमन मोके छोड़ के मिस्री मन कर मूर्ति मन कर अराधना करे लागिहा।

जे घरी इसराईली कनान देस कर सिवान में पहुचींन, मूसा हर बारह आदमी इसराईल कर सब गोत्र ले चुनीस, ओहर ओमन ला कहीस की ओ देस में जाएके पता लगायें की ओ देस हर कईसन हवे। ओमन ला ओ कनानी मन कर भी हाल चाल जाने बर कहीस की ओमन बलवान हवे की कमजोर हवे।

चालीस दिन तक कनान देस ला बुले कर पाछू, ओ बारह आदमी मन फिर के आईन। ओमन लोग मन जग कहींन "ओ देस हर ढ़ेरेच उपजाऊ अऊ फसल से भरपूर हवे"। लेकिन खबरिया में ले दस झे मन कहीन "ऊहाँ कर शहर हर बजर हवे अऊ ऊहाँ कर आदमी मन दानव हवे अगर हमरे ओमन जग लड़ाई करबो त हमरे हाएर जाबो अऊ ओमन हमके माएर दारहीं।

फेर दुई ठे अऊ खबरिया कालेब अऊ यहोशू हर कहीस "एहर सच हवे की कनान कर आदमी मन रोंट अऊ बलवान हवें, लेकिन हमरे पक्का ओमन ला हरवाये देबो। परमेसवर हमर बरीक लड़ही। "

तेकर लोग मन कालेब अऊ यहोशू कर नई सुनीन। ओमन मूसा अऊ हारून जग गुस्साये के कहे लागीन, "तुमन हमके मन ला ए डरडरावेन जगहा में काबर लाना? हमरे मिस्र में ही रहे रहतेंन, इहाँ तो हमरे मन लड़ाई में मारे जाब अऊ हमर परानी, लईका, छुऊआ मन ला बधुंआ बनाये लेहीं। ” एकरले लोग मन अपन बरीक एकठे दूसर अगुवा चुइन के मिस्र में फिर जाएकर गोईठ ला जोठियाए लागीन।

परमेसवर हर ढ़ेरेच बगरा गुस्साये गईस अऊ मिलन कर तम्बू में आए गईस। परमेसवर हर कहीस, "तुमन मोर विरोध में धोखा करे हवा, तुमन मोर बात ला नई माने हा, एकरले यहोशू अऊ कालेब कर छोंड़ तुमन जम झेला बलुआही भुईं में बुलेक परही। बीस बछर कर ले ऊपर कर जेतेक भी लोग हवे ओमन सब बलुआही भुईंया में मरहीं, बात जबान कर देस में जाये नई पाहीं।

जे घरी लोग मन ए गोईठ ला सुनीन त ढ़ेरेच उदास होए गईन, काबर की ओमन पाप करे रहीन। फेर ओमन अपन हथियार मन ला धईर के कनान कर लोग मन जग लड़ाई करे बर निकलीन। मूसा हर ओमन ल चेताये के कहिस की झईन जा काबर की परमेसवर ओमन कर संगे नई रहीस, तबोले ओमन ओकर गोईठ ला नई मानिन।

परमेसवर ओमन कर संगे लड़ाई में नई गईस। एकरले ओमन हाएर गईन। फेर इसराईली मन कनान कती ले फिरके बलुआही भुईया में चालीस बछर ले एते ऊते किन्दरत रहीन।

चालीस बछर ले ईसराईली मन बलुआही भुईंया में इते उते किन्दरत रहीन, परमेसवरओमन कर जरूरत ला पुरा करीस ओहर ओमन ला सवरग कर रोटी देहीस, जेला "मन्ना" कहत रहीन। परमेसवरओमन कर तम्बू में बटेर नाव ला चेराई ला भेजिस की ओमन मांस खाये सकें। ए बछरों में परमेसवरहर ओमन कर जूता अऊ कपडा ला पुराना होए नई देहीस।

पमेसवर हर चमत्कार कर के चटान ले पानी देहीस। ए सब जाएत कर पाछू भी, इस्राईली लोग मन इते ऊते कर गोईठ गोठियात रहीन। तबोले परमेसवर अपन बात जबान जेला कहे रहीस ओमे बिसवास योग्य रहिस, जेला अबराहम, याकूब अऊ इसहाक जग करे रहीस।

एक दुसर दिन जे घरी लोग मन जग पानी नई रहीस, परमेसवर हर मूसा जग कहिस, " चट्टान जग गोठियाओ, अऊ ओमे ले पानी निकेल आही। " लेकिन मूसा चट्टान जग गोठियाये कर बदले लाठी से चट्टान ला दुई दायर मारिस, अऊ चट्टान ले पानी निकल गईस। मूसा परमेसवर कर आगियां ला नई मनीस। परमेसवर मुसा जग गुस्साए गईस, अऊ कहीस "तुमन अब बात जबान कर देस में जाये नई पईहा”।

चालीस बछर ले जे घरी इसराईली मन बलुआही भुईया में बुलत रहीन। ते घरी जेमन परमेसवर कर आगियां ला नई मानीन ओ जम झन मन मएर गईंन। फेर परमेसवरहर बाँचल लोग मन ला बात जबान कर देस कती ले गईस। मूसा ओ घरी ढ़ेरे सियान होए गए रहिस, तेकर परमेसवरहर लोग मन कर तिहा करे बर यहोसू ला चुनीस। अऊ परमेसवर हर आगु मुसा जग कहे रहीसकी “तोरे संहीक एकठे भविसवक़्ता ला भेजहूँ”।

फेर परमेसवर हर मूसा जग कहीस की “ओमन पहार कर ऊपर जायें, जीहां ले तुमन बात जबान कर देस ला देख सखीहा”। मूसा हर बात जबान कर देस ला देख लेहीस, लेकिन परमेसवर ओमन के ऊहां जाए नई देहीस। जे घरी मूसा मर गईस ते घरी इसराईली मन मूसा बरीक एक महीना ले रोअत रहीन। यहोसू ओमन कर नावा अगुवा बनीस। यहोसू सुघर अगुवा रहिस, काबर की ओहर परमेसवर कर ऊपर भरोसा करत रहीस, अऊ परमेसवर कर आगियां ला मानत रस।

A Bible story from: Exodus 16-17; Numbers 10-14; 20; 27; Deuteronomy 34

15. बात जबान कर देस

अखिर में इसराईली मन ला कनान, मतलब बात जबान कर देस में, जाये कर दिन आये गईस। यहोसू हर दुईठे खबरीहा ला यरीहो नाव कर कनानी शहर में भेजिस्, जेकर पहरा करे बर बड़खा अकन दीवार बने रहीस। ओ शहर में रहाब नाव कर वेश्या रहत रहीस, जेहर खबरिया मन ला लुकाईस अऊ ओमन ला बचाये में मदत करीस। परमेसवर पर बिसवास करके ओ स्त्री हर ए काम ला करीस। खबरीया मन स्त्री ला जबान देहीन की जे घरी इसराईली मन यरीहो ला नाश करही ओघरी रहाब अऊ ओकर परिवार ला बचाहीं।

ईसराईली मन ला यरदन नदी ला नाएक के बात जवान कर देस में जाये बर रहीस। परमेसवरहर यहोसू जग कहीस याजक मन ला आगू जाये दा। "जे घरी याजक मन यरदन नदी में हलकीन, त ऊपर बाट ले जे पानी हर आवत रहिस, ओहर रुक गईस अऊ ईसराईली मन झुर्रा भुईंया ले रेंगके नदी कर ओपार पहुंचीन।

जे घरी लोग मन यरदन नदी ला नाएक दारीन, ते घरी परमेसवर हर यहोसू ला बताईस की कोन कस यरीहो कर शक्तिशाली शहर में हमला करे बर हवे। लोग मन परमेसवर कर आगियां ला मानीन जेकस परमेसवर हर करे बर कहे रहिस, याजक मन अऊ सैनिक मन यरीहो कर चारिओ कती दिन में एक दाएर किन्दरिन, एही कस छव दिन तक करीन।

फेर सात दिन ले इसराईली मन शहर कर चारियों कती सात दाएर किन्दरिन, तेही घरि याजक मन अपन तुरही ला फूंकीन अऊ सैनिक मन जय जयकार करीन।

तेघरि यरीहो कर चारियो कईत कर दीवार हर गिर गईस। इसराईली मन ओ शहर कर जम जाएत ला नास करिन, जेकस परमेस्वर हर इसराईली मन ला आगियां देहे रहिस। ओमन एकठे रहाब अऊ ओकर परिवार ला बचाईन, ओमन इसराईली मन जग मेराये गईन। कनान कर रहोईया अऊ झेमन सुनीन की इसराईली मन कनान ला कईसे नास करीन त ओमन ढ़ेरेच डराये गईन कि कहों इसराईली मन ओमन कर ऊपरे तो हमला नई कर देहीं।

परमेसवर हर इसराईली मन ला आगियां देहिस की कनान में काहीं जाएत कर आदमी मन जग मेलमिलाप झईन करीहा। लेकिन कनान कर अऊ झेमन जेमन गिबोन कर रहोइया रहीन, ओमन यहोसू जग झूठ बोलीन अऊ कहींन कि हमरे दुरिहां ले आए हवन। ओमन यहोसू जग बिनती करीन की ओमन कर संगे दोस्ती बनाये ले। यहोसू अऊ इसराईली मन परमेसवर जग नई पुछिन की ओमन कहाँ ले आईन हवें अऊ यहोसू ओमन जग दोस्ती बनाये लेहीस।

जे घरी इसराईली मन ला पता चलीस कि गिबोन कर रहोईया मन ओमन के धोखा देहीन हवे, इसराईली मन ढ़ेरेच गुस्साए गईंन। लेकिन इसराईली मन ओमन जग दोस्ती ला बनाये लेहीन काबर की ओहर परमेसवर कर आगु में बनावल दोस्ती रहीस। चटिक दिन कर पाछू, कनान कर रहोइया अमोरियों कर राजा मन ए बात ला सुनिन की गिबोन कर रहोइया मन इसराईली मन संगे दोस्ती बनाये लेहीन हवे। त ओमन अपन सेना ला जुटाये के गिबोन मन कर ऊपरे लड़ाई करे बर गईन। ते घरी गिबोन कर रहोइया मन यहोसू जग मदेत मांगीन।

ते घरी यहोसू हर इसराईली सेना मन ला एक जगहा जुटाईस अऊ राएत भर रेंग के गिबोन पहुंचीन। भिनसरहा जुआर अमोरी मन ला डरुहावत ओमन कर ऊपर हमला करीन।

परमेसवरहर ओ दीन इसराईली मन बर लड़ाई लडीस। परमेसवर हर अमोरी मन जग अइसन करीस की ओमन इसराइली मन जग ले घबराए गईन अऊ नगदेच अमोरी मन ला परमेसवर हर बदरी ले कारा गिराएके माएर दारिस।

परमेसवरहर बदरी में बेर ला एक जगहा में ठडुवाये देहीस की इसराईली मन जग पूरा समय रहे की ओमन समूचा अमोरी मन ला नास करें ओ दिन परमेसवर हर इसराईली मन ला बड़खा जीत देवाईस।

जे घरी परमेसवर इसराईली सेना मन ला हरवाये देहीस, कनान कर अऊ लोग मन मिलके इसराईली सेना मन कर विरोध में आए गईन। यहोसु अऊ इसराईली मन ओमन ऊपर हमला करके ओमन ला माएर दारीन।

ए लड़ाई कर पाछू परमेसवरहर बात जबान कर भुईया में सब गोती कर लोग मन ला ओमन कर अपन अपन हिस्सा बांटा देहीस। फेर परमेसवर हर इसराईली मन कर सीवान में सांती देहीस।

जे घरी यहोशु सियान होए गये रहीस ते घरी ओहर इसराईल कर जम लोग मन ला जुटाईस। फेर यहोशू हर इसराईली मन ला सुरता कराईस की ओ परमेसवर कर संगे सीनै पहार में जबान करे रहीस की ओमन ला परमेसवर कर आगियां ला आने बर हवे। लोग मन जबान देहीन की ओमन परमेसवर कर बिशवासी रहीं ओकर आगियां ला मानहिं।

A Bible story from: Joshua 1-24

16. छोड़ाये दार

जे घरी यहोशू मर गईस, तब इसराईली मन परमेसवर कर आगियां ला नई मानीन अऊ कनान कर दूसर रहोईया मन ला नई भगाईन जेकस परमेसवरहर ओमन ला कहे रहीस। इसराईली मन सच्चा परमेसवर यहोवा कर आराधना करे बर छोंड़ देहीन अऊ इसराईली मन कनानी देवता मन कर आराधना करे लगीन।

परमेसवर कर कर बात ला नई मानीन तेकर चलते परमेसवरहर हर इसराईली मन ला सजा देहीस अऊ ओमन कर दुश्मन मन ला ओमन कर ऊपरे जीत देवाईस। ओमन कर दुश्मन मन चोरी करीन, सम्पति, अऊ धन कर बिदिर विनास करीन अऊ नगदे झन मन ला मारियो दारीन। नगदे बछर ले दुश्मन मन कर उपद्रो ला सहे कर पाछू अऊ परमेसवर कर आगियां ला नई माने कर पाछू, इसराईली मन गलती करके ढ़ेरेच पछताईन अऊ परमेसवर जग छोड़ाये बरीक बिनती करीन।

फेर परमेसवर हर एकठे छोंड़ाये दार ला भेजीस, जेहर ओमन के अपन दुश्मन मन जग ले बचाईस अऊ देस में सांती लानीस। तेकर फिरेच ओमन परमेसवर ला बिसेर गईन अऊ मूर्ति पूजा करे लागीन। एकरले परमेसवर हर इसराईली मन कर ठावें कर रहोइया मिदानी मन ला आगियां देहीस की ओमन इसराईली मन ला हरवाये।

मिदयानी इसराईली मन कर जम फ़सल ला सात बछर ले लूटत रहींन। इसराईली मन एतना डराये गईन की डर कर मारे माड़ा में लुकाए जात रहीन की मिदयानी मन खोजे झईन पावें। सबले पाछु ओमन परमेसवर ला गोहराईन की ओहर ओमन ला बचाये।

एक दिन कर दिन में गिदोन अपन धान ला ओधा में लुकाए के मिसत रहीस कि मिदयानी मन झईन देखें। यहोवा कर सवरगदूत गिदोन जग आईस अऊ कहीस, "हे बहंगर लडोईया, परमेसवर तोर संग हवे। जा अऊ इसराईली मन ला मिदयानी मन कर हाँथ ले छोड़ाए लान।”

गिदोन कर दाऊ हर मूर्ति बर एक ठे वेदी बनाये रहीस। परमेसवरहर गिदोन जग कहीस कि ओ वेदी ला पाएस दे। लेकिन गिदोन अपन लोग मन जग ले डरावत रहीस तेकर ले राएत भर रुके रहीस। फेर ओहर वेदी ला गिराये देहीस अऊ ओकर टुटका टुटका कर दारिस। ओ जुनहाँ वेदी कर जगहा में ओमन परमेसवरबर एक ठे नावा वेदी ला बनाईन अऊ ओमें बली चढाईन।

बिहान दिन लोग मन देखींन की कोनहर तो ओमन कर वेदी ला गिराये के पाएस देहीस हवे, ओमन ढ़ेरेच गुस्साये गईंन। अऊ ओमन गिदोन ला मारे बर ओकर घरे गईंन तेकर गिदोन कर दाऊ हर कहिस "तुमन काबर अपन ईशवर कर मदत करेक चाहत हवा? अगर ओहर ईशवर लागे त अपन रक्षा खुद नई करही।” ओकर ए गोईठ ला सुन के लोग मन गिदोन ला नई मारीन।

तेकर मिदयानी मन इसराईली मन जग चोराये बर फेर आईन। ओमन एतना बगरा रहीन की गने नई सकातिस। गिदोन हर इसराईली मन ला जुटाईस की ओमन कर संगे लडें। ओमन परमेसवर जग दुई ठे चिनहा ला मांगीन की ओमन के सही लाएग जाये की परमेसवर इसराईल ला छोड़ाये बर ओमन कर इस्तेमाल करत हवे कि नहीं।

गिदोन परमेसवरजग एगोठ चिन्हा ला मांगीस, भुईंया में ओढ़ना ला डसाये के परमेसवर जग कहीस "बिहान कर ओस ले केवल ओढ़ना हर भीजे भुईयायां हर नहीं। परमेसवरहर उसनेच करीस। । दूसर राती गिदोन हर फेर कहिस, भुईयायां हर भीज जाये ओढ़ना हर झुरा रहे। परमेसवरहर उसनेच करीस। ए दुई ठे चिन्हा ला देखके गिदोन ला बिसवास होए गईस कि इसराईली मन ला मिदानियों कर हाँथ ले छोंडाये बर परमेसवर ओके ईस्तेमाल करे वाला हवे।

३२,000 इसराईली सिपाही मन गिदोन जग आईन, त परमेसवरहर कहीस एमन ढ़ेरे अकन हवे। तेकर गिदोन हर २२,000 ला फिराये देहीस जेमन लड़े ले डरावत रहींन। परमेसवरहर गिदोन जग कहीस कि अझरो ले तोर जग ढ़ेरेअकन लोग हवे। एकरले गिदोन हर ३00, ला राएख के अऊ झे मन ला भेज देहीस।

ओही रात परमेसवर हर गिदोन जग कहीस "तैँ मिदयानी मन कर तम्बू जग जा अऊ ओमन कर गोईठ ला सुनबे”। ते घरी तोर डर हर भाएग जाही। तेकर ओही राती गिदोन तम्बू जग गईस अऊ एक मिदयानी सिपाही कर सपना ला सुनीस, जेहर अपन संग जग कहत रहीस। ओही आदमी कर संग हर कहीस "सपना कर अर्थ हवे कि गिदोन कर सेना हर मिदयानी सेना ला हरवाये देहीं”।

जे घरी गिदोन अपन सैनिक मन जग फिरके आईस, तेकर ओ सब झेला एक तुरही, एकठे मटका अऊ एकठे मसाल देहीस। ओमन मिदयानी मन ला चारियों कती ले छेंक लेहीन जिहां ओमन सुतत रहीन। गिदोन कर ३00 सिपाही मन कर मसाल मटका में रहीस एकरले मिदयानी मन ओमन कर मसाल कर बराई नई देख पाईन।

फेर गिदोन कर जम सैनिक मन एकेच संगे अपन मटका ला टोरिन, अऊ ओमन कर मसाल कर इंजोर हर दिखिस। अऊ अपन तुरही ला फूंकीन अऊ गोहार करीन "यहोवा कर तलवार अऊ गिदोन कर तलवार।"

परमेसवर हर मिदयानी मन में गड़बड़ी कर देहीस, ओमन अपने अपन एक दूसर झन ठे लड़े लागीन अऊ मारे लागीन, तेकर अऊ दूसर इसराईली मन ला भी घर ले बलाईन अऊ जमेच झे जुएट के मिदयानी मन ला भगाये देहीन। इसराईली मन ढ़ेरे अकन मिदयानी मन ला मारीन अऊ ओमन ला इसराईल कर देस ले भगाए देहींन। ओ दिन इस्राईली मन १, २0, 000 मिदयानी मन ला मारीन। परमेसवर हर इसराईल ला बचाये लेहीस।

लोग मन गिदोन ला राजा बनाए बर चाहत रहीन। लेकिन गिदोन हर ए बात कर आगियां नई देहीस। तेकरले ओहर इसराईली मन जग चटिक अकन सोना कर अंगूठी ला मांगीस, जेला ओमन मिदयानी मन जग ले लुटे रहींन। लोग मन गिदोन ला ढ़ेरे अकन सोना दे देहीन।

गिदोन हर सोना कर इस्तेमाल करके एक खास ओढ़ना बनाईस जेकस की महायाजक कर रहत रहीस। लेकिन लोग मन ओकर मूर्ति बनाये के आराधना करे बर शूरु कर देहींन। तेकरले परमेसवरहर ओमन ला सजा देहीस, काबर की ओमन मूर्ति पूजा करे लागीन। परमेसवर हर दुश्मन मन ला ओमन कर ऊपरे जीत देवाये देहीस। तेकर ओमन फेर से परमेसवर जग मदत मांगे लगीन, अऊ परमेसवरहर एक ठे छोड़ाये दार ला भेजीस।

ए तरीका ला ओमन बार बार दोहराईन। इसराईली मन पाप करत रहीन। फेर परमेसवरओमन ला सजा देहत रहीस। अपन करल पाप ला सोंच के गलती ला मानत रहींन, अऊ परमेसवरओमन बर एक छोड़ाये दार ला भेजत रहीस। एहीकस ढ़ेरे बछर ले कईझे छोड़ाये दार ला भेजीस, जेमन की इसराईली मन ला अपन दुश्मन ले बचाईंन।

सेबले पाछु लोग मन परमेसवर जग दूसर देस कस एकठे अइसनराजा ला मांगेग चाहत रहींन की ओ राजा हर बड़खा ऊँच अऊ ताकतदार रहे, जेहर ओमन कर लड़ाई में अगुआई करे। परमेसवरओमन कर ए विनती ला पतियाईस। तेकरले परमेसवरहर ओमन के एक ठे राजा देहीस जेकस ओमन मांगत रहींन।

A Bible story from: Judges 1-3; 6-8

17. दाऊद कर संगे परमेसवर कर जबान

शाऊल हर इसराईल कर शुरु कर राजा रहीस। ओहर रोंट अऊ सुन्दर रहिस, जेकस आदमी मन चाहत रहिन। ओहर एगोठ बढ़ीया राजा रहीस। परमेसवर कर गोइठ ला नई मानीस तेकर पाछु ओहर बदमाश आदमी बन गईस। एकरले परमेसवर हर एक दूसर आदमी ला शाऊल कर जगह में राजा बने बर निमारीस।

परमेसवर हर शाऊल कर पाछु राजा बने बर दाऊद नाव कर एकठे जवान आदमी ला निमारीस । दाऊद एकठे चरवाओ रहीस, अऊ बेतलेहेम गाँव कर रहोईया रहीस। दाऊद अपन दाऊ कर भेंड मन ला चराए अऊ पहरा करे। ओही मंझार में एक धाएर ओहर एगोठ बघवा ला अऊ दूसर धाएर एकठे भालू ला मारए गिराईस जेमन ओकर भेड़ मन ला धरत रहिन। दाऊद एक सीधा साधा अऊ धर्मी आदमी रहीस। जेहर परमेसवर कर ऊपर भरोसा करिस अऊ ओकर आगियां ला मानिस।

दाऊद एक ठे बड़खा ताकत दार अऊ अगुवा बनिस। जे घरी दाऊद जवान रहीस ओही घरी ओहर गोलियात नाव कर राक्षस जग लडिस। गोलियात एक नामी बलवान रहीस अऊ ढ़ेरे बजर अऊ करीबन तीन मीटर ऊँच रहीस, फेर परमेसवर हर दाऊद कर मदद करिस, कि ओहर गोलियत ला मारे अऊ इसराईल ला बचाये। ओकर पाछु इसराईल कर बैरि मन जग ले कइयो दाएर दाऊद हर जीते रहीस। तेकरले जम आदमी मन ओकर ढ़ेरे तारीफ करीन।.

शाऊल हर दाऊद ला इसगावत रहीस काबर कि आदमी मन ओकर जबर माएन करे लागीन। दाऊद ला कए धाँव ले शाऊल हर मारे कर उपाये करीस लेकिन दाऊद हर शाऊल ला देख के लुकाये जात रहीस। एक दिन कर दिन में शाऊल हर दाऊद ला मारे बर खोजत रहीस, शाऊल हर एक ठे माडा में गईस, जिहा दाऊद हर लुकाये रहीस लेकिन शाऊल हर ओके नई देखीस। दाऊद हर शाऊल कर ठाँवे में रहीस अऊ ओके माएर सकत रहीस, लेकिन ओके नई मारिस। एकर बदला दाऊद हर शाऊल कर ओड़ना कर धरी ला सबूत दिखाए बर काट लेहीस की राजा बने बर मैं कभों शाऊल ला नई मारहूँ।.

तेकर पाछु शाऊल हर लडाई में मर गईस, अऊ दाऊद हर इसराईल कर राजा बन गईस। ओहर एक बढ़िया राजा रहीस अऊ जम झन ओके मया करत रहिन। परमेसवर हर दाऊद ला आशिर्वाद देहीस अऊ ओके सफल बनाईस। दाऊद हर ढ़ेरे अकन लड़ाई लडि़स अऊ परमेसवर हर दाऊद कर मदेत करिस कि ओहर इसराईल कर दुश्मन मन ला हरूवाए देहत रहीस। दाऊद हर यरुशेलम देश ला अपन कब्ज़ा में कर लेहिस अऊ ऊहाँ अपन राजधानी बनाईस। दाऊद जे घरी इसराईल में राएज करे लागीस ते घरी इसराईल देश सामर्थी अऊ धनी देश बन गईस।

दाऊद हर परमेसवर बर एकठे मंदिर बनाऐ बर करत रहिस जिहा जम इसराईली मन परमेसवर कर आराधना करतीन अऊ ओमन ऊहाँ बली चढाए सकतीन। करीबन ४०० बछर ले आदमी मन परमेसवर कर आराधना अऊ बली चढाऐ बर अऊ भेंट करे बर तंबू में आत रहिन जेला मूसा हर बनावाए रहीस।

तबोले परमेसवर हर नाथान अगमजानी ला दाऊद जग एक संदेश देके भेजीस “तैं लड़ाई करेवाला आदमी रहे, एकरले तैं मोर बर मंदिर झइन बनाबे। तोर बेटा मोर बर मंदिर बनाही। लेकिन मैं तोके ढ़ेरे अकन आशिर्वाद देहूँ। तोर लईका में ले एक जन मोर लोग मन कर ऊपर सब घरी राएज करही, ओ बेटा मसीहा हवे। मसीहा हर परमेसवर कर चुनल जन हवे। जेहर दुनिया कर जम झन कर अपन पाप ले ओहर बचायेवाला रही।

जे घरी दाऊद हर ऐ गोईठ ला सुनीस त ओहर एकदम परमेसवर कर धन्यवाद अऊ स्तुति करीस काबर कि परमेसवर हर दाऊद ला ढ़ेरे बगरा आशिर्वाद, अऊ बडे आदर कर वचन देहे रहीस। दाऊद ऐला नई जानत रहीस कि परमेसवर हर कब बात जबान ला पूरा करही। इसराईली मन ला मसीहा बर करीबन १000 बछर ले अगुरेक परीस।

दाऊद हर ढ़ेरेच बछर ले नियाव अऊ सही सलामत राएज करिस, अऊ परमेसवर ओके आशिर्वाद देहीस। तबोले दाऊद हर अपन जीवन कर आखरी घरी में परमेसवर कर विरोध में गंभीर पाप कएर दारीस।

एक दिन कर दिन में दाऊद कर जम सिपाही मन अपन घर ले दुरिहा लड़ाई लडत रहीन। दाऊद हर अपन राजमहल ले बहिरे एक ठे संवाघीन ला अस्नान करत देखीस अऊ ओकर नाव बतशेबा रहीस।

अपन आँख ले संवाघीन ला एक ढ़ीढ़ देखत रहीस। दाऊद हर संवाघीन ला बलाए बर एक ठे आदमी ला भेजीस। दाऊद हर ओकर संगे सूतीस अऊ फेर ओके घरे भेज देहीस। चटीक दिन कर पाछु, दाऊद जग एकठे खबर आईस कि ओहर आसापति हवे।

बतशेबा कर घरदार उरिया नाव कर एक आदमी रहीस। ओहर दाऊद कर जम ले बढ़िया सिपाही रहीस। दाऊद हर उरिया ला लड़ाई कर जगहा ले बलुवाईस अऊ ओके अपन घर अऊ घरदारिन ठे जाए बर कहीस। लेकिन उरिया अपन घरे नई गईस काबर कि अऊ सिपाही मन युद्धमें लडत रहीन। एकरले दाऊद हर उरिया ला युद्ध में फेर भेज देहीस अऊ सेनापति ला कहीस कि उरिया ला युद्ध में जम ले कठिन जगहा में ठडूवाए देबे कि ओहर लडत लडत मएर जाए।

उरिया कर मरे कर पाछु, दाऊद हर बतशेबा संग शादी कर लेहीस। चटीक दिन कर पाछु बतशेबा हर दाऊद कर बेटा ला जनम देहीस। दाऊद हर जे जाएत भी करे रहीस ओला देखके परमेसवर हर गुस्साए गईस अऊ परमेसवर हर नाथान अगमजानी ला दाऊद जग भेजिस, ऐ बताये बर कि ओकर पाप कितना गंभीर हवे। दाऊद हर अपन पाप ले पशचाताप करीस अऊ परमेसवर हर ओकर पाप ला क्षमा कर देहीस। अपन बाचल जीवन में दाऊद हर परमेसवर कर पीछु चलीस अऊ दुख कर घरी में भी ओकर आगियां ला मानिस।

लेकिन दाऊद ला ओकर पाप कर फल मिलीस अऊ ओकर लईका हर मएर गईस। दाऊद कर जीवन कर आखरी घरी में ओकर परिवार में एको दाना सल नई रहिस, अऊ ओकर सामर्थ हर कम होए गए रहीस। दाऊद हर परमेसवर जग बिश्वासघात करीस। तबोले परमेसवर अपन जबान के प्रति बिसवास योग्य रहिस। तेकर पाछु दाऊद अऊ बतशेबा कर एकठे बेटा होईस तेकर नाव सुलैमान धरिन।

A Bible story from: 1 Samuel 10; 15-19; 24; 31; 2 Samuel 5; 7; 11-12

18. बटवारा कर राएज

ढ़ेरे बछर कर पाछु दाऊद हर मएर गईस अऊ ओकर बेटा सुलैमान इसराईल कर राजा बनिस। परमेसवर हर सुलैमान जग गोठीयाईस अऊ ओकर ठे पुछीस कि सबले ढेर तएं का माँगत हस माँग। ते घरी सुलैमान हर ज्ञान माँगीस। त परमेसवर हर ढ़ेरे खुस होईस अऊ ओके दुनिया कर जम ले बुद्दिमान आदमी बनाईस। सुलैमान हर ढ़ेरे गोईठ बात ला सिखीस अऊ ओहर ढ़ेरे होसियार अऊ नियाव करे दार रहिस अऊ परमेसवर हर ओके ढ़ेरे धनि आदमी बनाईस।

यरूशलेम में सुलैमान हर परमेसवर बर मदिर बनाईस जेकर बिचार ओकर दाऊ हर करे रहिस अऊ समान मन ला जुटाऐ रहिस। लोग मन अब परमेसवर कर आराधना अऊ बलिदान मिलन कर तम्बू कर बदले मदिर में करे लागिन। परमेसवर हर मदिर में आईस अऊ अऊ उहां अपन लोग मन कर मंझार में रहे लागीस।.

तबोले सुलैमान हर दुसर देश कर सवान्घीन मन ला पतियाईस। ओहर परमेसवर कर आगियां ला नई मानीस अऊ दूसर सेवांनघिन मन जग विहाओ करीस करीबन १000 विहाओ करिस जेमे सबले ढेर दूसर देस कर सेवांनघिन रहीन अऊ ओमन अपन देवता ला अपन संगे ले आने रहीन अऊ ओमन अपन देवता कर पूजा करत रहीन। ज़ेघरी सुलैमान हर सियान हो गईस त ओमने कर देवता कर आराधना करे लागीस।

परमेसवर हर सुलैमान जग ले गुस्साए गईस। काबर की सुलैमान हर परमेसवर जग बिसवास घात करीस। तेकरले परमेसवर हर दण्ड कर बदला में मृत्यु देहीस। ओकर मृत्यु कर पाछ इसराईल हर हिस्सा बटा करे बर कहिस।

सुलैमान कर मरे कर पाछु ओकर बेटा रेहोबाम राजा बनिस। रेहोबाम एक मुरक आदमी रहिस। इसराईल देश कर जम झन ओके राजा कर रूप में पक्का करेब आईन। ओमन रेहोबाम जग कहिन कि तोर दाऊ सुलैमान हर ओमन जग ढ़ेरेच अकन बुता करवाईस हवे अऊ ढ़ेरे मल्गुजारी भरवात रहिस।

रेहोबाम हर गवार आदमी कस जवाब देहीस “तुमन कहथा कि मोर दाऊ हर तुमन जग ढ़ेरे बुता करवाईस हवे। लेकिन में ओकर ले बगरा बुता करवाहूँ अऊ ओकर ले बगरा दंड देहुँ”।

इसराईल देस कर दस गोत्र मन रेहोबाम कर विरोध में लड़ाई करीन। केवल दुईठे गोत्र मन ओहर जेकस चाहत रहीस ओही कस करत रहीन। ए दुई गोत्र ला यहूदा कर देस कहल गईस।

इसराईल कर दस गोत्र मन जेमन रेहोबाम कर बिरोध में खड़ा रहीन, ओमन येरोबाम नाव कर आदमी ला अपन राजा बनाईन। ओमन अपन राएज ला उत्तर खूंट में बनाईन अऊ ओला इसराईल राएज कहिन।

येरोबाम हर परमेसवर कर बिरोध करीस अऊ अपन लोग मन ला पाप करवाईस। यहूदा देस कर येरुसलेम कर मंदिर में अपन लोग मन बर आराधना करे बर दुईठे मूर्ति ला येरोहोबाम हर बनावाईन।

यहूदा अऊ इसराईल कर राज दुनो मन बैरि बने रहीन अऊ ओमन एक दुसर झन ले लड़त रहीन।

इसराईल कर नावा देश में जम राजा मन दुष्ट रहीन। ओमन कर कईक ठे राजा मन ला दुसर इसराईलि मन मारीन काबर की ओमन सयम राजा बने बने बर करत रहीन।

इसराईल कर जम राजा अऊ ढ़ेरेच लोग मन मूर्ति कर आराधना अऊ मूर्ति पुजा में लगे रहीन अऊ वेबिचार करे लागीन अऊ कभो कभो लईका मन ला पूजत रहीन।.

यहूदा हर राजा दाऊत कर लईका रहिस। ओमन में ले चटिक राजा मन बढ़ीहा आदमी रहीन जेमन नियाव ले राज करिन अऊ परमेसवर कर आराधना करिन। लेकिन बगरा राजा मन बुरा अऊ घिनक मुरती कर पुजा करे लागीन अऊ चटिक राजा मन अपन लईका मन ला झुठा देवता मन कर आगु में पूजीन। इसराईल कर ढ़ेरेच बगरा लोग मन परमेसवर कर विरोध में बलवा करे दार अऊ दुसर दुसर देवता मन कर पुजा करे दार बन गए रहीन।

A Bible story from: 1 Kings 1-6; 11-12

19. अगमजानी मन

इसराईल कर पूरा बीतल कहनी में परमेसवर हर ओमन कर मंझारे अगमजानी मन ला भेजिस। अगमजानी मन परमेसवर जग ले जे संदेस ला सुने रहीन ओ संदेस ला आदमी मला सुनावत रहीन।

जे घरी इसराईल में अहाब राजा राएज करत रहिस। ते घरी एलिय्याह अगमजानी रहिस। अहाब एक बदमास आदमी रहिस अऊ ओहर आदमी मन ला मनाईस कि बाल नाव कर झुठा ईशवर कर आराधना करें। एलिय्याह हर अहाब जग कहिस जब ले में नई कहू तबले इसराईल में पानी नई बरस ही न ओस परही। ए गोइठ ला सुन के अहाब ढ़ेरे गुस्साए गईस।.

परमेसवर हर एलिय्याह जग कहिस “अहाब जग ले लूकाए जा काबर की ओ तोके ला मारे बर करत हवे”। ओहर सुनसान जंगल में एकठे झरना जग रहे लागीस। रोज दिन बिहनहा अऊ संझा कऊँअ हर ओकर जग रोटी अऊ मांस लानत रहीस। अहाब अऊ ओकर सिपाही मन एलिय्याह ला खोजत रहीन लेकिन नई पाईन। अकाल हर इतना जबरजस रहिस कि झरना कर पानी हर भी अटाये गईस।.

फेर एलिय्याह एकठे परोसी गाँव में गईस ऊहा एकठे विधवा सवांघिन अऊ ओकर बेटा रहत रहीन। अकाल कर चलते ओमन जग दाना पानी जम हर सिराऐ गए रहिस। लेकिन ओमन एलिय्याह कर ध्यान रखिन, परमेसवर हर एकस बुता करिस कि ओमन जग आटा अऊ तेल कर भाडा हर कभो खाली नई होईस। पूरा अकाल भर ओमन जग खाना खायेबर रहिस, एलिय्याह हर ऊहाँ चटिक बछर ले रहिस।.

साढ़े तीन बछर कर पाछु, परमेसवर हर एलिय्याह जग कहिस तैं इसराइल कर राज में फेर के आये जा अऊ अहाब जग गोठियाओ काबर कि परमेसवर हर फेर से पानी ला बरसाही। जे घरी आहाब हर एलिय्याह ला देखिस त ओहर कहीस “ऐ बदमास तैं इहां हवस”। एलिय्याह हर कहिस “तैं बदमास हवस, तैं यहोवा ला जेहर सच्चा परमेसवर हवे। ओला छोड़ देहे हवस अऊ बाल देवता कर आरधना करत हवस। इसराईल कर जम लोग मन ला कार्मेल पहार में जुटा”।

इसराईल कर जम झन कार्मेल पहार में आईन अऊ बाल कर ४५० अगमजानी मन भी आइन। एलिय्याह हर लोग मन जग कहिस कि “कब तक अपन मन ला बदलत रहिया अगर यहोवा परमेसवर हवे त ओकर सेवा करा अऊ यदि बाल ईश्वर हवे त ओकर सेवा करा”।

एलिय्याह हर बाल कर अगमजानी मन ला कहिस कि “एकठे बकरा ला मारा अऊ ओला बलिदान कर रूप में चढ़ावा लेकिन ओमे आगी मत लगईहा। महू वैसने करहूँ अऊ जे ईश्वर हर सवरग ले आगी उतार ही वही हर सच्चा परमेसवर हो ही। ते घरी बाल कर याजक मन बलिदान चढ़ाईन लेकिन आगी नई लगाईन।

फेर बाल कर अगमजानी मन बाल देवता जग बिनती करिन “हे बाल हमर सुन”। पूरा दिन ओमन प्राथर्ना करिन अऊ गुहार करिन अऊ अपन आप ला छुरी ले काट के लहू लहान होए गईन, लेकिन ओमन ला कांही उत्तर नई मिलिस।

बेर बूडत घरी एलिय्याह हर परमेसवर बर बली चढ़ाईस। फेर ओहर ओमन जग कहिस कि “बारह ठे बड़खा बड़खा गंघरी में पानी लाएन के बलिदान कर ऊपरे रिकोए देवा” की शिकार अऊ लकरी अऊ बेदी कर चारो कोनहा कर भुईया हर कनचा हो जाऐ।

फेर एलिय्याह हर बिनती करिस कि “हे यहोवा, अब्रहाम, इसहाक अऊ याकूब कर परमेसवर आएज हमके देखा कि इसराईल में तैं ही परमेसवर हवस अऊ मैं तोर दास हवों। मोके उत्तर दे कि लोग मन जाएन जाए कि सच्चा परमेसवर तैं ही हवस।

एकच दाएर बदरी ले आगी गिरीस। पूरा शिकार, लकरी, अऊ भुईया अऊ बेदी कर चारो कोनहा कर पानी ला झुरवाऐ देहीस। जे घरी लोग मन एला देखिन त भुईया में गिर के कहे लागीन “यहोवा परमेसवर हवे। यहोवा परमेसवर हवे”।

ते घरी एलिय्याह हर कहिस “बाल कर अगमजानी में ले कोई झइन बांचे। एकरले लोग मन बाल अगमजानी मन ला धएर धएर के दुरिहा ले गईन अऊ ओमन के माएर दारीन।

फेर एलिय्याह हर अहाब जग कहिस कि तैं झटेच के अपन राएज में फिर जा काबर कि अब पानी बरसे वाला हवे। झट के बदरी हर करिया होए गईस अऊ ढ़ेरे जोर से पानी बरसे लागीस। यहोवा हर अकाल ला ख़तम करिस अऊ ए साबित करिस कि मैं ही सच्चा परमेसवर लागो।.

एलिय्याह कर पाछु, परमेसवर हर एलिशा नाव कर आदमी ला चूनिस कि ओहर परमेसवर कर अगमजानी बने। परमेसवर हर एलिशा कर चलते कई मधे कर चमत्कार करिस। एकठे नमान नाव कर आदमी संग चमतकार होईस जेहर दुश्मन कर सेना पती रहिस। ओके भयंकर चमड़ी कर रोग रहिस। ओहर एलिशा कर बारे में सुनिस अऊ ओहर एलिशा जग चंगाई पाए बर आईस। एलिशा हर ओके कहिस कि तैं यरदन नदि में सात दाएर डुबकी लगा।

आगु नमान हर गुस्साए गईस अऊ डुबकी लगाए बर नई करत रहिस। काबर कि ओके एहर मुर्खता लागत रहिस। लेकिन ओहर पाछु अपन मन ला बदलीस अऊ यरदन नदि में सात दफे डुबकी लगाईस। सातवा दफे डुबकी लगा के पानी ले बहीर निकलिस ते घरी ओकर चरम रोग एक दम से खत्म हो गए रहिस। परमेसवर हर ओके चंगा करिस।

परमेसवर हर अऊ नगदेच अगमजानी मन ला भेजिस। ओमन लोग मन जग कहिन कि “मूर्ति कर आराधना करे बर बंद करें, अऊ करुणा अऊ नियाव कर काम करे। भविस वक्ता मन लोग मन ला चेताईन कि ओमन बुराई ले हट के परमेसवर कर आगियां नई मानही त परमेसवर हर ओमन ला दोसी पाए के ओमन ला सराएप देहि।

ढ़ेरेच लोग मन परमेसवर कर आगियां ला नई मानिन। ओमन अगमजानी मन कर संगे बुरा बरताओ करिन अऊ कभो कभो ओमन के माएर दारीन। एक दफे यिर्मयाह अगमजानी ला एकठे झुरा कुआँ में मरे बर बोएझ देहे रहीन अऊ ओहर कुआँ कर भीतर माटी में फंस गए रहिस। लेकिन राजा हर ओकर उपर दया करके अपन सिपाही मन ला आगियां देहीस कि यिर्मयाह ला मरे ले पाहिले ओके कुआँ ले बहरी निकाएल लेवा।.

अगमजानी मन परमेसवर कर वचन ला बताते गईन। लेकिन लोग मन ओमन के नई पतियावत रहीन। ओमन लोग मन ला चेतावनी देहिन कि यदि ओमन अपन पांप ला नई मान ही त परमेसवर चलते नाश होए जाही। ओमन लोग मन ला परमेसवर कर जबान कर गोईठ कर सुरता करवाईन कि परमेसवर कर मसीहा आए वाला हवे।

A Bible story from: 1 Kings 16-18; 2 Kings 5; Jeremiah 38

20. प्रवास मतलब दुसर जग में जाए के रहे लागीन अऊ चटिक दिन में फिर आईन

इसराईल राएज अऊ यहूदा कर राएज दूनों हर परमेसवर कर विरुद्ध में पांप करिन। परमेसवर हर सिनै पहार में जे बात जबान ला बनाए रहिस ओला ओमन नई मानीन। परमेसवर हर बार बार अपन भविसवकता मन ला भेजिस की ओमन मन ला सुघर सुघर जिए कर जोइठ ला बताए कि ओमन अपन पाप ले पश्चताए अऊ परमेसवर कर आराधना करे। लेकिन ओमन आगियां माने दार लोग नई रहीन।

एकरले परमेसवर हर दुनों राएग में दण्ड भेजिस अऊ ओमन कर दुश्मन मन ओमन ला नाश करिन। अशुर साम्रज्य एक बलवान अऊ क्रूर देश रहिस जेहर इसराईल कर राएज ला हरुवा देहीस। असुरी मन इसराईल कर कई झन ला माएर दारीन अऊ कीमती चीज़ मन ला लूट लेहिन अऊ ढ़ेरेच ढ़ेरेच देश मन ला लेस देहिन।

अशुरी मन इसराईल कर जम ले होशियार अऊ धनी आदमी मन ला अशुर देश में ले गइन। केवल इसराईल कर जम ले गरीब आदमी, जेमन ला नई मारे गय रहीन ओमन इसराईल कर राएज में बाचे रहीन।

फेर अशुरी मन विदेशी मन ला इसराईल कर देश में लाएन के बसाईन। विदेशी मन नसुवावल शहर ला फेर से बनाईन अऊ ईसराईली मन जग बिबाह करिन, जेमन ऊहाँ रहत रहीन। इसराईल कर ऐ पुरखा ला सामरी कहल गईस, जेमन दूसर दुसर जाति मन जग बिबाह करे रहीन।

यहूदा राएज कर आदमी मन देखिन कि कोन कस परमेसवर हर इसराईल कर आदमी मन ला दण्ड देहे रहिस। काबर कि ओमन परमेसवर कर ऊपर बिसवास नई करत रहीन अऊ ओकर आगियां ला नई मानत रहीन। ओमन मूर्ति अऊ कनानी मन कर देवता कर आराधना करिन। परमेसवर हर अगमजानी मन ला ईसराईली मन जग भेजिस लेकिन ओमन नई सुनिन।

अशुरी मन इसराईल ला नश्वाए कर १00 बछर कर पाछु परमेसवर हर बाबेल कर राजा नबुकदनेस्सर ला भेजिस कि ओहर यहूदा कर राएज में लड़ाई करे। बाबेल एक शक्ति साली साम्रज्य रहिस। यहूदा हर राजा नबुकदनसर कर सेवक बने बर तियार होईस अऊ हर साल ओमन के ढ़ेरे धन सम्पति देहत रहिस।.

चटिक बछर कर पाछु, यहूदा कर राजा हर बाबेल कर विरुद्ध में लड़ाई करिस। एकरले ओमन फिर के आए गईन अऊ यहूदा कर देश में आक्रमण करिन। ओमन यरूशलेम ला अपन कब्जा में कर लेहिन। मंदिर ला नश्वाए देहिन, अऊ नगर अऊ मंदिर कर जम खजाना मन ला लुट लेहिन।

यहूदा कर राजा ला लड़ाई कर दण्ड देहे बर ओकर लईका मन ला नबुकदनेसर कर सिपाही मन ओकर आगू में माएर डालिन अऊ ओके अंधा कर देहिन। ओकर पाछु ओमन राजा ला बाबेल ले गईन कि ओहर ऊहां कर जेहल में मरे।.

नबुकदनेसर अऊ ओकर सिपाही मन यहूदा राएज कर करीबन जम आदमी मन ला बाबेल ले गईन अऊ ढ़ेरे गरीब आदमी मन ला खेती बाड़ी करे बर छोएड़ देहिन। जे घरी परमेसवर कर लोग मन ला जबान कर देश ला छोडेक परीस, ओला प्रवास कर घरी कहल जाथे।

नबुकदनेसर अऊ ओकर सिपाही मन यहूदा राएज कर करीबन जम आदमी मन ला बाबेल ले गईन अऊ ढ़ेरे गरीब आदमी मन ला खेती बाड़ी करे बर छोएड़ देहिन। जे घरी परमेसवर कर लोग मन ला जबान कर देश ला छोडेक परीस, ओला प्रवास कर घरी कहल जाथे।

करीबन ७० बछर कर पाछु पारसी कर राजा क्रूसु हर बाबेल ला हरुवाए देहीस अऊ एही कस बाबेल साम्रज्य कर जगहा में पारसी साम्रज्य आए गईस। ऊहाँ कर इसराईली लोग मन ला यहूदी बलाए जात रहिन अऊ अपन पूरा जिन्दगी बाबेल में जी चुके रहीन। चटिक आदमी मन जेमन सियान होए गए रहीन ओमन यहूदा कर देस कर सुरता करत रहीन।

पारसी साम्रज्य बलवान रहिस। लेकिन ओकर कब्जा में रहिन तेमन कर ऊपरे दयालु रहिस। राजा बने कर पाछु क्रूसू आज्ञां देहिस जे यहूदी पारसी देश ला छोएड के यहूदा देश जाए चाहत हवा ओमन जाए सकत हवा। मदिर ला फिर से बनाऐ बर ओमन यहूदी मन ला पैसा भी देहिन। यही कस ७० बछर कर प्रवास कर पाछु यहूदी मन कर एक नानबड झुंड यहूदा कर यरुसलेम में आए गईंन।

जे लोग मन यरुसलेम ने फिर के आए रहीन, ओमन मन्दिर ला झट के बनाईन अऊ शहर कर चारो कती कर हत्ता ला बनाईन। लेकिन अझेर ले ओमन दुसर लोग कर शासन कर अधीन रहीन। अब ले ओमन बात जबान कर देश में अऊ मन्दिर में आरधना कर सकत रहीन।

A Bible story from: 2 Kings 17; 24-25; 2 Chronicles 36; Ezra 1-10; Nehemiah 1-13

21. परमेसवर हर मसीहा ला जबान करथे

शुरु ले परमेसवर हर मसीहा ला भेजे कर बिचार करे रहीस। सबले आगू परमेसवर हर मसीहा कर जबान हर आदम अऊ हवा जगहा आईस। परमेसवर हर जबान करिस कि हवा ला एकठे लईका होहीं। जेहर सांप कर मुड़ी ला कुंचही ओ सांप हर जेहर हवा ला धोका देहे रहिस ओहर सैतानरहिस। ओ बचन कर मतलब कि मसीहा सैतान ला पूरा तरह ले हरुवाए देहि।

परमेसवर हर अब्रहाम ला जबान देहे रहिस कि ओकर चलते भुईया कर जम जाति मन आसीष पाहि। ओ अशिस, मसीहा हर आ जाही, तेकर पूरा हो जाही। ओकर चलते भुईया कर जम जाति कर आदमी मन उधार पाहि।.

परमेसवर हर मूसा ला जबान देहे रहिस कि आएवाला दिन में तोर सहीक एकठे अऊ अगमजानी ला परमेसवर खड़ा करही। ए जबान ओ मसीहा कर बारे में रहिस जेहर आए वाला रहिस।

परमेसवर हर दाउद जग जबान करे रहिस कि ओकर पुरखा मेले एक झन परमेसवर कर लोग मन कर ऊपरे सब घरी राएज करही। एकर मतलब हवे कि मसीहा हर दाऊद कर लईका होहीं।

यिर्मयाह अगमजानी कर चलते, परमेसवर हर जबान करे रहिस कि परमेसवर एगोठ नावा कानून ला बनाही। ओ कानून कर सहीक नही जेला परमेसवर हर इसराईल मन कर संगे सीनै पहार में बनाए रहिस। ऐ नावा कानून ला परमेसवर हर लोग मन कर ह्रदय में लिख ही। लोग मन परमेसवर ला एक एक झे जानही। ओमन परमेसवर कर लोग कहाही अऊ परमेसवर हर ओमन कर पांप ला क्षमा क२ही। ऐ कानून कर शुरू मसीहा हर करही।

परमेसवर हर अगमजानी मन जग कहे रहीस कि मसीहा हर एगोठ याजक अगमजानी अऊ राजा होहीं। एकठे अगमजानी ओहर हवे जेहर परमेसवर कर गोईठ ला सुन कर ओकर बड़ाई लोग मन कर आगु में करथे। जे मसीहा ला परमेसवर हर भेजे वाला रहिस, ओहर जमले सुघर अगमजानी होही।

इसराईल कर याजक मन लोग मन कर पांप कर दण्ड कर बदले परमेसवर कर आगु में बलिदान चढावत रहीन। याजक मन लोग मन बर प्राथना करत रहीन। मसीहा हर सुघर महायाजक रहिस जेहर अपन आप ला परमेसवर कर आगू सुघर बलिदान कर रूप में चढाए दार रहिस।

एकठे राजा ओहर हवे जेहर एकठे राएज में राएज करत रहिस अऊ लोग मन कर नियाव करत रहिस। मसीहा हर सुघर राजा होही जेहर अपन पुरखा दाऊद कर सिहासन में बेठही। ओहर पूरा दुनिया में हमेशा बर राएज करही अऊ सीधा अऊ सही फेसला करही।

परमेसवर कर अगमजानी मन मसीहा कर बारे में अऊ कई मधे गोईठ ला बताए रहीन। मलाकी अगमजानी हर अगमवाणी करे रहिस कि मसीहा ले आगू एकठे बड़खा अगमजानी आहि। यशायाह अगमजानी हर अगमवाणी करे रहिस कि मसीहा कर जनम एकठे कुवारी जग होही। मीका अगमजानी हर अगमवाणी करिस कि मसीहा कर जनम बेतलेहेम गाँव में हो ही।

यशायाह अगमजानी हर कहिस कि मसीहा गलील में रही अऊ टूटे दिल वाला मन ला ओहर सान्ती देहि अऊ गुलाम मन ला आजाद अऊ कैदि मन ला छुटकारा कर सुस समाचार सुनाही। ओमन ए भी अगमवाणी करिन कि मसीहा दुखालीहा मन ला चंगा करही अऊ अंधा, भईरा, कोन्दा अऊ लंगडा मन ला चंगा करही।

यशायाह अगमजानी हर अगमवाणी कर रहिस कि लोग मन मसीह ला विगर कसूर कर सताही अऊ छोएड देहीन। आने अगमजानी मन कहिन कि जेमन मसीहा ला मार ही ओमन ओकर कपड़ा वर चिट्टी डाएल ही, अऊ मसीहा अपन संगता कर चलते धरुवाए जाही। जकर्याह नबी हर कहिस कि मसीहा ला धरुवाए वाला ओ संगता हर मज़दूरी में तीसठे चाँदी कर सिक्का पाही।

नबी मन ए भी कहिन कि मसीहा कर मैत कईसे होही। यशायाह हर अगमवाणी करे रहिस कि लोग मन मसीहा ला माएर ही, थूकहीं अऊ मजाक उड़ाही। मसीह हर कोनो पांप नई करे रही तबोले ओमन ओके बेधही अऊ ढ़ेरे पिरा अऊ दुःखान में मरही।

अगमजानी मन ए कहे रहीन कि मसीहा कस दुसर कोई नई होही। जेमे काही पांप नई होहीं। दुसर कर पांप कर दण्ड कर चलते ओहर मारल जाही। मसीहा कर दण्ड कर चलते परमेसवर अऊ आदमी मन कर मंझारे सान्ती हो ही। एकस चलते परमेसवर कर मन में रहिस कि मसीहा ला दरमेस देही।

नबि मन ए भी अगमवाणी करिन कि मसीहा हर मर जाही अऊ परमेसवर हर ओके मरल में ले जी उठाही। मसीहा कर मैत अऊ जी उठे कर चलते पांपी मन ला बचाए कर परमेसवर कर बिचार हर पूरा होही। अऊ नावा कानून कर सूरू हो ही।

परमेसवर हर अगमजानी मन कर चलते मसीहा बरीक़ ढ़ेरे बात ला बताईन। लेकिन मसीहा हर ए नबि मन कर दिन में नई आईस। आखरी अगमवाणी कर ४00 ले भी ढ़ेरे बछर कर पाछु जे घरी समय हर पूरा हो गईस त परमेसवर हर मसीहा ला ए भुईया में भेजीस।

A Bible story from: Genesis 3:15; 12:1-3; Deuteronomy 18:15; 2 Samuel 7; Jeremiah 31; Isaiah 59:16; Daniel 7; Malachi 4:5; Isaiah 7:14; Micah 5:2; Isaiah 9:1-7; 35:3-5; 61; 53; Psalm 22:18; 35:19; 69:4; 41:9; Zechariah 11:12-13; Isaiah 50:6; Psalm 16:10-11

22. यहन्ना कर जनम

बीतल बछर में परमेसवर हर अपन लोग मन जग सवरगदूत अऊ अगमजानी कर संगे गोठियाईस। लेकिन ४00 बछर ले परमेसवर हर केकरो जग नई गोठियाईस। एकेच धाएर एकठे सवरग दूत हर जकर्याह नाव कर एकठे सियान याजक जग परमेसवर कर खबर ला पहुंचाईस। जकर्याह अऊ ओकर परानी एलिशेबा परमेसवर कर भगत रहिन। लेकिन ओमन कर एकोठे लईका नई रहिस।

सवरग दूत हर जकर्याह जग कहिस “तोर परानी हर एकठे लईका ला जनम देहि। ओकर नाव यहुन्ना धरबे। ओहर पवितर आतमा ले भरल रही अऊ लोग मन ला मसीहा बर तियार करही”। जकर्याह हर उत्तर देहीस “मैं अऊ मोर परानी सियान हाए गए हवन। हमरे लईका ला कइसे जनम दे सकत हवन? मै कैसे जान हु कि मोर जग एकस होही?

सवरग दूत हर जकर्याह ला उत्तर देहीस कि “मैं परमेसवर कर चलते ऐ सुस्समाचार ला सुनाए बर तोर ठे आए हो। ताऐ मोर गोईठ ला बिसवास नई करे। एकरले ए लईका कर जनम होअत ले, तएं गोठियाए नई पाबे"। तेकर झटच के जकर्याह हर कोनता होए गईस। सवरग दूत हर जकर्याह ला छोएडके चएल देहीस। तेकर पाछु जकर्याह हर अपन घर में फिर आईस अऊ ओकर परानी हर आशापती होए गईस।

एलिशेबा कर आशापती होए कर छ्व महीना कर पाछु ओही सवरग दूत हर एलिशेबा कर जाएत सागा मरियम जग प्रगट होईस। मरियम हर एक कुँवारी रहिस अऊ युसुप नाव आदमी संग ओकर मंगनी होए गए रहिस। सवरग दूत हर कहिस “तएं आशापती होबे अऊ एकठे लईका ला जनम देबे अऊ ओकर नाव ईसू धरबे। ओहर परम प्रधान परमेसवर कर बेटा होही अऊ सब घरी राएज करही”।

मरियम हर उत्तर देहीस “एहर कइसे हो ही काबर कि मैं तो कुँवारी हवों”? सवरग दूत हर समझाईस “पवितर आतमा तोर उपर उतर ही अऊ परम प्रधान कर शक्ति तोर उपर छाया करही। एकरले परमेसवर कर बेटा लईका हर पवितर होही। मरियम हर बिसवास करिस अऊ सवरग दूत हर जेला कहिस ओला मानिस।

सवरग दूत हर मरियम जग गोठियाऐ कर पाछु मरियम हर एलिशेबा जग भेट करे गईस। जैसने एलिशेबा हर मरियम कर जोहार ला सुनिस, एलिशेबा कर लईका ओकर पेट कर भीतरी तरकीस। परमेसवर हर जे जाएत ओमन बर करे रहिस, ओकर सुरता कएरके सवाघिंन मन फुला होइन। एलिशेबा कर संगे तीन महिना रहे कर पाछु मरियम अपन घर में फिर आईस।

एलिशेबा हर लईका ला जनम देहे कर पाछु जर्क्याह अऊ एलिशेबा हर ओकर नाव यहुन्ना धरीन जेकस सवरग दूत हर कहे रहिस। फेर परमेसवर हर जकर्याह ला फेर से गोठीयाए बर देहीस। जकर्याह हर कहिस “परमेसवर कर स्तुति हो काबर कि ओहर अपन लोग मन ला सुरता करिस हवे। तएं मोर बेटा परम प्रधान परमेसवर कर अगमजानी कहाबे। तएं लोग मन ला बताबे कि ओमन कर पांप कर क्षमा ओमन के कैसे मिलही।

A Bible story from: Luke 1

23. ईसू कर जनम

मरियम कर एकठे धर्मी आदमी युसूफ कर संगे मंगनी होए गए रहिस। जे घरी ओहर सुनिस कि मरियम हर आसापती हवे, ओ जानत रहिस कि ऐ लईका हर ओकर ना लागे। ओहर मरियम ला लज्जित करेबर नई करत रहिस। तेकरले ओहर मरियम ला क्ले क्ले छोड़े बर करत रहिस। एकस करे कर आगु एगोठ सवरग दूत हर आए के ओकर सपना में गोठियाईस।

सवरग दूत हर कहिस “युसुफ, मरियम ला अपन परानी बनाए ले झइन डराओ। ओ लईका जेहर मरियम कर पेट भीतरि हवे ओहर पवितर आतमा कती ले हवे।ओहर एकठे लईका ला जनम देहि ओकर नाव ईसू धरबे, जेकर मतलब हवे यहोवा बचाथे। काबर कि ओहर अपन लोग मन ला ओमन कर पांप ले बचाही।

एकरले यूसुप हर मरियम जग बिहाओ करिस, अऊ ओके अपन घर में परानी बनाए के ले लानीस। जबले लईका ला जनम नई देहे रहीस तब ले ओहर अपन परानी जग नई गईस।

जे घरी मरियम कर लईका कर जनम होए कर समय आईस, ते घरी रोमी शासन जम झन ला आगियां देहीस कि ओमन अपन अपन पुरखा कर शहर में जाए के जनगणना में नाव लिखवाए बर जाए। यूसुप अऊ मरियम हर ढ़ेरे दुरिहा ले रेंगत रेंगत नासरत ले बेतलेहेम में गईन काबर कि ओमन कर पुरखा दावूद बेतलेहेम शहर कर रहिस।

जे घरी ओमन बेतलेहेम पहुचीन, ते घरी ओमन कर रहे बर कोई जगहा नई भेटाईस। ओमन के एकठे कोठा में जगहा मिलीस जिहा जरू मन ला बांधत रहीन। लईका कर जनम ऊहा होईस। ओकर दाई हर ओके ओही जग सुताईस काबर कि ओमन जग अऊ कोई जगहा नई रहिस। ओमन लईका कर नाव ईसू धरीन।

ओही राएत के चटिक चरवाओ मन ओजग कर दाड में रहीन अऊ अपन भेड मन कर पहरा करत रहीन। एकेच धाएर ले एकठे बरत सवरग दूत ओमन कर आगु प्रगट होईस। ओमन डराए गईन। सर्वग दूत हर कहिस “झईन डरावा, काबर कि मैं तुमन बर सुघर खबर लाने हवो। मसीहा प्रभु कर जनम बेतलेहेम शहर में होए गईस हवे।

तुमन जा अऊ ओ लईका ला खोजा। तुमन ओके कपड़ा में लपेटल एकठे चरनी में पइहा। एकेच धाएर बदरी में ढ़ेरे अकन सवरग दूत मन प्रगट होइन। ओमन परमेसवर कर स्तुति एक्स कही के करत रहीन कि “सवरग कर परमेसवर ला महिमा मिले अऊ भुइया में लोग मन ला सान्ती जेमन उपर ओहर दया करथे।”

चरवाओ मन ओ जगहा में पहुचीन जिहा ईसू रहिस। अऊ ओमन ओके एकठे चरनी में पाईन जइसने सवरग दूत हर ओमन ला कहे रहिस ओमन ढ़ेरे फुला होइन। मरियम भी ढ़ेरे खुस रहिस। चरवाओ मन अपन खेत में आए गईन जिहा ओमन कर भेड मन रहीन। अऊ जे जाएत ला ओमन देखे रहीन अऊ सुने रहीन ओकर बर ओमन परमेसवर कर स्तुति करत रहीन।

तनिक समय कर पाछु, पूरब देश कती ले चटिक ज्ञानी मन आए रहिन। काबर कि ओमन एकठे सुघर अकन तरईया ला बदरी में देखे रहीन। ओमन के पता चले रहिस कि यहूदी मन कर एकठे नावा राजा कर जनम होए गईस हवे। ए राजा ला देखे बर ओमन ढ़ेरे दुरिहा ले सफर करत आए रहीन। ओमन बेतलेहम में आइन अऊ ईसू अऊ ओकर दाई दाऊ कर घर ला खोएज दारिन।

ज्ञानी मन ईसू ला ओकर दाई कर संगे देखिन अऊ ओमन गोडे गिर के ईसू कर आरधना करिन। ओमन ईसू बर ढ़ेरे कीमति भेट लाने रहीन। फेर ओमन अपन घरे चल देहिन।

A Bible story from: Matthew 1; Luke 2

24. युहन्ना हर ईसू ला बपतिसमा देहीस

जकर्याह अऊ एलिशेबा कर बेटा युहन्ना हर बाएड गईस अऊ एक अगमजानी बन गईस। ओहर जंगल में रहत रहीस अऊ जंगल कर मधु रस अऊ फम्फा मन ला खात रहीस अऊ ऊट कर रावा कर कपड़ा पहिरत रहीस।

युहन्ना कर गोईठ ला सुने बर ढ़ेरे अकन लोग मन जात जंगल में जात रहीन। युहन्ना ओमन के यह कह के परचार करे कि, पशचतावा, काबर कि परमेसवर कर राएज हर ठावें हवे।

जे घरी लोग मन युहन्ना कर परचार ला सुनीन त नगदेच लोग मन अपन पांप कर पश्चाताप करिन। अऊ युहन्ना हर ओमन ला बपतिसमा देहीस, चटिक धर्मी अगुवा मन बप्तिस्मा लेयेबर आइन लेकिन ओमन अपन पांप नई मानीन अऊ पश्चाताप नयी करिन।

युहन्ना हर धर्मी अगवा मन जग कहिस “ ए विसैले सांपो, पशचतावा अऊ अपन चाल सहूर ला बदला। हर एक रुख जेहर बटिहा फर नई लाने ओहर काटल जाही, अऊ आगी में डाएल देहल जाही।”अगमजानी मन जे जाएत कहे रहीन, कि “ देखा मैं अपन दूत मनला तुमन कर आघु भेजहूँ। जे तुमन बर डगर बनाही, ” युहन्ना ला भेज के परमेसवर ओला पूरा करीस।

चटिक यहूदी मन युहन्ना जग पूछीन का तैं मसीहा हवस?।युहन्ना हर उत्तर देहीस कि मैं मसीहा न लागो। लेकिन मोर पाछु एकझे आए वाला हवे। ओहर इतेक महान हवे, कि मैं ओकर जूता ला खोलेक लाईक नई हों।

आगु दिन ईसू हर युहन्ना जग बपतिसमा लेहे बर आईस। जे घरी युहन्ना हर ईसू ला देखिस त कहिस। “देखा ए परमेसवर कर मेमना हवे जेहर जम जगहा कर पांप ला ले जाही”।

युहन्ना हर ईसू जग कहिस “ तुहके बपतिसमा देहे कर मैं लाईक नई हों। मोके तुँहर ले बपतिसमा लेहेक चाही, ” लेकिन ईसू हर कहिस, “तैं मोके बपतिसमा दे, काबर कि येहर सही काम हवे”, एकरले युहन्ना हर ईसू ला बपतिसमा देहीस, काबर कि ईसू हर कभो पांप नई करे रहिस।

जे घरी ईसू हर बपतिसमा कर पाछु पानी ले बहीरे निकेल आईस, ते घरी परमेसवर कर आतमा परेवा कर नाइ उतरिस अऊ ओकर ऊपर आईस । ओही घरी परमेसवर कर गोईठ हर सवरग ले सुनाई देहीस, “तैं मोर दुलरुवा बेटा हवस, अऊ मैं तोर ले ढ़ेरे फुला हवों”।

परमेसवर हर युहन्ना ला कहे रहिस, “पवितर आतमा एक आदमी कर ऊपरे उतर आहि। जे के तैं बपतिसमा देहे हवस। ओहर परमेसवर कर बेटा लागे” एक ठे परमेसवर हवे। लेकिन जे घरी युहन्ना हर ईसू ला बपतिसमा देहीस, ओहर पिता परमेसवर कर गोईठ ला सुनिस । बेटा ईसू हर अपन दाऊ परमेसवर ला देखीस अऊ ईसू हर पवितर आतमा ला भी देखीस।

A Bible story from: Matthew 3; Mark 1:9-11; Luke 3:1-23

25. सैतान कर चलते यीसु कर परीक्षा

ईसू कर बपतिसमा लेहे कर ढ़ेरेच हालु, पवितर आतमा हर ओकर अगुवाई करिस, जीहाँ ओहर चालीस दिन अऊ चालीस राएत उपवास करीस। तेकर सैतानहर ईसू जग आईस कि पाप करे बर आकेला ललचुआए।

सैतानहर ईसू ला ए कहीके ललचुआईस "अगर तैँ परमेसवर कर बेटा होबे, त ए पखना ला रोटी में बदेल दे, अऊ तैँ खाए सकबे।

ईसू हर कहीस '"परमेसवर कर वचन में लिखल हवे "आदमी केवल रोटी खाए के नई जीए, लेकिन ओके परमेसवर कर कहल गोईठ हर जरूरी हवे।

तेकर सैतानहर ईसू ला मंदिर कर सबले ऊपर जगहा में ठदुआए देहीस अऊ कहिस"अगर तैँ परमेसवर कर बेटा होबे, त अपने ला खाल्हे गिराए दे काबर कि लिखिस हवे "परमेसवर हर अपन सवरगदूत मन ला कहि की तुहँला बचाये लेही कि तोर गोड़ हर पखना में झईन छुआए।

ईसू हर सैतानला कहिस "परमेसवर कर वचन में लिखल हवे कि तैं अपन प्रभु परमेसवर कर परीक्षा झईन करबे।

तेकर सैतानहर ईसू ला दुनिया भर कर सब राएज अऊ ओकर आदर समान ला देखाईस अऊ कहिस "अगर तैं गोडे गीर के मोकेला जोहारबे त ए जम जाएत ला मैं तोके दे देहुँ। "

ईसू हर कहिस "सैतानमोर जग ले दुरिहां भाएग जा। परमेसवर कर वचन में ओ लोग मन ला कहिस हवे कि तैं अपन प्रभु परमेसवरके जोहारबे, अऊ केवल ओकरेच सेवा करबे।

ईसू सैतानकर परीक्षा में नई फँसीस ओकरेले सैतानहर ईसू ला छोंएड़ के चईल गईस। तेकर सवरगदुत मन आईन अऊ ईसू कर सेवा करीन।

A Bible story from: Matthew 4:1-11; Mark 1:12-13; Luke 4:1-13

26. ईसू अपन सेवकाई ला चालू करीस

सैतान कर परीक्षा ला जितीस तेकर पाछु, ईसू पवितर आतमा कर सामर्थ में गलील नाव कर जगह में चईल देहीस, जीहाँ ओमन रहत रहींन। ईसू हर एक जगहा ले दुसर जगहा सिखात सिखात जात रहीस। सबेच झन ओकर बोखान करिस।

ईसू हर नासरत नाव कर गाव में गईस जीहाँ ओहर अपन बचपन ला बिताये रहिस। सबत कर दिन में ओहर आराधना कर जगहा में गईस। ओमन ईसू ला यशायाह कर किताब पढेबर देहिंन कि ओ ओमेंले पढ़हे। ईसू हर किताब ला खोलीस अऊ ओमेंले एगोट भाएग ला पढ़ीस।

ईसू हर पढ़ीस "परमेसवर हर अपन आतमा ला मोर ऊपर राखीस हवे। काबरकि मैं गरीब मन ला सुघर संदेस सुनाओ अऊ कैदी मन ला छोड़ाये सकों, अँधा मन ला देखाए सकों, अऊ दुखलिहा मन कर दुःख ला छुटुआए सकों। ऎहर परमेसवर कर अनुग्रह कर बछर हवे।

फेर ईसू हर बईठ गईस। जम झन ओकेला टकटकी लगाए के एक ढ़ीढ देखत रहीन। ओमन जानत रहींन की जे वचन कर भाएग ला ओहर पढे रहीस, ओहर मसीह कर बारे में रहीस। ईसू हर कहीस"जे भाएग ला मैं पढ़े ओहर अब पूरा होअथे। " जम लोग मन अकबकाए गईंन। अऊ ओमन पुछिन, का ए यूसुफ कर बेटा नई हवे?

तेकर ईसू हर कहीस "ऎहर सहीच हवे की कोनो भविस्यवक्ता मन ला अपन गांव में अपनाल नई जाये। "एलिय्याहह कर समय में इस्राएल में ढ़ेरेच बगरा अदावन रहींन। लेकिन जे घरी साढ़े तीन बछर तक पानी नई आईस, त परमेसवरहर एलिय्याहह ला इस्राएल कर कोनोच अदावन ठन नई भेजिस, लेकिन एगोठ आनेच देस कर अदावन जग भेजीस।

यीशू हर फेर कहिस "एलिशा भविस्यवक्ता कर समय में, इस्राएल में ढ़ेरे लोग मन चमड़ी रोग कर दुःख में परे रहीन। लेकिन एलिशा हर ओमेले कोनोच के चंगा नई करीस। एलिशा बस नामान कर चमड़ी रोग ला चंगा करिस, जे इसराईल कर दुश्मन कर सेनापति रहीस। ईसू कर सुनोईया लोग मन यहूदी रहीन। जे घरी ओमन ईसू कर एकस गोईठ गोठियात सुनीन, त ओमन ढ़ेरेच गुससाये गईंन।

नासरत कर लोग मन ईसू ला आराधना कर जगह ले घींच के ले गईंन, अऊ ओकेला एगोठ पहार कर टिप में लानीन कि ओके ओ जग ले गिरायें के माएर मरुआए। लेकिन ईसू भीड़ कर मंझार ले निकलिस, अऊ नासरत कर गांव ला छोएड़ देहीस।

तेकर ईसू गलील कर सबेच राएज में गईस, अऊ बड़खा भीड़ में लोग मन ओकर जग आत रहींन। ओमन ओकर जग दुखलिहा अऊ लंगड़ा लोग मन ला लानीन, जेमन देखे नई सकत रहींन, जेमन रेंगेक, सुनेक नई सकत रहींन, अऊ जेमन गोठियाये नई सकत रहीन। सबेच झन ला ईसू जग लानीन अऊ ईसू हर ओमन ला चंगा करीस।

ऎकस लोग मन ला भी ईसू जग लानीन जेमन ऊपर भुत जटकल रहींस। ईसू हर आगियां देहीस अऊ भुत मन ओमन जग ले निकेल जात रहीस, "अऊ ढ़ेरच धाएर किरलाएके कहत रहिन" "तैं परमेसवर कर बेटा हवस "। भीड़ कर लोग मन अकबकाए जात रहिंन अऊ परमेसवर कर आराधना करत रहींन।

तेकर ईसू हर बारह आदमी ला छांटिस जेमन ला प्रेरित बलात रहीन। ए प्रेरित मन ईसू कर संगे चलत रहींन अऊ ओकर जग सीखत रहींन।

A Bible story from: Matthew 4:12-25; Mark 1:14-15, 35-39; 3:13-21; Luke 4:14-30, 38-44

27. सुघर सामरी कर कहनी

एक दिन यहूदी कानून कर एगोठ ज्ञानी हर ईशु ला परखे कर चलते कहिस "गुरु अनंत जीवन पाए बर मोकेला का करेक परहीं? "ईसू हर कहिस "परमेसवर कर व्यवस्था में का लिखल हवे?

ओ ज्ञानी हर कहीस की परमेसवर हर कहथे "अपन प्रभु परमेसवर जग सबेच हिरदय, प्राण, बल अऊ मन से प्रेम करबे। अऊ अपन पड़ोसी जग अपनेच कस प्रेम करबे। ईसू हर कहिस "तैं सही कहत हस "ओहि कस कर, अऊ तैं जियत रहबे।

लेकिन कानून कर ज्ञानी हर ए देखाय बर होअत रहीस की ओ धर्मी हवे, ओकरेले ओहर पूछिस "मोर पडोसी कौन हवे?

ईसू हर एगोठ कहानी बताये के ओके उत्तर देहीस। एगोठ यहूदी आदमी रहिस जेहर यरूसलेम ले यरीहो कर डगर में जात रहिस।

जेघनी ओ लोग हर यात्रा करत रहीस चोरहा मन ओकर सबेच जाएत ला लूट लेहींन। अऊ ओके अईसन मारिन की ओ दरमरहा होए गईस तेकर ओमन भाएक गईंन।

तेकर पिछु एगोठ यहूदी याजक ओहिच डगर में जात रहिस, जे घरी ओ धर्मी अगुआ हर ओ आदमी ला देखिस, जेके ला लुटे अऊ मारे रहीन। ओ डगर कर दूसर कती ले कगराएके चएल देहीस, अऊ ओ आदमी ला तीहा नई करिस। जेके ला मदद कर जरूरत रहिस।

तेकर चटिक घरी में, एगोठ लेवी ओहिच डगर में आईस। लेवी ,यहूदा मन कर एक गोती रहिस जे मंदिर में याजक मन कर सहयता करत रहिस, लेवी खाल डगर कर दूसर बाट ले भाएग गईस। अऊ ओ लूटल, मारल आदमी ला अनदेखा छोंएड़ देहिस।

ओही डगर में एगोठ सामरी आदमी जात रहिस। सामरी यहूदी मन कर वंश रहिस। जेहर आने जाएत कर लोग जग बिबाह कएर धाएर रहिस। सामरी अऊ यहूदी एक दूसरे जग इसगावत रहीन। लेकिन जेघरि सामरी हर ओ यहूदी ला देखिस, त ओकर ऊपर तरस खाईस। तेकरले ओहर ओ आदमी कर देखभाल करिस, अऊ ओकर घाव में पट्टी बांधीस।

तेकर सामरी हर ओ आदमी ला अपन गधा में चढ़ायेके एगोठ धर्मसाला में ले गईस जेठन सामरी हर ओकर देख रेख करिस।

दूसर दिन सामरी ला अपन यात्रा में आगु बढे बर रहिस। ओहर धर्म साला कर चौकीदार ला चटिक अकन पैसा दे देहिस। अऊ कहिस "एकर देख रेख करबे "अगर तैं एकर बर अऊ पईसा खरचा करबे, त मैं फिरके आहूँ ,त ओला तोके फिराए देहुँ।

तेकर ईसू हर ओ व्यवस्था कर ज्ञानी जग पूछिस "तोके का बुझायिस?ओ लूटल अऊ दरमरहा आदमी बर ए तीनो आदमी में ले सबले सुघर पड़ोसी कौन रहिस?। "ओहर कहीस ओहि जेहर दया करिस। "ईसू हर कहिस "तैं जा अऊ एही कस कर।

A Bible story from: Luke 10:25-37

28. एगोठ जवान धनी आदमी

एक दिन "एगोठ गिरहत आदमी ईसू ठन आईस अऊ ओकर जग पूछिस "गुरु अनंत जीवन पाए बर मोके का करेक परही? ईसू हर ओकर जग कहिस "तैं मोके गुरु कहिके काबर बलाथस? केवल एकेच झन गुरु हवे अऊ ओ परमेसवर हवे अगर तैं अनन्त जीवन पायेबर चाहत हस त परमेसवर कर आगियां ला मान।

ओहर पुछिस मोके कोन आगियां ला मानेक परहीं? ईसू हर कहिस "हत्या मत कर, व्यभिचार मत कर, चोरी झईन कर, झूठ झईन बोल, अपन दाई दाऊ कर आदर कर, अऊ अपन पड़ोसी जग अपनेच कस मया कर।

लेकिन जवान आदमी हर कहिस "मैं तो ए आगियां ला नान बड ले मानत आए हवों। मोके अब अऊ का करके परहीं कि मैं अनत जीवन ला पाये सकों? ईसू ओके देखिस अऊ मया करिस।

ईसू हर कहिस "अगर तैं सिध्द बनेक चाहत हस तो जा अपन सबेच जाएत ला बेंच दे अऊ गरीब मनके बाँएट दे, तोके सवरग में धन मिलही। तेकर आए के तैं मोर पिछु होए ले।

जे घरी जवान हर ईसू कर ए गोईठ ला सुनिस तो ओकर जीव हर ढ़ेरेच दुखाईस, काबर कि ओहर ढ़ेरेच गिरहत रहिस अऊ अपन धन ला छोंड़े बर नई चाहत रहिस। ओ टेढ़ाएके ईसू ठन ले चईल गईस।

तेकर ईसू हर चेला मन जग कहिस "गिरहत ला परमेसवर कर राएज में जाएबर ढ़ेरेच कठिन हवे। परमेसवर कर राएज में गिरहत कर जाएले लिखरी हवे की एगोठ ऊंट हर सुई कर बेदहा ले निकेल जाही।

जे घरी चेला मन ईसू कर ए गोईठ ला सुनिन, त ओमन अकबकाए गईंन, अऊ ओमन पुछिन” फेर कोन बाँएच सकत हवे? “

ईसू हर चेला मन कती देखिस अऊ कहिस "एहर लोग मन ले असम्भव हवे, लेकिन परमेसवर बर जम जाएत संभव हवे।

पतरस हर ईसू ला कहिस "हमन सबेच जाएत छोंएड़ के तोर पिछु आए हवन। हमके का प्रतिफल मिलहीं?

ईसू हर कहिस "जेमन मोर बर घर, भईया, बहिन, दाई, दाऊ, लईका चौवा अऊ सम्पति ला छोंडिस हवे। ओमन के सौगुना मिलही अऊ अनंत जीवन घला मिलही। लेकिन ढ़ेरेच झन जेमन आगू हवें ओमन पिछु होहीं, अऊ ढ़ेरेच झेमन पिछु हवें ओमन आगु होय जांही।

A Bible story from: Matthew 19:16-30; Mark 10:17-31; Luke 18:18-30

29. निर्दयी सेवक कर कहनी

एक दिन पतरस हर ईसू जग पूछीस" प्रभु, मैं अपन भाई ला जे मोर विरूद्ध पाप करथे, ओके मैं कए धाएर क्षमा करहुँ? सात धाएर?ईसू हर कहिस "सात धाएर नहीं, सात कर सतर धाएर। "एकर मतलब का हवे की मैं जम घरी क्षमा करत रहूँ। फेर ईसू हर ए कहनी ला बताईस।

ईसू हर कहिस "परमेसवर कर राएज एगोठ राजा कस हवे जे अपन सेवक मन कर रीन कर हिस्साब लेहेक चाहत रहिस। ओकर एगोठ सेवक कर ढ़ेरेच बगरा रीन रहिस। लगभग 2, 00, 000 बछर कर मजदूरी।

सेवक अपन रीन ला छुटे नई सकत रहिस ओकरेले राजा हर कहिस "ए आदमी अऊ ओकर परिवार ला गुलाम कर रूप में बेंच देवा, अऊ ओ रुपया ले रीन ला भैएर देवा ।

सेवक हर राजा कर आगू में ठेहुँना कर बल गिर गईस अऊ कहिस "चटिक अकन सहे रह, मैं तोर सबेच रीन ला भएर देहुँ " राजा हर ओके ला सोगाईस, ओकर सबेच कर्जा ला माप कएर देहिस अऊ ओके छोड़ देहिस ।

लेकिन जे घरी सेवक हर राजा ठन ले चएल गईस, ओहर अपन एगोठ सेवक ला देखिस जेहर ओकर रीन लेहे रहिस, चाएर महीना कर रीन ओकेला छुटेबर रहिस। सेवक हर अपन साथी ला धरिस अऊ कहिस "मोर पईसा ल फिराए दे।

अइसने कहिस तेकर साथी सेवक अपन ठेहुँना में गिरिस अऊ कहिस " चटीक अकन सहे रह "मैं तोर सबेच रीन ला भएर देहुँ। लेकिन सेवक हर ओके ला थाना में हुरेक देहिस कि जबले ओ सबेच रीन ला भएर नई देही तबले ओ ऊहेँ रही।

चटिक अऊ सेवक मन ए जम जाएत ला देखिन अऊ ओमन अकबकाए गईंन। ओमन राजा ठन जाये के जम जाएत ला बताए देहिंन।

राजा हर सेवक ला बलाये के कहिस "हे दुष्ट दास, मैं तोर रीन ला माफ करें काबर कि तैँ मोर जग विनती करे"। तोके ओहि कस करेक चाही। राजा अब ढ़ेरेच गुस्साए गईस कि ओ दुष्ट दास ला जेहल में हुरेक देहिस, जबले ओ सबेच रीन ला भएर नई देही तबले।

तेकर ईसू हर कहिस "स्वर्गीय दाऊ घला ओही कस करही, ओमन ठन जेमन अपन भाई ला हिरदय ले क्षमा नई करही।

A Bible story from: Matthew 18:21-35

30. ईसू हर पाँच हजार ला खवाईस

ईसू हर प्रेरित मन ला परचार करे बर अऊ सिखाए बर दूसर दूसर गाँव में भेजीस। जे घरी ओमन ईसू ठन फेर आईंन, तो ओमन अपन काम कर बारे में ईसू ला बताईन। तेकर ईसू हर ओमन के नेवता देहीस की ओमन ओकर संगे झील कर ओ पार बिसोय बर एगोठ सुनसान जगहा में जाये। ओकरले ओमन डोंगा में बईठके झील कर ओपार चले गईंन।

लेकिन ढ़ेरेच लोग मन देखिन, की ईसू अऊ ओकर चेला मन डोंगा में जाथें। एकरेले लोग मन झील कर धरि में कूद के झील कर ओपार डोंगा ले आगू पहुँचीन। ईसू अऊ ओकर चेला जे घरी ओजग पहुँचीन, एक बड़खा अकन भीड़ आगू ले पहुंच के ओमन ला अगुरत रहिंन।

भीड़ में सवांघिन अऊ लईका कर छोंएड़ 5, 000 हजार सवांघ रहींन। लोग मन कर ऊपरे ईसू हर सोगे होईस। बिगर चरवाहा कर भेंड़ मन कस ईसू हर ए लोग मन ला समझिस। एकरले ओहर ओमन के सिखाईस अऊ जेमन दुखलिहा रहिन ओमन ला चंगा करिस।

जे घरी सांझ कर जुआर होईस, चेला मन ईसू जग कहिन " अब ढ़ेरेच अबेर होए गईस हवे अऊ एजग कोईच गांव नईये। लोग मन ला भेज देआ की ओमन जाए के काहीं खाए सकें। "

लेकिन ईसू हर चेला मन ला कहीस "तुहींमन ओमन के खाये बार देवा। "ओमन कहींन, "एकस हमरे कईसे कएर सकत ही? हमर जग खाली पाँच ठन रोटी अऊ दुई गोट मछरी हवे।

ईसू हर चेला मन ला कहीस भीड़ कर लोग मन ला घास में पचास पचास कर पाएत में बईठावा।

तेकर ईसू हर पाँच गोट रोटी अऊ दुई गोट मछरी ला लेहीस अऊ सवरग कती ला देखिस, अऊ खाना बर परमेसवर कर धन्यवाद करिस।

फेर ईसू हर रोटी ला टोरिस अऊ मछरी ला टुटकाईस। ओहर ए टुटका ला चेला मन ला देहिस की ओमन लोग मन ला परोसे। चेला मन खाना ला बाँटते गईन अऊ खाना नई सिराईस अऊ सबेच झन खायेके अघाये गईंन।

तेकर पिछू, चेला मन बांचल खाना ला जुटाईन अऊ व बारह पथिया भरीन। सबेच खाना हर पाँच गोट रोटी अऊ दुई गोट मछरी ले आईस।

A Bible story from: Matthew 14:13-21; Mark 6:31-44; Luke 9:10-17; John 6:5-15

31. ईसू पानी कर ऊपरे रेगिस

तेकर ईसू हर चेला मन ला कहीस कि ओमन डोंगा में चढ़के झील कर ओपार जायें, अऊ ओहर लोग मन कर विदाई करिस। भीड़ ला भेजे कर पीछू ईसू परथना करे बर एगोठ पहार में गईस। ईसू ओठन एके झन रहिस अऊ ढ़ेरे राएत ले परथना करत रहिस।

ओघरि चेला मन अपन डोंगा ला चलात रहींन, आधा राती तक ओमन झील कर मंझारे बस फहुंचिन। ओमन ढ़ेरेच मेहनत करके डोंगा ला चलाये कर कोशिस करत रहिंन। काबर की हवा ओमन कर विरोध में रहिस।

ईसू हर परथना करे कर पिछु ओ अपन चेला मन जग गईस। ओ झील कर पानी कर ऊपरे रेंग के ओमन कर डोंगा कती जात रहिस।

चेला मन ईसू ला देखके ढ़ेरेच डराए गईंन, काबर की ओमन सोचीन की ओमन काहींभुत ला देखत हवें। ईसू जानत रहिस की ओमन डराये गईंन हवें, ओकरेले ओ किरलाए के कहिस "मत डरावा ऎजग मैं हवों।

तेकर पतरस हर ईसू जग कहिस "स्वामी, अगर तैँ हवस ता मोके आगियां दे की मैं पानी में रेंगके तोर जग आए। ईसू हर पतरस ला कहीस, "आओ।

ओही घरी, पतरस डोंगा ले उतरिस अऊ पानी में रेंगत रेंगत ईसू ठन जात रहिस। लेकिन चटिक अकन रेंगिस तेकर ओ अपन आँएख ला ईसू कती ले हटाईस अऊ आँधी अऊ पानी लहर ला देखे लागीस।

तेकर पतरस डराये गईस अऊ पानी में बुडे लागिस। ओहर किरलाईस, " स्वामी मोके बचाए ले। " झटके यिशु हर हाँथ बढ़ाएके ओकेला धएर लेहिस तेकर ओ पतरस ठन कहिस, "हे अल्प विसवासी, तैँ संदेह काबर करे?"

जेघनी पतरस अऊ ईसू डोंगा में चएढ़ गईंन, आँधी हर एकेचदाएर रुक गईस अऊ पानी हर शांत होए गईस। चेला मन अकबकाए गईन। ओमन ईसू कर आराधना करिन एकस कहिके की, "सहीच मेंतैँ परमेसवर कर बेटा हवस।

// बाइबल क कहानी से लेहल गइसे मत्ती १४: २२ -३३ ; मरकुस ६: ४५-५२ ; यूहन्ना ६: १६-२१ //

32. भुत जटकल लोग अऊ दुखलिहा सवाँघिन ला ईसू चंगा करथे

एक दिन ईसू अऊ ओकर चेला मन झील कर ओपार डोंगा में जात रहिन जिन्हा गिरसेन कर लोग रहत रहिंन।

जे घनि ओमन झील कर ओपार पहुँचीन एगोठ भुत जटकल आदमी ईसू जग कूदत कूदत आईस।

ओ आदमी हर एतना ताकतदार रहिस की कोनो ओके धरे नई सकत रहिन। लोग मन ओकर हाँथ गोड़ ला संखड़ी में बाँएध देहत रहिन, लेकिन ओला ओहर टोएर देहत रहिस।

ए आदमी हर ओ पारा कर मरघेटिया में रहत रहिस। ओ सबेच दिन अऊ रात किरलात रहिस। ओ कपड़ा नई पहिरत रहिस अऊ पखना में अपने अपन ला मारत रहिस।

जेघिन ओ आदमी हर ईसू जग आईस, अऊ ईसू कर आगु में ठेहुँना कर बल गिर गईस। ईसू हर ओ भुत ला कहिस, " ए आदमी कर भीतर ले निकेल जा। "

ओ आदमी जेकर भीतरी भुत रहिस ढ़ेरेच जोर से किरलाए के कहिस "परम प्रधान परमेसवर कर बेटा ईसू, तैं मोर ठन का करेक चाहत हस? मोके दुःख मत दे। " तेकर ईसू हर भूत जग पूछिस, "तोर का नाव हवे?"ओहर कहिस मोर नाव लिगियोन हवे, काबर की हमरे ढ़ेरेच बगरा हवन। "( रोमी सेना में कुछ हजार सैनिक कर खईरखा ला "लिगियोंन कहत रहिन। )

भुत मन ईसू जग परथना करिन की, "हमन के ए पारा ले बहरी मत भेज, । " लिघे कर एगोठ घूँटरी में चटिक अकन सूअर चरत रहिन। भुत मन ईसू जग परथना करिन की, "हमन के ओ सूअर कर ऊपरे जाये दे।"ईसू हर कहिस जा।"

भुत मन कर खईरीखा हर ओ आदमी ले निकेल के सूअर मन कर ऊपरे ढुईंक गईंन।। सूअर कर खईरखा झील में जाएके बुईड़ के मर गईंन। ओ खईरखा में लगभग २००० सूअर रहिंन।

जेमन सूअर कर देखभाल करत रहिंन ओमन देखिन की का होईस अऊ ओमन कूदके गाँव में गईंन अऊ सबेच झन ला बताईंन की ईसू हर का करिस हवे। गाँव ले लोग मन आईंन अऊ ओमन ओ आदमी ला देखिन जेकर भीतरी भुत रहत- रहिस। ओ आराम से बईठे रहिस, कपड़ा पहिनेरहिस अऊ एगोठ सीधा साधा आदमी कस व्यवहार करत रहीस।

लोग मन ढ़ेरेच डराए गये रहिंन अऊ ओमन ईसू ला जाये बर कहिन। ईसू डोंगा में चढ़के जायेबर संपरत रहिस। ओ आदमी जेके भुत धरे रहिस ओहर विनती करिस की ओ ईसू कर संगे जाएक चाहत हवे।

लेकिन ईसू हर ओकेला कहिस, "नहीं, मैं चाहत हवों की तैँ अपन घरे जा, अपन परिवार अऊ संगता मन ला ओ सबेच जाएत ला बता जे चीज परमेसवरतोर बर करिस हवे। अऊ कईसे तोर ऊपर दया देखाईस हवे।

तेकर ओ आदमी हर चईल गईस अऊ सबेच झन ला बताईस की ईसू हर ओकर बर का करिस हवे। जेमन ओकर कहनी ला सुनीन ओमन अकबकाए गईन।

ईसू झील कर ओपार फेर गईस। ओमन ओठन पहुँचिन तेकर पिछु, एगोठ बड़खा भीड़ ओकर चारिओंकती ले जुटिस अऊ भीड़ हर ईसू ला ठेल देहत रहिस। भीड़ में एगोठ सवांघिन रहिस जेके बारह बछर ले लहू बहे कर दुःख रहिस। ओ अपन सबेच पईसा रुपिया ला बईध, मन के दे देहे रहिस की ओमन ओकर दुःख ला छुटुवाए सकें, लेकिन ओकर दुःख हर बढत गईस।

ओहर सुने रहिस की ईसू दुःखलिहा मन ला चंगा करथे अऊ ओहर सोंचिस, "अगर मैं ईसू कर ओढ़ना ला छुए सईक देहुँ तो मैं चंगेच होए जाहूँ। "ओकरेले ओ ईसू ठनआईस अऊ ओकर ओढ़ना ला छुईस। जईसनेच ओहर ईसू के छुईस, लहू बहाई बंद होए गईस।

ईसू हर तुरन्त जाएंन गईस की ओकर भीतरी ले सामर्थ निकेल गईस हवे। एकरले ओ किन्देर के पूछिस, "कोन मोके छुईस हवे?चेला मन कहिन, "ए भीड़ में एतेक बगरा लोग हवे अऊ ओमन् तोके ठेलत हवों। तैँ काबर पूछत हस की मोके कौन छुईस।

ओ सवांघिन हर ईसू कर आगू में ठेंऊंगना कर बल गिर गईस, ओहर डराये गए रहिस अऊ कांपत रहिस। तेकर ओहर कहिस ओ का करे रहिस, अऊ की ओहर चंगा होए गये रहिस। ईसू हर ओकर ठन कहिस, "तोर बिसवास हर तोके चंगा करिस हवे। बढ़िया से जा।

A Bible story from: Matthew 8:28-34; 9:20-22; Mark 5:1-20; 5:24b-34; Luke 8:26-39; 8:42b-48

33. किसान कर कहनी

एक झील कर धरी में ईसू एगोठ बड़खा भीड़ कर लोग मन ला सिखात रहीस।ढ़ेरेच बगरा लोग मन ईसू कर गोईठ ला सुने बर आईन। तेकर ईसू डोंगा में चईड़के जेहर धरी मे रहीस, ओमन जग गोठियाए लागीस, ओ डोंगा में बईठ के लोग मन ला सिखाए लागीस।

ईसू हर एकठे कहनी ला बताईस" एगोठ किसान रहीस जेहर बिहन बुने बर निकलीस। जे घरी ओ बिहन ला अपन हाँथ से बुनत रहीस चटिक बिहन हर डगर में गिर गईस अऊ चराई मन आएके ओ सबेच बिहन ला खाये देहीन ।

"चटिक बिहन हर पखनोरिहा जमीन में गिरिस, जेठन बगरा माटी नई रहिस। पखनोरिहा जमीन में गिरल बिहन हर हालु जागीस, लेकिन ओकर जएर हरजमीन कर खालहे नई ऊतर पाईस। जे घनि बेर ऊगीस अऊ घाम होईस, ए पौधा हर झुराए के मर गईस।"

"चटिक अऊ बिहन हर कंटादार झाड़ी कर मंझारे गिरिस। ओ बिहन हर बाढ़े लागीस लेकिन कंटा हर ओके ठेल देहिस। ओकरेले कंटादार झाड़ी कर मंझारे गिरल बिहन ले काँहिच जाएत नई होईस।

"चटिक अऊ बिहन हर कंटादार झाड़ी कर मंझारे गिरिस। ओ बिहन हर बाढ़े लागीस लेकिन कंटा हर ओके ठेल देहिस। ओकरेले कंटादार झाड़ी कर मंझारे गिरल बिहन ले काँहिच जाएत नई होईस।

ए कहनी हर चेला मन ला गड़बड़ी में डाएल देहिस। ओकरेले ईसू हर समझाईस, " बिहन परमेसवर कर वचन हवे। डगर ओ आदमी हवे जेहर परमेसवर कर वचन ला सुनथे, लेकिन नई समझे, अऊ सैतानहर वचन ला ओकर ठन ले चोराये लेथे। "

पखनोरिहा जमीन ओ आदमी हवे जेहर परमेसवर कर वचन ला सुनथे अऊ ढ़ेरेच आनन्द से मानथे। लेकिन जेघरि ओहर मुश्किल अऊ सताव ठन लड़थे, त बिसवास ले हट जाथे।

"कन्टादार झाड़ी ओ आदमी हवे जेहर परमेसवर कर वचन ला सुनथे, लेकिन जईसने समय बितत जाथे, चिन्ता, धन, दौलत अऊ जीवन कर अभिलाषा कर चलते परमेसवर कर वचन बरीक ओकर प्रेम कम होए जाथे। ओकरेले, वचन ओकर भीतरी फल नई लाएन सके। "

"लेकिन बढ़िया माटी ओ आदमी हवे जेहर परमेसवर कर वचन ला सुनथे, अऊ बिसवास करथे, अऊ फल लानथे।

A Bible story from: Matthew 13:1-8, 18-23; Mark 4:1-8, 13-20; Luke 8:4-15

34. ईसू आने कहनी ला सुनाथे

ईसू हर परमेसवर कर राएज कर बारे में ढ़ेरेच अकन कहनी ला बताईस। उदाहरण बर, ओहर कहिस, "परमेसवर कर राएज राई कर बिहन कस हवे जेला कोनो हर अपन खेत में लगाईस। तुमन जानता की राई कर दाना सबले छोटे दाना हवे।

लेकिन जेघनी राई कर दाना हर बाड़थे, त ओहर बगीचा में सब पौधा ले बड़खा बाड़थे, एतरा बड़खा की चराई मन ओकर डार में रहे लागथे।

ईसू हर एक अऊ कहनी ला बताईस. "परमेसवर कर राएज मीठा सोडा कस हवे जेला एगोठ सवांघिन हर अपन आँटा में मेसाए देथे अऊ ओहर सबेच आँटामें बगर जाथे। "

"परमेसवर कर राएज एगोठ गाड़ल धन कस हवे जेला कोनो हर जमीन में लुकाये रहिस। एगोठ दूसर आदमी हर ओ खजाना ला देख के ओला फेर लुकाए देहिस। ओहर एतेक ख़ुशी से भर गईस की ओहर जाएके अपन सबेच जाएत ला बेंच के ओ रूपया में खेत ला खरीद लेहिस।"

"परमेसवर कर राएज एगोठ सिध्द मोती कस हवेजेकर ढ़ेरेच बगरा दाम हवे। जे घनि एगोठ मोती कर व्यापारी हर ओला देखिस, तो ओहर अपन सबेच जाएत ला बेंच के ओहर ओला खरीद लेहिस।"

फेर ईसू हर एगोठ कहनी ओ लोग मन बर कहिस जेमन अपन बढियां काम में भरोसा करत रहींन अऊ आने झन कर निंदा करत रहींन। ओहर कहिस, " दुईगोट आदमी मंदिर में परथना करे बर गईंन। एगोठ चुंगी लेह वाला रहिस अऊ दूसर हर धारमिक अगुआ रहिस। "

"धारमिक अगुआ हर एकस परथना करिस, 'परमेसवर , धन्यवाद, की मैं अऊ पापी आदमी मन कस नई हवों ओ चोर, अन्यायी, व्यभिचारी, या ओ चुंगी लेहेवाला कस नई हवों।"

"मैं हप्ता में दुई धाएर उपवास करथों अऊ अपन रुपया अऊ सबेच जाएत कर दसवां हिस्सा देथों।

"लेकिन चुंगी लेहेदार धारमिक अगुआ ठन ले दुरिहां ठड़होए रहिस, ओहर सवरग कती अपन मुड़ ला नई उठाईस। ओकरले ओहर अपन छाती पिट पिटके परथना करीस, 'परमेसवर , मोर ऊपर दया कर काबर की मैं एगोठ पापी हवों।"

तेकर ईसू हर कहिस, "मैं तुमन जग सही सही कहथों, परमेसवर हर चुंगी लेहे दार कर परथना ला सुनिस अऊ ओके ला धर्मी बनाईस। लेकिन धारमिक अगुआ कर परथना ले परमेसवर खुश नई होईस। हरेक घमण्डी मन ला परमेसवर नम्र बनाही, अऊ जेमन अपने आप ला नम्र बनाही ओके परमेसवर उठाही। "

A Bible story from: Matthew 13:31-33, 44-46; Mark 4:30-32; Luke 13:18-21; 18:9-14

35. एगोठ दयालु पिता कर कहनी

एक दिन ईसू कईयों ढे चुंगी लेहेदार अऊ आने पापी मन ला सिखात रहिस। जेमन ओकर गोईठ ला सुनेबर आए रहिंन।

चटिक धारमिक अगुवा मन, जेमन ओजग रहिंन, तेमन देखिन की ईसू हर ए पापी मन जग संग साथी मन कस व्यवहार करत हवे, ओमन अपने में ईसू कर बुराई करे लागिन। ओकरेले ईसू हर ओमन के एगोठ कहनी ला सुनाईस।

"एगोठ बाप कर दुईगोट बेटा रहिस। छोटे बेटा हर दाऊ ठन कहिस, दाऊ मोके अपन बाँटा हिस्सा अझे चाही। ओकरेले दाऊ हर अपन सम्पति ला अपन दुनों बेटा में बाँट देहिस।"

"ढ़ेरेच् हालु छोटे बेटा हर अपन सबेच जाएत ला संजोएर के दुरिहां चएल देहीस अऊ अपन रुपया पैसा ला अपन जीवन में पाप करके सिरवाये दारिस। "

"ओकर पीछु जीहाँ ओ छोटे बेटा हर रहत रहिस ऊहाँ जबरजस अकाल पड़ीस, अऊ ओकर जग भोजन लेहे बर पईसा रुपया नई रहिस। ओकरेले ओहर बरहा चराये कर काम करे लागीस, अऊ कोई दूसर काम ओके नई भेंटाईस। अऊ ओहर एतेक भूखे अऊ सोग-सोगान रहिस की ओहर बरहा कर खाना ला खाएक चाहत रहिस। "

आखरि में, छोटे बेटा हर अपने अपन जग कहिस, ए मैं का करत हवों? मोर दाऊ कर सबेच नोकर मन जग खाए बर ढ़ेरेच जाएत रहते, अऊ मैं ईहाँ भुखे हवों। मैं अपन दाऊ ठन फेर जाहूँ अऊ ओकर ठन कहूँ मोके अपन नोकर कस राएख ले।

"एही कस छोटे बेटा अपन दाऊ कर घर कति जाए बर निकेल गईस। जेघनी ओ दुरिहेंच रहिस, ओकर दाऊ हर ओकेला देखिस अऊ ओके ला सोगाईस। दाऊ हर अपन बेटा जग कूईद के गईस अऊ ओकेला चुमहिस। "

"बेटा हर कहिस, 'दाऊ, मैं परमेसवर कर विरुद्ध में अऊ तोर विरुद्ध में पाप करे हवों। मैं तोर बेटा कहाए लाएक नई हवों। "

"लेकिन बाप हर अपन नोकर में ले एक झन ला कहिस, हालु के जा अऊ सबले सुघर ओढ़ना ला लान अऊ मोर बेटा ला पहिराए दे। ओके ला मुंदी पहिरावा अऊ जूता ला भी पहिरावा। तेकर सबले बढ़िया बोकरा ला मारा ताकि हमरे एगोठ तिहार कस मनाए सकी, काबर की मोर बेटा मएर गए रहिस, लेकिन अब जिन्दा हवे। ओहर भुलाए गए रहिस, लेकिन अब ओहर भेंटाये गईस हवे। "

"एही कस लोग मन आनन्द मनाएक लागीन। चटिक जुआर में बड़खा बेटा हर खेत कर काम बुता ला सिरवाये के घरे आईस। बाजा बाजत अऊ नाचत गावत सुनीस अऊ अकबकाएगईस की का होअत हवे। "

"जे घनि बड़खा बेटा हर सही पाईस की ओकर भाई हर फेर आईस हवे तेकर चलते सब कोई आनन्द मनात हवें, त ओहर ढ़ेरेच गुस्साए गईस अऊ अपन घर कर भीतरी जाए बर नई करिस। ओकर दाऊ हर बहरी आए के ओकर ठन विनती करे लागीस की ओ भीतरी आये अऊ ओमन कर संगे आनन्द मनाये, लेकिन ओहर इनकार कर देहीस। "

"बड़खा बेटा हर अपन दाऊ ठन कहिस, 'ए सबेच बछर में मैं तोर बर पुरा बिसवास कर संगे बुता काम करें। मैं कभों तोर आगियां ला नई टोंरें हवों, तबोले तैं मोके कभोंच एकठे छोटे अकन बोकरा तक नई देहे की मैं अपन संगता मन जग जाये के आनन्द मनाये सकों। लेकिन तोर ए बेटा जेहर तोर सबेच रुपया पैसा ला अपन जीवन में पाप करके सिरवाये देहिस, अऊ घरे फिर के आईस, त तैं ओकर बर सबले सुघर बोकरा ला मारे। ""

"ओकर दाऊ हर कहिस, 'मोर बेटा, सब घरी तैं मोर संगे हवस, जे जाएत मोर ठन हवे ओ सब तोर हवे। लेकिन अब हमर बर सुघर एहर होहीं की हमरे आनन्द मनाई, काबर की तोर भाई मर गए रहिस, लेकिन अब जियत हवे। ओ भुलाये गए रहिस, लेकिन अब भेंटाये गईस हवे। "

A Bible story from: Luke 15:11-32

36. रूप हर बदलीस रुपांतरण

एक दिन, ईसू अपन तीन गोट चेला पतरस, यूहन्ना अऊ याकूब ला लेके गईस। ( यूहन्ना जेहर ईसू कर चेला रहिस ओहर ईसू के बपतिसमा देहेवाला यूहन्ना नई रहिस। ) ओमन एगोठ ऊँच पहार में गईंन की परथना कर सकें।

जेघनी ईसू परथना करत रहिस, ओकर आँएख मुंह हर बेर कस चमकेलागीस अऊ ओकर कपड़ा हर इंजोर कस उजर होए गईस, एतेक उजर की संसार में कोनोच कपड़ा ला ओतेक उजर नई बनाये सकही।

तेकर मूसा अऊ एलिय्याह अगमजानी प्रगट होईन। ए आदमी मन धरती में सैंकड़ो बछर आघु रह धाएर रहींन। ओमन ईसू कर संगे ओकर मरे कर गोठ गोठियात रहिंन। जेहर हालुच यरूशलेम में होए वाला रहीस।

जेघनी मूसा अऊ एलिय्याह ईसू कर संगे गोठियात रहीन, पतरस हर ईसू ठन कहिस, " हमर बर एहर बढियां रही की हमरे एही जग रही। हमरे तोर बर तीन गोट तम्बू बनाएक चाहत ही, एगोठ तोर बर, एगोठ मूसा बर, अऊ एगोठ एलिय्याह बर। " पतरस नई जानत रहिस की ओमन का गोठियात रहिंन।

जेघनी पतरस ए गोईठ ला गोठियात रहिस, एगोठ उजर बदरी हर आईस अऊ ओमन के छेंक लेहिस अऊ ओ बदरी ले आवाज आईस, "ए मोर प्रिय बेटा हवे। मैं एकर से खुश हवों। एकर सुना। "तीनों चेला मन डराये गईंन अऊ भुंइया में गिर गईंन।

तेकर ईसू हर ओमन के छुईस अऊ कहिस, "मत घबरावा। उठ जावा। "जेघनी ओमन चारिंयो कती देखिन, तो खाली ईसू ओजग रहिस।

ईसू अऊ तीनों चेला मन पहार ले खालहे उतेर गईंन। तेकर ईसू ओमन जग कहिस, "जे जाएत ऐठन होईस ओकर बारे में कोईच के झईन बतईहा। मैं मर जाहूँ अऊ फेर जी ऊठ हूँ। ओकर पिछु, तुमन लोग मन ला बताए सकथा। "

A Bible story from: Matthew 17:1-9; Mark 9:2-8; Luke 9:28-36

37. इसु मरल लाजर ला जियाईस

एक दिन कर दिन में ईसू जग खबर पहूँचीस की तोर दोस्त लाजर ढ़ेरे बीमार हवे। लाजर अऊ ओकर दुई ठे बहिन मरियम अऊ मार्था ईसू कर बढिया दोस्त रहीन। जे घरी ईसू हर ए खबर ला सुनीस ओ घरी ओ कहीस की “ए बीमारी ले मौत नई होहीं तेकरले परमेसवर कर महिमा होहीं। हर अपन दोस्त ला ढ़ेरेच मया करत रहीस, एकरले ईसू अऊ दूई दिन ले गाव में रहले रहीस।

दूई दिन कर पाछू ईसू हर अपन चेला मन जग कहीस, “यहूदिया गाव में चला चली” लेकिन चेला मन कहीन “प्रभु चटिक दिन कर आगु यहूदिया गाव कर आदमी मन तुहं के ला मारेबर करत रहीन। ” ईसू हर कहीस “हमर दोस्त लाजर सूत भूलाईसे ओके जायके हमरे जगाबो। ”

ईसू कर चेला मन ईसू जग कहीन “गुरु अगर लाजर सूत गईस हवे त का ओ ठीक हो जाही। ” त ईसू हर अपन चेला मन जग कहीस की “लाजर मर गईस हवे, मैं खुस हवों कि में ओ जग नई रहे, एकरले तुमन मोर ऊपर बिसवास करिहा”।

जे घरी लाजर कर गाव में ईसू पहुंचीस ते घरी लाजर ला मरे चार दिन होए गए रहीस। मार्था हर ईसू जग मिले बर गईस अऊ कहीस की “प्रभु अगर तैं इहां रहते त मोर भाई नई मरतीस लेकिन मैं परमेसवर में बिसवास करथों कि तैं जे जाएत पिता जग मांगबे वो जम जाएत तोके देही। ”

ईसू हर उत्तर देहीस की “पुनारुधान अऊ जीवन मैं ही हवों, जे कोई मोर ऊपर बिसवास करही अगर ओहर मर भी जाही फेर भी जिन्दा रही। जे कोई मोर ऊपर बिसवास करही ओहर कभो नई मरही। तएं का परमेसवर कर ऊपर बिसवास करथस? ” मार्था हर कहीस “हाँ प्रभु मैं बिसवास करथो कि तैं परमेसवर कर बेटा मसीहा हवस”

ते घरी मरियम ऊहाँ पहुंछिस अऊ ईसू कर गोड में गीरके कहीस की “प्रभु तैं इहाँ रहते त मोर भाई नई मरतीस। ” ईसू हर ओकर जग पूछिस की “तुमन लाजर ला कहा जग राखे ? ” ओमन कहीन की “मरघट में, जाएके देखले” ते घरी ईसू रोए दारीस।

मरघट एगोट माडा रहीस अऊ ओकर दुरा में एक ठे पकना मडहाल रहीस। ईसू हर जे घरी मरघट में पहुंचीस त कहीस की “पखना ला हटाए देआ। ” लेकिन मार्था हर कहीस “ओला मरे ले चार दिन हो गईस हवे, ओहर ढ़ेरे घिनक महखत होहीं।

ईसू हर उत्तर देहीस “मैं तोके कहे रहे की तैं परमेसवर पर बिसवास करबे त परमेसवर कर महिमा ला देखबे। ” ए गोएठ ला सुन के ओमन पखना ला हटाए देहीन।

फेर ईसू हर सवरग कती ला देख के कहीस “पिता मोके सुने बर धन्यवाद। मैं जानथो की तए सब घरी मोर सुनथस। लेकिन मैं ए जग कर ठढोवल आदमी मन बर गोढ़ीयाथों की एमन बिसवास करे की तैं मोके भेजे हवस। फेर ईसू हर ढ़ेरेच जोर से चिक्ररिस “लाजर बाहर निकल आओ”।

ते घरी लाजर कफन कर ओढ़ना घाएल बहिरे निकलीस। ईसू हर कहीस की “ओकर मदत करा, ओकर कफन ला निकाल देवा अऊ ओके अजाद कर देवा। ए चमतकार ला देख के नागदेच यहूदी मन ईसू कर ऊपर बिसवास करीन।

लेकिन यहूदि धारमिक अगुवा मन ईसू ला देख के इसगावत रहीन अऊ एकरले ओमन एकजूट होएके उपाय करे लागिन कि का नियर हमरे ईसू अऊ लाजर ला मारी।

A Bible story from: John 11:1-46

38. इसु ला धरवाईन

ढ़ेरे बछर कर आगू परमेसवर येहुदी मन कर पूरखा मन ला मिस्र कर गुलामी ले छुडाये रहीस ओकर सुरता में येहूदी मन सबेच साल फसह का तिहार मनावत रहीन। तीन बछर कर सेवकाई कर पाछु ईसूमसि चेला मन जग कहिस कि “मैं येरूशलेम में तुमन संगे फसह का तिहार मनाए बर चाहत हवों” अऊ प्रबू ईसू हर ए गोइठ ला भी कहीस कि “ऊहाँ मोके मारहीं। ”

ईसू कर चेला मन में एक झे यहूदा इस्करियोती नाव कर चेला रहीस। यहूदा प्रेरित मन कर रूपया पैसा ला धरत रहीस। लेकिन ओहर पैसा कर लालची रहीस अऊ पैसा ला चोरावत रहीस। ईसू अऊ ओकर चेला मन ला येरुसलेम में पहुंचे कर पाछू यहूदा इस्करियोती यहूदी अगुवा मन जग भेट कर के कहीस “मोके तुमन पैसा देइहा त मैं ईसू ला पकडवाए देहूं। ” यहूदा इस्कारीयोती जानत रहीस की यहूदी अगुवा मन ईसू ला छोड़ाएवाला नई मानत रहीन। ओमन ओके मारे कर कोसिस करत रहीन।

जेकस अगमजानी मन कहे रहीन ओही कस यहूदी महायाजक अगुवा मन ईसू ला पकडवाए बर यहूदा इस्करियोती ला तीस ठे चांदी कर सिक्का देहीन। यहूदा हर ए बात ला मान गईस अऊ पैसा लेके चल देहीस। ईसू ला पकडवाएबर ओहर दांव खोजत रहीस।

येरूशलेम में ईसू हर अपन चेला मन कर संगे फसह कर तिहार मनावत रहीन। फसह कर खाना खाए घरी ईसू हर रोटी ला लेहीस अऊ टोरीस अऊ कहीस की “एला लेआ अऊ खा, ए मोर देह लागे, जेला मैं तुमन के देहथों। मोर सुरता में तुमन यही कस करिहा। यही कस ईसू हर कहीस की ओकर सरीर हर ओमने बर बलिदान में चघाल जाही।

फेर ईसू हर कटोरिया ला उठाईस अऊ कहीस की “एला लेआ अऊ पिआ। ए नावा कानून कर खून हवे; जेला पाप कर क्षमा बर ऊझलल जाथे। जे घरी तुमन ए कटोरिया ले पिहा त मोर सुरता करीहा।

फेर ईसू हर अपन चेला मन जग कहीस की “तुमन में ले एक झन मोके पकडवाही। ” ए गोएठला सुन के चेला मन अचम्भा करीन अऊ पूछीन “एकस काम ला कौन करही। ” ईसू हर कहीस की “जे आदमी ला मैं ए रोटी कर टूटका ला देहु, ओही आदमी हर मोके पकडवाही। फेर ईसू हर रोटी ला यहूदा ला देहिस।

जे घरी चेला मन रोटी खाईन ओ घरी यहूदा कर भीतरी सैतान हर घुसीस। ईसू ला बांधे बर यहूदी अगुवा मन कर सहायता करे बर यहूदा हर गईस। ओ घरी राती रहीस।

बियारी कर पाछू ईसू अऊ ओकर चेला मन जैतून कर पहार में चएल गईन। ईसू हर ओमन जग कहीस कि “आएज राती तुमन जम झन मोके छोड़ देइहा। लिखल हवे “मैं चरवाहा ला मारहूँ अऊ जम भेड छिदिर-बीदर होए जाहीं। ”

पतरस हर जवाब देहीस की “जम झे तोके छोड़ देही लेकिन में तोके नई छोडो। ” ते घरी ईसू हर पतरस जग कहीस सैतान तुमन जम झेला हरुवाए बर चाहथे। लेकिन मैं तुमन बर परथना करे हवों पतरस की तोर बिसवास हर झईन टूटे। लेकिन आएज राती मुर्गा बासे कर आगू तैं मोके तीन दायर कबे की मैं ईसू ला नई जानो।

पतरस हर ईसू जग कहीस “मोके अगर मरे बर भी परही, तबोले मैं तोके नई छोडहूँ। जमेच चेला मन एही कस कहीन।

ते घरी ईसू अपन चेला मन कर संगे गतसमनि नाव कर जगहा में गईन। ईसू हर अपन चेला मन जग कहीस तुमन परथना करा की परीक्षा मैं झईन परा। फेर ईसू एकेझे परथना करे बर गईस।

ईसू हर तीन दाएर ले परथना करीस “ए पिता अगर तैं चाहत होबे त ए दु:ख कर कटोरा ला मोर जग ले हटाये दे। लेकिन अगर आदमी मन कर पाप कर क्षमा बर कोई दूसर डगर नई ए तो तोर मर्जी पूरा होए। ईसू हर ढ़ेरे अकबकाए गये रहीस। ओकर पसीना हर लहू कर बून्द कस धरती में चुवत रहीस अऊ ओके बल देहे बर परमेसवर सवरग दूत मन ला भेजीस।

हर दाएर ईसू हर परथना करे बर जाथे अऊ आएके अपन चेला मन ला देखथे त ओमन सूतत रथे। जे घरी ईसू हर तीन दाएर परथना करे कर पाछू अपन चेला मन ला जगाईस अऊ कहीस की “उठा की मोके पकडेवाला मन आए गईन हवें। ”

यहूदा हर यहूदी अगुवा, सैनिक अऊ ढ़ेरे बगरा भीड़ कर संगे ओ जगहा पहूँचिस। ओमन तलवार अऊ लाठी धएर के आईन। यहूदा ईसू जग आएके नमस्कार करीस अऊ ओके चूमहीस। यहूदी अगुवा मन बर एही ओ चिन्ह रहीस की ओमन चिन ले की काके ला धरेबर हवे। ईसू हर यहूदा जग पूछिस “का तैं चूमा लेके मोके पकडवाबे?”

जे घरी सीपाही मन ईसू ला पकडीन ओ घरी पतरस हर अपन तलवार निकालके एक ठे महा याजक कर सेवक कर कान ला काट देहीस। ईसू हर कहीस की “अपन तलवार ला स्थान में रख ले। में अपन पिता ले सवरग दूत कर सेना ला मोके बचाए बर मांग सकत हो। लेकिन मोके अपन दाऊ कर आगियांकारी होए बर हवे। फेर ईसू हर ओ आदमी कर कान ला चंगा करीस। ईसू ला पकडे कर बाद जम चेला मन भाएग गईन।

A Bible story from: Matthew 26:14-56; Mark 14:10-50; Luke 22:1-53; John 12:6; 18:1-11

39. ईसू कर जाँच परख

ओतना घरी आधा राती रहीस। सिपाही मन ईसू ला जाच परक करे बर महा याजक जग ले गईन। ओही घरी पतरस हर दुरिहा ले ओकर पीछु पीछु आवत रहीस। जे घरी ईसू ला घर कर भीतरी ले गईन ते घरी पतरस हर बैहरी कती आगी तापत रहीस।

घर कर भीतरी यहूदी अगुवा मन ईसू कर जाच करीन। ईसू कर बारे में झूट बोले बर ओमन ढ़ेरे अकन झूटा गवाह मन ला लानीन। लेकिन ओमन कर गोईठ हर एक दूसर झन ले ताल मेल नई होईस। एकरले यहूदी अगुवा मन ईसू कर कोनों बात में दोसी नई ठहराए पाईन काबर की ईसू हर काहीं गलती नई करे रहीस।

सब ले पाछू महा याजक हर इटोर के ईसू कती देखीस अऊ पूछीस की “हमके मनला बता का तैं जीवित परमेसवर कर बेटा मसीहा हवस?”

ईसू हर कहीस “मैं हवों अऊ तैं मोके परमेसवर कर संगे बईठल अऊ सवरग ले आवत देखबे। एकरले महा याजक हर गुस्सा में अपन ओढना ला चीर देहीस अऊ दुसर अगुवा मन ला चिकर के कहीस “हमन मनला अऊ गवाह मन कर काही जरूरत नई हवें। तुमन मन सुन लेहे हा ईसू हर कहीस की ओहर परमेसवर कर बेटा लागे। अब तुमन कर का फैसला हवें।

जम यहूदी अगुवा मन महा याजक ला उत्तर देहीन “एहर तो मृत्यु कर लाईक हवें। फेर ओमन ईसू कर आंएख में पट्टी बाँध देहीन अऊ ओकर ऊपर थूकीन, ओके मारीन अऊ ओकर मजाक उडाईन।

पतरस हर घर कर बहिरे ढडहोए रहीस। एक ठे दासी हर ओके कहीस “तहूँ तो ईसू कर संगे रहे?” पतरस हर कहिस की “में नई रहें। ” तनिक जुवार कर पाछू एक दुसर दासी हर ओही गोईठ ला कहीस। पतरस हर फेर कहीस की “में नई रहें”। सब ले पाछू आदमी मन कहीन की “हम जानत हन की तैं ईसू कर संग रहे काबर की तुमन दुनों झे गलील कर लागा।

पतरस हर किरिया खाईस अऊ कहीस "अगर मैं एके जानत होहूँ त परमेसवर हर मोके सराएप दे। ” एकेच दाएर मुर्गी हर बासीस अऊ ईसू हर पीछू कती किन्देर के पतरस ला देखीस।

पतरस हर ओ जग ले चल देहीस अऊ सिसक सिसक के रोए लागीस। यहूदा हर देखीस की यहूदी अगुवा मन ईसू ला मारे कर फैसला करीन हवे। एला देख के यहूदा कर जीव में ढ़ेरे दुख लागीस अऊ जाएके फसियाए के मर गईस।

पतरस हर ओ जग ले चल देहीस अऊ सिसक सिसक के रोए लागीस। यहूदा हर देखीस की यहूदी अगुवा मन ईसू ला मारे कर फैसला करीन हवे। एला देख के यहूदा कर जीव में ढ़ेरे दुख लागीस अऊ जाएके फसियाए के मर गईस।

ईसू हर उत्तर देहीस “तैं अपने अपन कहत हवस, लेकिन मोर राएज धरती कर राएज नई हवे। अगर होतीस त मोर सेवक मन मोर बर लड़तीन। में ए प्रथ्वी में परमेसवर कर सच्चाई ला बताए बर आये हवों। जे सत्य ले मया करथे ओ मोर गोईठ ला सुनथे। ” पीलातूस हर पूछीस कि “सत्य का हवे?”

ईसू कर संग गोठियाए कर बाद पीलातूस भीड़ जग जाएके कहीस “मैं ए आदमी में काही दोष नई पाएं। लेकिन यहूदी अगुवा मन अऊ भीड़ हर चिकर के कहीन की “एके क्रूस में चढ़ावा”। पिलातूस हर उत्तर देहीस की “एहर काही गलती नयी करिस हवे अऊ ओमन जोर जोर से किरलाईन। फेर पिलातूस हर तीन दाएर ले कहीस कि “एहर दोसी नई हवे। ”

पिलातूस हर डराए लागीस की भीड़ हर दंगा करही एकरले अपन सिपाई मन ला आगियां देहीस की ईसू ला क्रूस में चढाए। रोमी सीपाई मन ईसू ला पीटीन अऊ राज वस्त्र ला पहिराईन अऊ मुड़ी में कनटा कर पगरी रख देहीन। फेर ओमन ईसू कर निन्दा करीन “देखा ए यहूदी मन कर राजा”।

A Bible story from: Matthew 26:57-27:26; Mark 14:53-15:15; Luke 22:54-23:25; John 18:12-19:16

40. . ईसू कर क्रूसीकरण

ईसू कर मजाक करेकर पाछु सिपाही मन ईसू ला क्रूस में चडाए बर ले गईन। ईसू के ओ क्रूस ला उठाएके रेंगेक पडीस काबर की ओही क्रूस में ईसू क्रूसित होए वाला रहीस।

सिपाही मन ईसू ला खोपडी नाव कर जगह में लानीन अऊ ओकर हाथ अऊ गोड में काटी ठोक के क्रूस में चढाये देहीन। फेर ईसू हर कहीस की पिता एमन के माफ कर काबर की एमन नई जाने की का करथे। पिलातूस हर आगियां देहीस की ओ यहूदी मन कर राजा कर चिन्हा बनाए अऊ ईसू कर सिर कर ऊपरे क्रूस में लगाए।

सिपाही मन ईसू कर कपड़ा बर चिट्ठी डालीन। जे घरी ओमन अइसने करीन ओमन ओ भविष्वावाणी ला पूरा करीन जेहर लिखल गए रहीन “ओमन मोर कपड़ा ला आपस में बार लिहीन अऊ मोर वस्त्र बर चिट्ठी डालीन”।

ईसू ला दुई चोर मन कर मंझार मैं क्रूस में चढ़ाईन। ओमे ले एक झे ईसू कर निन्दा करीस लेकिन दूसर हर कहीस तैं परमेसवर ला नई डरावस। हमरे दोसी हवन लेकिन ए आदमी काही गलती नई करीस हवे। फेर ओहर ईसू जग कहीस तैं अपन राएज में आबे त मोर सुरता करबे। ईसू हर उत्तर देहीस कि तैं आएज मोर संगे सवरग लोक में होंबे।

भीड़ कर आदमी अऊ यहूदी अगुवा मन ईसू कर हँसी करीन। ओमन ओकर जग कहिन यदि तैं परमेसवर कर बेटा होबे क्रूस ले उतर के आए जा, अऊ अपन आप ला बचा। त हमरे तोर ऊपर बिसवास करबो।

फेर ओ पूरा राएज में बदरी हर करियाए रईस, मंजीनहा जुआर रहीस। बारह बजे ले तीन बजे तक अंधार रहीस।

फेर ईसू हर ढ़ेरे जोर से चिक्रीस अऊ कहीस की “जम जाएत हर पूरा होए गईस, दाऊ मोर आतमा ला तोर हाथ में सोंपत हवों। फेर ओहर अपन मुड़ी ला नावाईस अऊ अपन प्राण ला छोड़ देहीस। जे घरी ओ मरीस ओ घरी एक बड़ाखा भूईडोल होईस। मंदिर कर बड़का परदा जेहर आदमी मन ला परमेसवर उपस्थित ले अलगे राखत रहीस, ओ परदा हर ऊपर ले खाल तक चिराए गईस।

अपन मृत्यु कर चलते परमेसवर जग आए बर ईसू आदमी मन बर डगर बनाईस। जे सीपाई मन ईसू कर रखवाली करत रहीन ओमन ए जम जाएत ला देख के कहीन “सहीच में ए आदमी हर काहीं गलती नई करे रहीस, ए परमेसवर कर बेटा रहीस।

फेर दुई जन युसुफ अऊ निकूदेमुस, मसीहा कर मानेदार यहूदी अगुवामन, पिलातुस जग जायेके ईसू कर देह ला मांगीन। ओमन ओकर लास ला कफन में ढाएक के मरघेटिया में राखीन, जेला चट्टान ला कोएड के बनाए रहीन फेर ओमन एक ठे बडखा अकन पखना में मरघेटिया कर दुरा ला ढाएक देहीन।

A Bible story from: Matthew 27:27-61; Mark 15:16-47; Luke 23:26-56; John 19:17-42

41. परमेसवर हर ईसू ला मृत्यु ले जियाईस

ईसू ला जे घरी क्रूस में सिपाही मन चढ़ाए देहे रहीन, ओ अविश्वासी यहूदी अगुवा मन पिलातुस जग कहीन “ओ झूठा ईसू हर कहे रहीस कि ओहर तीन दिन कर बाद मुर्दा में ले जी उठही। मरघट कर पहरा करे बर कोई ला राखे बर हवे।एकस झईन होए कि ओकर चेला मन आये के ओके चोराये ले जाऍ अऊ लोग मन जग कहे लागे की मुर्दा में ले जी उठीस हवे।

पीलातूस हर कहीस कि “चटिक सिपाही मन ला ले जा अऊ ओ मरघेटिया कर जेतना पहरा कएर सकतहवा ओतना तुमन करा ”। फेर ओमन मरघेटिया कर दुरा में ढ़ाकल पखना में मोहर लगाईन अऊ सिपाही मन ला ठहराए देहीन कि ईसू कर लास ला चुराए झईन सके।

आगु दिन,ईसू ला मरघट में राखे कर पाछू कर दिन हर सबत कर दिन रहीस अऊ ओदिन यहूदी मन मरघट में नई जाए सकत रहीन। एकरले सबत कर बाद, दुसर दिन भिन्सरहा कईठे सवाघिन मन ईसू कर देह में लगाए बर सुगन्धित मसाला ला तियार करिन।

एकबैग ऊहाँ एक बडखा भूंइडोल होईस। बिजिली कस चमकत एक सवरग दूद सवरग ले प्रगट होईस। ओमन ओ पखना ला हटाए देहीन जेहर मरघट कर दुरा में ढ़ाकल रहीस। मरघट कर पहरा करे वाला सिपाही मन डराएगईन अऊ मुर्दा कर समान भूई मैं गिर गईन।

जे घरी सवांघिन मन मरघट में पहुंचिन सवरग दूत हर ओमन जग कहीस “झईन घबराव, ईसू इहाँ नई हवे। जैसने ओहर कहे रहीस ओ मुर्दा में ले जी उठीसे हवे। मरघट में जाएके देखा। सवांघिन मन मरघट ला देखीन जिहाँ ईसू कर सरीर हर राखल रहीस। ओकर सरीर ऊहाँ नई रहीस।

फेर सवरग दूत हर सवांघिन मन जग कहीस की जावा अऊ चेला मन ला बतावा। ईसू हर मुर्द में ले जी उठीस हवे अऊ तुमन कर आगू आगू गलील में जाथे।

सवांघिन मन डराईन अऊ ढ़ेरे खुशी कर मारे कुद के चेला मन ठे ए सुघर संदेस ला बताएबर गईन।

जे घरी सवांघिन मन सुघर संदेस ला बताए बर जात रहीन, ईसू हर ओमन कर आगू में प्रगट होईस अऊ ओमन ईसू कर आराधना करीन। ईसू हर कहीस की “झईन घबरावा। जावा मोर चेला मन ला कहा कि ओमन गलील में जाऍ अऊ ओमन मोर जग भेंटाहीं।

A Bible story from: Matthew 27:62-28:15; Mark 16:1-11; Luke 24:1-12; John 20:1-18

42. ईसू हर सवरग में लौट गईस

ईसू हर जे दिन मुर्दा में ले जी उठीस ओ दिन ओकर दुई ठे चेला मन ठावें कर गाँव में जात रहीन।रेंगते रेंगते ओमन ईसू कर संग जे जाएत होए रहीस ओकर गोएठ गोठियात रहीन। ओमन असरा करे रहीन की ओहर मसीहा होही लेकिन ओके माएर देहिन। अब सवांघिन मन कहीन ओहर जीयत हवे। ओमन जानत नई रहींन की का बिसवास करी।

ईसू ओमन कर संगे जाए लागीस। लेकिन चेला मन ओके नई चिनहीन। ईसू हर पुछीस तुमन का गोईठला गोठीयात हवा अऊ ओमन अचम्भा कर बात बताईन। जेहर ईसू कर संगे बीतल दिन में होए रहीस। ओमन सोचिन की कोई डगर रेन्गोय्या मन ठे बात करथी। जेहर नई जानत हवे की यारुसलेम में का होए रहीस।

फेर ईसू हर ओमन के समझाईस की परमेसवर कर वचन मसीह कर बारे मे का कहते हवे। ओहर ओमन के सुरता कराईस की अगमजानी मन कहे रहिंन की मसीह दुःख उठाही अऊ ओके माएर दारहीं लेकिन तीन दिन में ओ जी उठही। जे घनि ओमन ओ गाँव में पहुंचीन, जिहाँ कर दुनों आदमी मन रहोईया रहीन, साँझ जुआर होए गए रहिस।

ओमन दुनों झन आपस में कहिन, "ओहर तो ईसू रहीस। ओकरले हमर हिरदय हर आगी कस होए गए रहिस जे घरी ओहर परमेसवर कर वचन ला हमके समझावत रहिस। तेकर ओमन यरूसलेम में फेर आईंन। जे घरी ऊहाँ पहुंचीन त ओमन चेला मन जग कहिन, "ईसू जिन्दा हवे हमरे ओके देखे हवन। "

ओ दुईनों झन मन ईसू ला कहिन, "हमर संगे रह जा, अऊ ईसू माएन गईस। जे घरी ओमन राती बियारी खाए बर बईठिन ईसू हर रोटी ला उठाईस अऊ परमेसवर कर धन्यवाद करके रोटी ला टोरिस। एकेचदाएर ओमन चिन्ह लेहिंन की एहर ईसू हवे। लेकिन ओहि घरी ईसू हर छपरित होए गईस।

जे घनि चेला मन घरे बईठ के गोठियात रहिंन, ईसू एकेच दाएर परगट होए गईस अऊ कहिस, "तुमन के सांती मिले। " चेला मन सोंचिन की एहर भूत लागे, लेकिन ईसू हर कहिस, "तुमन काबर डरावत हा? अऊ काबर सन्देह करत हा?मोर हाँथ अऊ गोड़ ला देखा। भुत कर मोर कस देंह नई रहे। "ए बताए बर की ओ भुत ना लागे ओहर ओमन ठन चटिक खाए बर माँगिस। ओमन ओके चुरावल मछरी देहिंन, अऊ ओहर खाईस।

ईसू हर कहिस, "मैं तुमन ला बताए रहें की मोर बारे में जे जाएत परमेसवर कर वचन में लिखल हवे ओहर जरूर पूरा होहीं। "फेर ओहर ओमन कर मन ला खोएल देहिस की ओमन परमेसवर कर वचन ला समझें। ओहर कहिस "एहर ढ़ेरे आगू कर लिखल रहिस की मसीहा ला दुःख उठाये बर परही, अऊ तीन दिन में मुर्दा में ले जी उठही।

"वचन में ए लिखल हवे मोर चेला मन परचार करहीं की पांप कर क्षमा बर जम कोनो ला पशचाताप करेक परही "ओमन ए काम ला यरूशलेम में शुरू करहीं अऊ फेर जमेच लोग मन जग सबेच जगहा में जांही। ए जम गोईठ कर तुमन गवाह हवा।"

आगू कर चालीस दिन में, ईसू अपन चेला मन जग कईयोक दाएर ले प्रगट होईस। एक दाएर ईसू हर ५०० ले भी बगरा आदमी मन जग प्रगट होईस। ओहर कईक मंधे ले अपन चेला मन जग सबूत देहीस की ओहर जिन्दा हवे अऊ ओहर ओमन के परमेसवर कर राएज कर बारे में सिखाईस।

आगू कर चालीस दिन में, ईसू अपन चेला मन जग कईयोक दाएर ले प्रगट होईस। एक दाएर ईसू हर ५०० ले भी बगरा आदमी मन जग प्रगट होईस। ओहर कईक मंधे ले अपन चेला मन जग सबूत देहीस की ओहर जिन्दा हवे अऊ ओहर ओमन के परमेसवर कर राएज कर बारे में सिखाईस।

मएर के जी उठे कर चालीस दिन कर पीछू ईसू हर चेला मन जग कहिस, "यरूशलेम में रुके रहा अऊ पवितर आतमा जेघनी तूमन ऊपर आही तब तुमन दाऊ से सामर्थ पईहा। "फेर ईसू सवरग में चले गईस अऊ एगोठ बदरी हर ओके चेला मन कर आँख ले लुकाए लेहीस। ईसू अपन दाऊ कर जवनी हाँथ कती बईठ गईस ताकि जम जाएत में राएज करे।

A Bible story from: Matthew 28:16-20; Mark 16:12-20; Luke 24:13-53; John 20:19-23; Acts 1:1-11

43. कलीसिया शुरू होईस

ईसू कर सवरग जाये कर पाछू चेला मन यरूसलेम में रहिंन जेइसने ईसू हर ओमन ला आगियां देहे रहिस। विसवासी मन रोज दिन परथना अऊ संगति करत रहिंन।

फसह कर पचास दिन कर पाछू, सबेच बछर, यहूदी मन, पेन्तिकोस्त नाव कर एक सुघर दिन ला मनाईन। पेन्तिकोस्त यहूदी मन कर फसील ला माने कर जुआर रहिस। संसार भर कर यहूदी मन पेन्तिकोस्त कर तिहार मनाये बर यरूसलेम में आवत रहिंन। ए बछर, पेन्तिकुस्त ईसू कर सवरग जाए कर एक हप्ता कर पिछु आईस।

जेघनी जम विसवासी मन एकठे घर में जुटे रहिंन ऊहाँ एगोठ बड़खा गर्रा घाँटा कस हर हर आवाज होईस। अऊ आगी कस बरत चटिक विसवासी मन कर मुड़ कर ऊपरे बईठ गईस। ओमन जम झन पवितर आतमा में भर गईंन, अऊ आने आने भासा में गोठियाए लागींन।

जेघनी यरूसलेम कर लोग मन ए आवाज ला सुनीन, एगोठ भीड़ ओजग जुईट गईस ए देखे बर की ओजग का होअत हवे। जेघनी आदमी मन विसवासी मन ला परमेसवर कर अदभुत काम कर बखान करत सुनीन, त ओमन अकबकाए गईंन काबर की ओमन ए गोईठ ला अपन अपन भासा में सुनत रहिंन।

चटिक लोग मन चेला मन कर ऊपरे आरोप लगाईंन की ओमन नशा में हवे। लेकिन पतरस ढ़ड़होए के ओमन जग कहिस, "मोर गोईठ ला सुना। एमन नई पीन हवें। एजग योएल नवी कर अगमवाणी हर पूरा होईस हवे, परमेसवर हर कहे रहिस की आखरी दिन में मैं अपन आतमा ला उंडेलहुँ।

"हे इसराईल कर लोग, ईसू हर परमेसवर कर शक्ति से ढ़ेरेच बगरा सामर्थी चिन्ह अऊ चमत्कार करिस, जेला तुमन देखेहा अऊ जानथा। लेकिन तुमन ओके क्रूस में चढ़ाये देहा।"

"यदि ईसू मरिस अऊ परमेसवर हर ओके जियाईस। एकरले ए अगमवाणी हर पूरा होईस, "की तैँ अपन पवितर जन ला मरघेटी में सड़े नई देबे। ए बात कर हमरे गवाह हवन की परमेसवर हर ईसू ला फिरेच जिन्दा करिस हवे।"

पिता परमेसवर हर ईसू ला अपन जवनी कती ऊपर उठाये लेहीस। अऊ ईसू हर पवितर आतमा ला भेजीस, जेकस ओहर जवान करे रहिस। जेला अब तुमन देखत हवा अऊ सुनत हवा ओहर पवितर आतमा कर काम लागे। "

"तुमन ईसू नाव कर ओ आदमी ला क्रूस में चढ़ाए देहा। लेकिन तुमन ए बात ला जान लेआ की परमेसवरहर ईसू ला प्रभु अऊ उद्धारकर्ता ठहराईस।"

जेमन पतरस कर ए गोईठ ला सुनत रहिंन ओ बात हर ओमन कर हिर्दय ला छुईस। ओकरेले ओमन पतरस अऊ आने चेला मन जग पूछींन, "भाई मन "हमके का करेक चाही। "

पतरस हर कहिस "की तुमन जम झेके पसचाताप करेक परही अऊ ईसू मसीह कर नाव में बपतिसमा लेहेक परही, ताकि परमेसवर तुमन कर पाप ला क्षमा करे। फेर ओहर तुमन ला पवितर आतमा कर दान देही। "

पतरस कर गोईठ में बिसवास करके करीबन , ३००० लोग मन ईसू कर चेला बएन गईंन। ओमन बपतिसमा लेहिंन अऊ ओमन यरूशलेम कर कलीसिया में मिल गईंन।

चेला मन जमेंच घनी प्रेरित मन कर शिक्षा ला सुनत रहिंन, अऊ संगमें संगति करत रहिन, खात पीयत रहिंन अऊ एक दूसर कर संगे परथना करत रहिंन। ओमन संगमें परमेसवर कर महिमा कईर के आनन्दित होअत रहिंन अऊ अपन जम जाएत ला एक दूसर जग बाँटत रहिंन। जम लोग मन एमन ला सुघरे सुघर कहींन। सब दिन, अऊ लोग मन विसवासी बनें।

A Bible story from: Acts 2

44. पतरस अऊ यूहन्ना एगोठ भिखारी ला चंगा करिन

एक दिन कर दिन में पतरस अऊ युहन्ना आराधनालय में जात रहिंन। जे घनि ओमन मन्दिर कर दुरा में पहुचींन, ओमन एक लँगड़ा आदमी ला देखिन जेहर पईसा पाये बर भीख माँगत रहिस।

पतरस हर ओ लँगड़ा आदमी ला देख के कहिस, "तोके देहे बर मोर जग पईसा नइये। लेकिन मैं तोके ओ जाएत देहुँ जेहर मोर जग हवे। ईसू कर नाव में, उठ अऊ चल।"

एकेचदाएर परमेसवर हर ओ लँगड़ा आदमी ला चंगा करिस, अऊ ओहर रेंगे अऊ कूदे लागीस, अऊ परमेसवर कर महिमा करे लागीस। आराधनालय कर आँगन में जेतना लोग मन रहींन ओमन अकबकाए गईंन।

चंगाई पावल आदमी ला देखे बर ओजग भीड़ जुईट गईस। पतरस हर कहिस, "तुमन काबर अकबकावत हवा की ए आदमी हर चंगाई पाए गईस हवे? हमरे हमर सामर्थ अऊ भलाई से ए आदमी ला चंगा नई करे हवन। लेकिन ईसू कर सामर्थ अऊ ओकर बिसवास हर येआदमी ला चंगा करिस हवे।

"तुंही मन ओ आदमी हवा जेमन रोमी शासन जग कहे रहा की ईसू ला मार देआ। तुमन जीवन कर लिखोईया ला मार देहा, लेकिन परमेसवरहर ओके मुर्दा मेले जियाईस। तबोले तुमन नई जानत रहा की तुमन का करत हा, परमेसवर हर तुमन कर ओ काम कर चलते मसीहा कर बारे में जे अगमवाणी करे रहीस कि ओहर दुःख उठाही अऊ मारल जाही ओला पूरा करिस।

पतरस अऊ यूहन्ना कर ए गोईठ ला सुनके मन्दिर कर अगुवा मन परेशान होए गईंन। ओकरेले ओमन के पकेड़ के जेहल में डाएल देहिंन। लेकिन नगदे बगरा मन पतरस कर सन्देस ला सुईन के ईसू पर बिसवास करिन, अऊ विसवासी मन कर गीनती ५००० होए गईस।

ओकर आगू दिन, यहूदी अगुवा मन पतरस अऊ यूहन्ना ला महायाजक अऊ धारमिक अगुवा मन जग लानीन। ओमन पतरस अऊ यूहन्ना जग पुछिन, "काकर सामर्थ ले तुमन ए लँगड़ा आदमी ला चंगा करे हवा? "

पतरस हर ओमन के उत्तर देहिस, "ईसू मसीह कर सामर्थ कर चलते ए लंगड़ा आदमी हर तुमन कर आगू में चंगा ठड़होईस हवे। तुमन ईसू ला क्रूस में चढ़ाया, लेकिन परमेसवर हर ईसू ला जिन्दा कर देहिस। तूमन ओकर तिरस्कार कर देहा, लेकिन उद्धार पाये बर ईसू।कर सामर्थ कर अलावा अऊ कोनो दूसर डगर नइये। "

अगुवा मन अकबकाए गईंन काबर की पतरस अऊ यूहन्ना, जेमन सीधा साधा अऊ अनपढ़ आदमी रहिंन, अऊ निडर होएके गोठियात रहिंन। फेर ओमन एकर सुरता करिन की ओमन ईसू कर संगे चलेवाला आदमी रहिंन। ओमन पतरस अऊ यूहन्ना ला धमकाईन तेकर पाछु ओमन के जाए देहीन।

A Bible story from: Acts 3:1-4:22

45. फिलिपुस अऊ कुस देस कर अधिकारी

कलीसिया कर शुरू कर दिन में स्तिफनुस नाव कर एगोठ अगुवा रहिस। ओ नामीक आदमी रहिस, अऊ पवितर आतमा अऊ बुद्धि ले भरे रहिस। स्तिफनुस हर अनेक चमत्कार करिस अऊ ओहर उदाहरण दे देके लोग मन ला समझाईस अऊ ईसू कर ऊपर बिसवास करे बर कहिस।

एक दिन, कर दिन में स्तिफनुस ईसू कर बारे सिखावत रहीस, तेघरि जे यहूदी मन ईसू कर ऊपर बिसवास नई करत रहिंन ओमन स्तिफनुस जग वाद विवाद करे लगीन। ओमन ढ़ेरेच गुस्साए के स्तिफनुस कर विरोध में धारमिक अगुवा मन जग झूठ बोलीन। ओमन कहिन "हमरे ओके मूसा अऊ परमेसवर कर विरोध में गोठियात सुनेही। " एकरले धारमिक अगुवा अऊ धर्म कर ठेकेदार मन स्तिफनुस ला पकेड़ लेहिंन अऊ ओके महायाजक अऊ आने धारमिक अगुवा मन जग लानीन, जिहां अऊ झूठे गवाह मन ओकर विरोध में झूठ बोलीन।

महायाजक हर स्तिफनुस जग पुछिस, "का एहर सही बात हवे? स्तिफनुस हर जवाव में ओमन ला सूरता करवाईस की कोन कस अबराहम कर घरीले लेके ईसू कर घरी तक परमेसवर हर बड़खा बड़खा काम करिस, अऊ कईसे कईसे इसराईली लोग मन परमेसवर कर आगियां ला टोरत रहिंन। फेर ओहर कहिस, "तुमन जिद्हा अऊ बलवा करे वाला लोग हवा अऊ सबेच घरी पवितर आतमा कर विरोध करथा, जईसने तुमन कर पुरखा मन परमेसवर कर तियाग करिन अऊ अगमजानी मन ला माएर दारिन। लेकिन तुमन तो ओमनो ले भी घिनक काम करे हवा। तुमन तो मसीहा ला माएर दारा। "

जेघनी धारमिक अगुवा मन ए गोईठ ला सुनींन, तो ओमन गुस्सा कर मारे अपन कान मन ला मूंईद देहींन औ जोर से चिकरिंन। अऊ ओमन स्तिफनुस ला गाँव कर बहरी खिंचके ले गईंन अऊ ओके पखना में लबदाईंन की ओके ला माएर दारी।

जे घनि स्तिफनुस हर मरत रहिस, ओहर गोहार करिस, "ईसू, मोर आतमा ला ग्रहण कर। " फेर ओहर अपन ठेहुँना में गिरिस अऊ जोर से गोहराइस, "प्रभु, ओमन ऊपर ए पाप ला मत लगाबे। " तेकर ओहर मएर गईस।

एक शाऊल नाव कर जवान आदमी स्तिफनुस कर ऊपरे पखना फेंकोईया मन कर संगे रही के ओमन कर साथ देहे लागीस, अऊ जेघनी ओमन पखना फेंकत रहिंन शाऊल ओमन कर ओढ़ना कर पहरा करत रहिस। ओ दिन कइयो झन मन यरूशलेम में ईसू कर पिछु चलेवाला मन ला सताये बर शुरू करिन, अऊ विसवासी मन इते ऊते आने जगहा में भाएग गईन। लेकिन एकर पिछु भी विसवासी मन जिहाँ भी गईंन ऊहाँ ईसू कर परचार करिन।

सताव कर चलते यरूशलेम ला छोंड़के जवईया विसवासी मन में फिलिपुस नाव कर एगोठ चेला रहीस। ओहर सामरिया गाँव गईस अऊ ईसू कर परचार करिस अऊ कई झन मन उद्धार पाईंन। फेर एक दिन कर दिन में परमेसवर कर दूत हर फिलिपुस ठन कहिस की रेगिस्तान कर डगर में जा जे घनि ओ, ओ डगर में जात रहिस, ओहर कुस देश कर एगोठ मुखिया ला देखिस जेहर अपन रथ में रहिस। पवितर आतमा हर फिलिपुस ठन कहिस की जाएके ओ आदमी ठन गोठियाये।

जेघनी फिलिपुस रथ जग पहुंचीस, तो ओहर ओ मुखिया ( साहेब ) ला यशायाह कर किताब ले पढ़त सुनीस। ओ पढ़त रहिस "ओमन ओके मेमना कस मारे बर ले गईन, अऊ जेकस एगोठ मेमना हर चुप रहथे, ओही कस ओहर चुप रहिस, अऊ काहींच नई गोठियाईस। ओमन ओकर संग अनियाये करिन अऊ ओके चटिकोच नई पतियाईन। ओमन ओके मरवाये दारीन। "

फिलिपुस हर कुशी ठन पूछिस, " तैं जेला पढ़त हस, का ओला समझत हस?" ओ कुशी हर कहिस, "नहीं। जबले कोई मोके नई समझाही तबले मैं कईसे समझहुँ। ओहर कहिस भीतरी आओ अऊ मोर संग बईठ। अऊ ए बताओ कि यशायाह हर अपन बारे में गोठियात रहिस की अऊ ककरो बारे में?"

फिलिपुस हर ओ कुशी आदमी ला समझाईस की यशायाह हर ईसू कर बारे में लिखिस हवे। फिलिपुस हर आने आने वचन ला बताये के ईसू कर शुभ समाचार सुनाईस।

जईसने फिलिपुस अऊ ओ कुशी आगु बढ़ते गईंन, अऊ चटिक पानी जग पहुंचींन। कुशी हर कहीस, "देख। ए जग पानी हवे। का मैं बपतिसमा ले सकत हवों? "फेर ओहर रथ चलाये वाला ला रथ रोके बर कहिस।

फेर ओमन पानी में उतरीन अऊ फिलिपुस हर कुशी ला बपतिसमा देहिस। पानी ले बहरी निकले कर पिछु पवितर आतमा हर फिलिपुस ला उठाये लेहिस अऊ दूसर जगहा पहूँचाईस जिहाँ ओहर लोग मन ला ईसू कर बारे में बताईस।

कुशी अपन घर कती ढ़ेरेच फुरमा होए के जात रहिस, काबर की ओहर ईसू ला जाएन गए रहीस।

A Bible story from: Acts 6:8-8:5; 8:26-40

46. पोलुस हर मसीही बनिस

शाऊल एगोठ जवान रहिस, जेहर ओ लोग मन कर कपड़ा कर रखवाली करे रहिस जेमन स्तिफनुस ला मारत रहीन। ओमन ईसू कर ऊपरे बिसवास नई करिन, अऊ एकरे ले ओमन बिसवासी मन ला सताईन। ओमन यरुसलेम में एक – एक घर में जाए के सवांग अऊ सवांघिन मन ला धर के ओमन के जेहल में हुरेक देहिन। महायाजक हर शाऊल ला कहिस कि ओ दमिश्क में जाएके ऊहाँ कर मसीह मला गिरफ्तार करके ओमन के यरूशलेम लान।

शाऊल जे घरी दमिश्क कती जात रहिस, सवरग ले एगोट बड़खा इजोर ओकर चारो कती चमकीस। अऊ ओ भुईया में गिर गईस। शाऊल हर काकरो गोईठ ला सुनिस, ”शाऊल – शाऊल तैं मोके काबर सतावत हस? शाऊल हर पूछिस, “ महराज तैं कोन लागस। ईसू हर उत्तर देहीस” मैं ईसू लागों जे के तैं सताथस।

जे घरी शाऊल उठिस, ओहर काही जाएत ला नई देख सकत रहिस। ओकर संगता मन ओके ला दमिश्क पहुचाईन। तीन दिन शाऊल हर काही नई खाईस न पीईस।

दमिश्क में हनन्या नाव कर एकठे चेला रहत रहिस, परमेसवर हर ओके कहिस, “ ओ घर में जा जिहाँ शाऊल हर रहथे अपन हाथ ओकर उपर रख दे ताकि ओहर फेर से देखे लागे। ” लेकिन हनन्या हर कहिस, “महराज मैं ए आदमी कर बारे में सुने हवों कि बिसवासी मन ला सताथे। ” परमेसवर हर उत्तर देहीस, जा मैं ओके चुने हवों कि ओहर मोर नाव ला यहूदी अऊ आने जाएत कर लोग मन कर मंझारे परचार करही, ओहर मोर नाव कर चलते ढ़ेरेच दुःख ला झेलही।

एहिच कस हनन्या हर शाऊल जग गईस, अपन हाथ ओकर ऊपरे राखीस, अऊ कहीस कि “ ईसू हर मोके तोर ठे भेजिस हवे, ओही ईसू जेहर तोर जग डगर में भेटायें रहिस, ताकि तैं फेर से देखे लागबे अऊ पवितर आतमा ले भर जाबे, ” शाऊल हर एकबेग देखे लागीस। अऊ हनन्या हर ओके बपतिसमा देहीस अऊ शाऊल हर खाना खाईस अऊ बल पाईस।

एकबेग शाऊल हर दमिश्क कर यहूदी मन जग परचार करे लागीस, अऊ कहिस “ ईसू परमेसवर कर बेटा लागे”। यहूदी मन ए गोएठ ला सुन के सोचे लागीन कि जे आदमी हर बिसवासी मन ला नाश करे कर प्रयास करे लागीस अब ओही आदमी हर ईसू कर उपर बिसवास करथे। शाऊल हर यहूदी मन जग तर्क करत रहिस ए साबित करे बर कि ईसू ही मसीहा हवे।

ढ़ेरे दिन बित गईस तेकर पिछु यहूदी मन शाऊल ला मारे कर बिचार बनाईन। ओमन लोग मन ला शहर कर दुरा में ठड़वाए देहिन कि ओमन ओके माएर दारें। लेकिन शाऊल एकर बारे में जानिस अऊ अपन संगता मन कर मदेद ले बांएच गईस। एक रात ओकर संगता मन पथिया में ओके बइठाऐ के शहर कर दीवाल में ले उतार देहीन, दमिश्क ले बाएच कर बाद ओहर ईसू कर बारे में परचार करत रहिस।

शाऊल हर यरुसलेम में गईस कि ओके चेला मन जग भेट करे, लेकिन ओमन ओकर से डरावत रहीन। फेर बरनबास नाव कर बिसवासी हर शाऊल ला प्रेरित मन जग ले गईस, अऊ ओमन के बताईस कि शाऊल हर कोन कस हिम्मत ले दमिश्क में परचार करत रहिस। ओकर पिछु चेला मन शाऊल ला अपन कहिन अऊ अपन मानीन।

तनिक बिसवासी मन जेमन यरुसलेम कर सताव कर चलते भाएग गए रहीन, अन्ताकिया में पहुचींन अऊ ऊहाँ ईसू कर बारे में परचार करत रहीन। अन्ताकिया कर ढ़ेरे लोग मन यहूदी नई रहीन, लेकिन शुरु में ओमन ले कई झन बिसवासी बनीन बरनबा अऊ शाऊल ऊहाँ गईन कि नावा बिसवासी ला ईसू कर बारे में ढ़ेरे सिखाइन अऊ कलीसिया ला बलवंत करिन। अन्ताकिया गाँव में ईसू कर उपर बिसवास करे वाला मन ला सबले आगू “ मसीही” बलाए गईन।

एक दिन कर दिन में जे घरी अन्ताकिया कर मसीही मन उपवास अऊ परथना करत रहीन, पवितर आतमा हर ओमन जग कहिस, “बरनबास अऊ शाऊल ला अलग कर देवा ओ बुता बर जेकर बर मैं ओमन के बलाए हवों”। एही कस अन्ताकिया कर कलीसिया कर लोग मन बरनबास अऊ शाऊल कर ऊपरे हाथ राखिन अऊ ओमन बर परथना करिन फेर ओमन ओमन के भेजिन कि ईसू कर परचार आने –आने जगहा में करे।

A Bible story from: Acts 8:3; 9:1-31; 11:19-26; 13:1-3

47. पौलूस अऊ सीलास फिलिप्पी में

जे घरी शाऊल हर रोमी साम्राज्य में सफर करत रहिस, ओहर अपन नाव ला पौलूस बताईस। एक दिन पौलूस अऊ ओकर संगता सिलास फिलिप्पी नाव कर गाँव में ईशू कर सुभ संदेश सुनाएबर गईन। गाँव कर बैहरी एक नदि जग ओमन गईन जिहां लोग परथना करे बर जुटे रहीन। ओजग लुदिया नाव कर संवाघिन ले ओमन मिलिन ओहर एक ब्यापारी रहिस। अऊ ओहर परमेसवर जग मया करे अऊ आराधना करे।

परमेसवर हर लुदिया कर हृदय ला खोलिस कि ओहर ईसू कर संदेश में बिसवास करे, अऊ ओहर अऊ ओकर घराना कर मन बपतिसमा लेहिन। ओमन पौलूस अऊ सिलास ला अपन घर रहे बर बलाईन। एही कस ओमन ओकर अऊ ओकर घराना कर संगे रहे लागीन।

पौलूस अऊ सीलास लोग मन कर संगे परथना करे कर जगह में ढ़ेरेच धायर भेटाए रहीन। रोज दिन ओमन जेघनी ओजग ले जात रहीन एक ठे दासी जेकर उपर भुत जटकल रहिस ओमन कर पिछु-पिछु रेगंत रहिस। ऐ भुत जटकल कर चलते ओहर लोग मन कर भविस ला बतात रहिस। एही कस अपन मालिक बर भविस ला बता के ढ़ेरे कमावत रहिस।

जे घनी ओमन रेंगत रहीन। ए गुलाम लडकी हर किरलात रहिस “ए आदमी परम प्रधान परमेसवर कर दास हवे। एमन तुमन मन ला उद्धार कर डगर बतात रहीन”। एहर हरदम ओहिच कस करत रहिस अऊ पौलूस हर फिकराऐ जात रहिस।

आखरी में एक दिन जे घरी गुलाम लडकी हर किरलावत रहीस पौलूस हर ओकर कती मुड के ओ भुत ला कहिस कि जेहर ओकर भीतरी हवस, “ईसू कर नाव, में ओकर भीतर ले निकल आ” झटेचके भुत हर ओकर भीतर ले निकेल गईस।

गुलाम लडकी कर मालिक हर ढ़ेरे गुस्साए गईस। ओ जानत रहिस कि भुत विगर ए लडकी हर लोग मन कर भविस ला बताए नई सकही। एकर मतलब रहिस कि लोग मन ओके पईसा नई देहि। काबर कि लडकी ककरो भविस ला नई बताए सकत रहिस एकरले गुलाम लडकी कर मालिक मन पौलूस अऊ सीलास ला रोमी राएज कर मुखिया जग ले गईन। जेमन ओमन के मारिन अऊ ओमन के जेहल में डाएल देहिन।

ओमन पौलूस अऊ सिलास ला जेहल कर जम ले बढ़िहां जगहा में डाएल देहिन।

अऊ ओमन कर गोड में ताला लगाए देहिन लेकिन आधा राती, ओमन परमेसवर कर गीत ला गावत रहीन।

एकेच धाएर ऊहाँ एक ढ़ेरे जोर से भुईंडोल होईस। जेहल कर जम दुरा मन खुल गईन अऊ जम कैदी मन कर बंधन खुल गईस।

जेहल कर दरोगा जाएग गईस, अऊ जे घरी ओहर देखिस कि जेहल कर जम दुरा हर खुला हवे ओहर ढ़ेरेच डराऐ गईस। ओहर सोचिस कि जम कैदी मन भाएग गईन ओकरे ले ओ अपने आप ला माएर दारेक चाहत रहिस। [ओ जानत रहिस कि अगर कोई कैदी भाएग जा त रोमी शासक ओमन के मार देही] लेकिन पौलूस हर ओके देखिस अऊ चिकर के कहिस, “ रुईक जा अपने आप ला मत मार हमरे जम झन एही जग हवन”।

जेहल कर ढ़रोगा कांपत– कांपत पौलूस अऊ सीलास कर लिघे पंहुचीस अऊ पूछिस, “उद्धार पाए बर मोके का करे बर परही”? पौलूस हर कहिस, “ईसू कर ऊपरे बिसवास कर त तैं अऊ तोर परिवार उद्धार जाही”। फेर पौलूस अऊ सिलास ला ढ़रोगा हर अपन घरे ले गईस अऊ ओमन कर घाव ला धोईस। ओ घर में जितना झन रहीन जम झन ला पौलूस हर ईसू कर सुघर संदेस सुनाईस।

ढ़रोगा अऊ ओकर जम परिवार मन ईसू कर ऊपरे बिसवास करिन अऊ बपतिसमा लेहिन, फेर ढ़रोगा हर पौलूस अऊ सीलास ला खाना खवाईस। अऊ ओमन कर संगे आनन्द मनाईन।

आगू दिन शहर कर अगुवा मन पौलूस अऊ सिलास ला जेहल ले जाए देहिन अऊ ओमन जग कहिन तुमन फिलिप्पी ले निकेल जावा पौलूस अऊ सिलास लुदिया अऊ आने –आने संगता मन जग भेट करिन अऊ फेर शहर ले चल देहिन। ईसू कर सुभ संदेश हर फैलत गईस, अऊ कलीसिया बढत गईस।

पौलूस अऊ ओकर कई दुसर मसीह अगुवा मन ढ़ेरेच बगरा शहर में बुलत –बुलत गईन अऊ परचार करिन अऊ लोग मन ला ईसू कर सुघर संदेस ला सिखाईन। कलीसिया कर बिसवासी मन ला सिखाईन अऊ आनन्द ले भरे बर ओमन ढ़ेरेच चिटटी ला लिखीन अऊ ओमन कर चटिक चिटटी हर बाइबल किताब बनिस।

A Bible story from: Acts 16:11-40

48. ईसू हर अपन जबान कर अनुसार मसीहा हवे

जे घरी परमेसवर हर दुनिया ला बनाईस, ते घरी जम जाएत हर ढ़ेरेच सुघर रहिस अऊ कोई पांप नई रहिस। आदम अऊ हव्वा एक दुसरे झन ले ढ़ेरे मया करत रहीन, अऊ परमेसवर जग भी ढ़ेरे मया करत रहीन। काँही दुःख अऊ पीरा नई रहिस संसार हर ओकस रहिस जेकस परमेसवर हर सोचत रहिस।

सैतान हर सांप कर भेस में गोठियाईस, एकरले कि ओहर हव्वा ला ठएग सके। फेर आदम अऊ हव्वा हर परमेसवर कर विरोध में पांप करिन अऊ ओमन कर पांप कर चलते, भुईया में लोग मन कर ऊपरे दुःख, बिमारी अऊ मऊत भी आईस।

आदम अऊ हव्वा कर पांप कर चलते अऊ गलती होईस । तेकर ले जम आदमी मन पांप ले भरल जनम लेथे अऊ परमेसवर कर बैरी बन जाथे। परमेसवर अऊ लोग मन कर मंझार कर रिसता हर पांप कर चलते टुईट गईस। लेकिन ए रिसता ला फेर से जोडे बर परमेसवर जग एगोठ उपाय रहिस।

परमेसवर हर जबान करिस कि हव्वा कर घराना कर एक झन हर सैतानकर मुड़ी ला कूँचही। अऊ सैतानहर ओकर एडी ला डसही। एकर हिसाब से सैतानहर मसीहा ला मारही, लेकिन ओके परमेसवर हर फेर ले जिआही, अऊ फेर मसीहा हर सैतान कर सक्ति ला हमेशा बर खत्म कर देहि, कई बछर कर पाछु परमेसवर हर साबित करिस कि ईसू ही मसीहा हवे।

जे घरी परमेसवर हर पूरा भुईया ला जलप्रलय ले नाश करिस, ओहर एक ठन डोंगा कर जुगाड़ भी करे रहिस कि जेमन ओकर ऊपरे बिसवास करही ओमन ऐ डोंगा कर चलते बांएच जाही। एहिकस हरेक झन मन अपन पांप कर चलते मऊत कर लाईक हवे, लेकिन परमेसवर हर ईसू ला भेजीस कि जे कोई ओकर उपर बिसवास करही ओहर बांएच जाही।

ढ़ेरे बछर ले, याजक मन परमेसवर कर आगू में बलिदान ला चढावत रहीन लोग मन ला ए सिखाय बर कि पांप कर चलते ओमन कौन कस दण्ड कर लाईक हवे। लेकिन ओ बलिदान कर चलते पांप ला नई मेटाए सकत रहिस। ईसू हर ही महायाजक हवे अऊ आने याजक ले अलगे हवे ओहर अपन आप ला ओ एक पांप कर बलिदान कर रूप में दे देहीस। जेहर जम जगत कर पांप ला ले जाए सकत रहिस, ईसू हर सीधा महायाजक रहिस, काबर कि हरेक पांप जो हर एक लोग मन करे रहीन ओकर दण्ड ला ओहर उठाए लेहिस।.

जे घरी परमेसवर हर अबराहम जग परमेसवर हर अबराहम जग कहिस “ तोर चलते भुईया कर जम जाएत मन आशीष पाहीं”। ईसू अबराहम कर घराना कर रहिस। जम जाएत मन ओकर चलते आशीष पाइन, काबर कि जे कोई ईसू कर ऊपरे बिसवास करही ओहर पांप ले बांएच जाही अऊ अबराहम कर आतमिक बेटा बन जाही।।

ओकर बेटा इसहाक ला बलिदान में चढाए बर कहिस तब परमेसवर हर ओकर बेटा कर जगह में बलिदान चढाए बर एगोठ मेमना कर जुगाड़ करिस। हमन जम झन अपन-अपन पांप कर चलते मरे कर लाईक हवन, लेकिन परमेसवर हर ईसू के दे देहीस, परमेसवर कर मेमना ला कि ओहर अपन बलिदान कर चलते हमर मरना ला उठा लेहि।

जे घरी परमेसवर हर मिस्र में आखरी भऊर ला भेजे रहिस, ओहर हर इसरायली परिवार ला कहिस कि ओहर एगोठ सिध्द मेमना ला माएर के ओकर लहू ला केवांरी कर चऊकट कर ऊपरे अऊ धरी में लगाही। जब परमेसवर हर लहू ला देखिस, त ओहर ओ घर ला छोएड़ देहीस, अऊ ऊहाँ कर जेठा मन ला नई मारिस, ए घटना ला फसह कहीन।

ईसू हमर फसह कर मेमना हवे। ओहर सिद्ध अऊ निरदोस रहिस अऊ फसह कर तिहार कर समय ओके ला माएर देहिन। जे कोनो ईसू कर ऊपरे बिसवास करथे ईसू कर लहू ओकर पांप कर दण्ड ला माफ़ करथे, अऊ परमेसवर कर दण्ड फेर ओ आदमी कर ऊपरे नई आए।

परमेसवर हर इसराईल कर संगे, जेमन ओकर निमारल लोग रहीन, एगोठ कानून बनाय रहीस अब परमेसवर हर एगोठ नावा कानून ला बनाईस। जेहर जम झन बर हवे ए कानून कर चलते कोनोच जाएत कर आदमी मन ईसू कर ऊपरे बिसवास कएर के परमेसवर कर जन बएन सकत हवें।

मूसा हर एगोठ बड़खा अगमजानी रहिस जेहर परमेसवर कर वचन ला बतात रहिस लेकिन ईसू हर सबले बड़खा अगमजानी हवे ओ परमेसवर हवे, ओकरेले जे जाएत ओहर करिस अऊ कहिस ओहर परमेसवर कर काम अऊ वचन हवे। ओकरेले ईसू ला परमेसवर कर वचन कहथे।

परमेसवर हर राजा दाऊद कर संगे जबान करे रहिस कि ओकर घराना में ले एगोठ परमेसवर कर लोग मन कर ऊपरे हमेशा बर राएज करही। ईसू हर परमेसवर कर बेटा अऊ मसीहा होए कर चलते, ओही हर दाऊद कर असली बेटा हवे, जेहर हमेशा बर राएज कर सकत हवे।

दाऊद इसराईल कर राजा रहिस, लेकिन ईसू मसीह समूचा संसार कर राजा हवे, ओ फेर आही अऊ अपन राएज में नियाव अऊ सान्ति कर संगे हमेशा बर राएज करही।

A Bible story from: Genesis 1-3, 6, 14, 22; Exodus 12, 20; 2 Samuel 7; Hebrew 3:1-6, 4:14-5:10, 7:1-8:13, 9:11-10:18; Revelation 21

49. परमेसवर कर नावा कानून

एगोठ सवरग दूत हर मरियम नाव कर कुंवारी जग कहे रहिस कि ओहर परमेसवर कर बेटा ला जनम देही जे घरी ओहर कुवारी रहिस, ओहर एगोठ बेटा ला जनम देहीस अऊ ओकर नाव ईसू राखिस। ओकरे ले ईसू परमेसवर अऊ आदमी दुनों हवे।

ईसू हर ढ़ेरे बगरा चमतकार करिस तेकर ले ए साबित होथे कि ओ परमेसवर हवे। ओ पानी में रेगिस, आँधी ला सान्त करिस ढ़ेरे रोगिया मन ला चंगा करिस। भुत प्रेत मन ला भगाईस मरल मन ला जियाईस, पांच ठे रोटी अऊ दुईठे मछरी ला ५००० ले बगरा लोग मन ला खवाईस।

ईसू एगोठ बड़खा गुरूजी रहिस। ओ अधिकार से गोठियात रहिस। काबर कि ओ परमेसवर कर बेटा हवे। ओ सिखाईस कि हमके आने-आने मन ठे ओहीच कस मया करेक चाही जेकस हमरे अपनआप ले करथन।

ओहर ए जाएत भी सिखाईस की तुमन के काही अऊ जाएत ले बढके परमेसवर जग मया करेक चाही। धन दौलत ले भी बढके ।

ईसू हर कहिस कि परमेसवर कर राएज ए दुनिया कर आने सबेच बात ले ढ़ेरेच बढीया हवे। कोनो आदमी बर जम ले जरूरी बात एहर हवे कि ओ परमेसवर कर राएज कर भीतरी हो। परमेसवर कर राएज में जाएबर तुमन के पांप ले बाँचे बर जरूरी हवे।

ईसू हर सिखाईस कि जे लोग मन ईसू कर अंगिकार करही त ओमन बाँऐच जाहीं लेकिन कोनो अऊ लोग मन नहीं। ओहर कहिस कि चटिक लोग मन बढ़ीया भुईया कस हवे। जेमन ईसू कर सुघर संदेस ला मानही ओमन बांएच जाही। कोनो अऊ लोग मन डगर कर बजर भुईया कस हवे, जिहा परमेसवर कर वचन कर बिहन हर काँही फल नई दे सके। जे लोग मन ईसू कर संदेस मे बिसवास नई करही ओमन ओकर राएज में जाए नई पाही।

ईसू हर सिखाईस कि परमेसवर पांपी मन जग ढ़ेरे मया करथे। ओहर ओमन कर पाप ला क्षमा करके ओमन के अपन बेटा बनाए बर चाहत हवे।

ईसू हर कहिस कि परमेसवर हर पांप ले घिरना करथे। ज़ेघरी आदम हव्वा मन पांप करिन, अऊ ओमन कर पांप हर ओमन कर जम लईका मन में चएल आईस, ओकर चलते, ए दुनिया में जम लोग मन पांप करथे। अऊ पाप कर चलते परमेसवर ले अलगे होए गईन हवे। एहीकस हर आदमी मन परमेसवर कर वैरी बएन गईन।

लेकिन परमेसवर हर ए दुनिया कर हर एक लोग मन ला एतेक मया करीस कि ओहर अपन एकलौता बेटा ला दे देहीस, ताकि जेमन ईसू कर ऊपरे बिसवास करही ओमन अपन पांप कर दण्ड नई पाहि। ओकर ले परमेसवर कर संगे सबेच घरी जियत रही।

तुमन कर पांप कर चलते, तुमन भी दोसी हवा। अऊ मरे कर लाईक हवा, परमेसवर ला तुमन कर संगे गुस्सा करे बर रहिस, लेकिन ओहर अपन गुस्सा ला तुमन कर बदले ईसू कर ऊपरे डाएल देहीस ज़े घरी ईसू क्रुस में मरीस, ओहर तुमन कर पाप कर दण्ड ला उठाए लेहीस।

ईसू हर कभो पांप नई करे रहिस लेकिन ओहर दण्डित होए बर अऊ सिद्ध बलिदान कर रूप में मरे बर तियार होए गईस, ताकि तुमन कर अऊ दुनिया कर जम लोग मन कर पांप ला उठाये के ले जाये। ईसू हर अपनआप ला बलिदान में चढाईस, एकरले परमेसवर हर तुमन कर काँहीच पाप ला क्षमा कएर देही ढ़ेरे बड़खा पांप ला भी।

तुमन कर सुघर बुता हर तुमन के बचाये नई सकत हवे। परमेसवर कर संग रिसता बनाए बर तुमन काही नई कर सकत हा। बस ईसू ही तुमन कर पांप ला धोये सकथे। तुमन ला बिसवास करेक परही की ईसू हर परमेसवर कर बेटा हवे, ओहर तुमन कर जगहा में तुमन बर क्रुस में मएर गईस अऊ परमेसवर हर ओके फेर से जियाईस हवे।

परमेसवर हर हरेक झन ला बचाही जेमन ईसू कर ऊपरे बिसवास करही अऊ ओके प्रभु कहीं ओही मन ला ईसू मसीह हर बंचाही, लेकिन जेमन ईसू कर ऊपरे बिसवास नई करहीं ओला परमेसवर हर नई बचाही, तुमन चाहे धनी हवा चाहे गरीब हवा, संवाघ चाहे संवाघिन, जवान चाहे बुढवा, चाहे तुमन कहों रहथा। एकर से कोई फरक नई परही। परमेसवर हर तुमन जग मया करथे अऊ चाहथे कि तुमन ईसू कर ऊपरे बिसवास करा ताकि ओकर तुमन संग एक ठांवे कर रिसता होए।

ईसू तुमन ला नेवता देथे कि तुमन ओकर ऊपरे बिसवास करा अऊ बपतिसमा लेवा। का तुमन बिसवास करथा कि ईसू मसीहा हवे, परमेसवर कर एकलोता बेटा? का तुमन बिसवास करथा कि तुमन एगोट पांपी लोग हवा अऊ परमेसवर कर दण्ड कर लाईक हवा? का तुमन बिसवास करथा कि ईसू क्रुस कर ऊपरे तुमन कर पांप कर चलते मएर गईस।

अगर तुमन ईसू कर ऊपरे बिसवास करथा की जेकस ओहर तुमन बर करिस, त तुमन मसीही हवा। परमेसवर हर तुमन ला सैतानकर अंधकार कर राएज ले निकालिस हवे अऊ परमेसवर कर ज्योति कर राएज में राखिस हवे। परमेसवर हर तुमन कर जुनहा पांपमय डगर ला अऊ बात ला हटाये देहीस हवे अऊ तुमन के नावा धरमी डगर अऊ बात ला देहीस हवे।

अगर तुमन मसीह हवा, त ईसू कर करल बुता कर चलते परमेसवर हर तुमन कर पांप ला क्षमा कर देहीस हवे। अब परमेसवर तुमन ला बैरी कर रूप में नहीं लेकिन अपन ठांवे कर संगता कस देखत हवे।

अगर तुमन परमेसवर कर संगता हवा अऊ प्रभु ईसू कर भगत हवा त तुमन ईसू कर आगियां कर अनुसार चालिहा। तेकर ले तुमन मसीह हवा, तबोले पाप कर परीक्षा तुमन कर जीवन में आये सकत हवे। लेकीन तुमन अपन पांप ला मानिहा अऊ परमेसवर कर ऊपर बिसवास करिहा त ओहर तुमन कर पांप ला क्षमा करही। पांप से लड़े बर परमेसवर हर तुमन ला बल देही।

परमेसवर हर तुमन जग कहथे कि तुमन परथना [दुआ विनती ] करा, वचन ला सिखा, दूसर मसीही मन कर संगे परमेसवर कर आराधना करा अऊ दूसर लोग मन जग बतावा कि ईसू हर तुमन बरीक का करीस हवे। ए जम बात ले परमेसवर कर संग तुमन कर रिसता हर बढत जाहीं।

A Bible story from: Romans 3:21-26, 5:1-11; John 3:16; Mark 16:16; Colossians 1:13-14; 2 Corinthians 5:17-21; 1 John 1:5-10

50. ईसू हर फेर आथे

२००० हजार बछर ले दुनिया में ढ़ेरे लोग मन ईसू मसीह कर सुघर संदेश ला सुनावत हवे। कलीसिया बड़ते जात हवे। ईसू हर वचन देहीस हवे कि दुनिया कर आखरी में ओहर आही। ओहर आएज तक नई आईस हवे। लेकिन ओहर अपन जबान ला पूरा करही।

ज़े घरी हमरे ईसू कर आगमन ला अगुरत हवन, परमेसवर हर चाहत हवे कि हमरे अईसने जीवन जियत रही कि जेहर पवितर हवे ओकर आदर करिहा। ओ ए भी चाहत हवे कि हमन ओकर राएज कर बारे में दूसर झन ला बताई। ज़े घरी ईसू ए भुईंया में जीयत रहिस, ओहर कहिस मोर चेला मन परमेसवर कर राएज कर सुघर संदेस ला दुनिया कर जम लोग मन जग परचार करहीं, अऊ तेकर अंत आए जाही।

ढेरे जाएत कर लोग मन आएज भी ईसू कर बारे में नई सुनिन हवे। सवरग में फेर जायेकर ले आगु, ईसू हर मसीही मन ला कहे रहीस कि ओमन सुघर संदेस कर परचार ओ जम लोग मन जग करा जेमन अब तक सुघर संदेस ला नई सुनिन हवें। ईसू हर कहिस:- “जा अऊ जम जाति मन ला चेला बनावा” अऊ खेत अब कटनी बर पाएक चुकीस हवे।

ईसू हर ऐहु कस भी कहिस, “कोनो दास अपन स्वामी ले बढ़ के नई हवे। जेकस ए संसार कर अगुवा मन मोके सताईन, ओहिकस ओमन तुमन के भी सताहीं अऊ मोर चलते माएर मरुवाहीं। एकरले ए दुनिया में तुमन दुःख सइहा, लेकिन भरोसा करा काबर कि मैं सैतानला हरुवाए देहे हवों, जेहर ए दनिया में राएज करत रहिस। अगर आखरी तक तुमन मोर उपर बिसवास करिहा तो परमेसवर हर तुमन के बचाए लेही”।

ईसू हर अपन चेला मन के एगोट कहनी बताईस ए समझाए बर कि आखरी में लोग मन कर संगे का हो ही। ओहर कहिस, “एगोट आदमी रहिस जेहर अपन खेत में बढ़िहाँ बिहन ला बुने रहिस। ज़ेघरी ओ सूतत रहिस ओकर बैरी मन आइन अऊ जंगली बिहन ला गेहूं कर मझार में बुईन राखिस, अऊ चएल देहीस।

ज़े घरी बिहन हर जांमे लागीस, ओ आदमी कर सेवक मन कहिन, स्वामी, तैं ए खेत में बढ़िहाँ बिहन ला जगाऐ रहे त एमे अब जंगली गांछी हर कईसे जाएम गईस? स्वामी हर कहिस कोनो बैरी हर बुनिस हो ही।

“दास मन स्वामी जग कहिन, का हमरे ए जंगली गांछी ला निकाऐल देई? स्वामी हर कहिस एकस करीहा त गेहूं कर बढ़िहाँ गांछी हर भी निकेल जाही। कटनी तक अगुरब अऊ फेर जंगली गांछी ला सकेल के जरुवाए देअब अऊ गेहूं ला भण्डार में लानब।

चेला मन ला ए कहनी कर अर्थ समझ में नई आईस, ओकरेले ओमन ईसू जग कहिन कि ओमन के समझाए। ईसू हर कहिस, “ओ आदमी जेहर बढ़िहाँ बिहन ला जगाए रहिस ओहर मसीहा हवे। खेत कर मतलब संसार हवे। बढ़िहाँ बिहन परमेसवर कर राएज कर लोग हवें”।

जंगली गांछी ओ लोग मन हवे जेमन दुष्ट सैतानकर हवे। ओ बैरी जेहर जंगली बिहन ला बुनथे ओ सैतानहवे। कटनी कर मतलब हवे दुनिया कर अंत अऊ कटनी करे दार मन परमेसवर कर सवरगदूत हवे।

“ज़े घरी दुनिया कर अंत होही, सवरग दूत मन ओ जम लोग मन ला जुटाही जेमन सैतान कर हवे लोग हवे अऊ ओमन ला बरत आगी में ढकेल देहि, जिहां ओमन रोवत रहीं अऊ ढ़ेरे दुखान में अपन दांत ला चाबत रहीं। धर्मी जन अपन दाऊ परमेसवर कर राएज में बेर कस चमकत रही”।

ईसू हर ऐहू कस कहीस कि दुनिया कर अंत ले आगू ओ ए भुइया में फेर आही। ओहीच कस आही जेकस ओ गए रहिस मतलब, ओ देह कर संगे अऊ आकाश कर बदरी में आही। जे घरी मसीह फेर आही जम मसीह जेमन मएर चुकिन हवे ओमन जी जाही अऊ आकाश में ओकर संगे उठाए लेहल जाही।

तब ओ जम मसीही जेमन जियत हवें ओमन आकाश में उठाए ले जाहीं अऊ ओमन ईसू मसीहा कर संगे मिल जाही जेमन मुरदा में ले जियाल गईन हवें। ओमन जम झन ऊहाँ ईसू कर संगे रही। ओकर बाद, ईसू अपन लोग मन कर संगे भरपूर सान्ती कर संगे ईसू हमर जग सबेच घरी रही।

ईसू हर जबान करिस हवे कि ओ सबेच झन ला मुकुट देही जेमन ओकर ऊपरे बिसवास करथे। ओ ओमन कर संगे रही अऊ परमेसवर कर संगे भरपूर सान्ती में हमेशा बर राएज करही।

लेकिन परमेसवर ओ जम झन मन कर नियाव करही जेमन ईसू कर ऊपरे बिसवास नई करे। ओहर ओमन के नरक में ढकेल देही, जिहां ओमन हमेशा बर रोवत रही अऊ दांत चाबत रही। उहा कर आगी हर कभो नई बिताही। ओमन के जम घरी जरत रही अऊ किरुआ मन ओमन ला खात रहीं।

लेकिन परमेसवर ओ जम झन मन कर नियाव करही जेमन ईसू कर ऊपरे बिसवास नई करे। ओहर ओमन के नरक में ढकेल देही, जिहां ओमन हमेशा बर रोवत रही अऊ दांत चाबत रही। उहा कर आगी हर कभो नई बिताही। ओमन के जम घरी जरत रही अऊ किरुआ मन ओमन ला खात रहीं।

आदम अऊ हव्वा मन जे घरी परमेसवर कर आगियां कर पालन नई करिन अऊ ए संसार में पांप लानीन, परमेसवर हर संसार ला सराएप देहीस अऊ ओके नाश करे कर उपाए करीस। लेकिन परमेसवर एगोठ नावा सवरग अऊ नावा भुईया ला बनाही जेहर ढेरेच सुघर होही।

ईसू अपन लोग मन कर संगे ओ नावा भुईया में रही अऊ ओ सब संसार में हमेशा बर राएज करही। ओहर सबेच झन कर आंसू ला पोंछ देही, अऊ फेर कभो पीरा, दुःख, वेदना, रोना, बुराई, या मरना, नई होही। ईसू अपन राएज में सान्ती अऊ नियाव कर संगे राएज करही, अऊ ओहर अपन लोग मन कर संगे रही।

A Bible story from: Matthew 24:14; 28:18; John 15:20, 16:33; Revelation 2:10; Matthew 13:24-30, 36-42; 1 Thessalonians 4:13-5:11; James 1:12; Matthew 22:13; Revelation 20:10, 21:1-22:21