Efeso

Chapter 1

¹ Siak ni Pablo, nga apostol ni Kristo Hesus babaen iti pagayatan ti Dios, kadagiti naisina a para ti Dios idiay Efeso nga agtaltalek ken ni Kristo Hesus-- ² Parabur kuma ken kapia iti umadda kadakayo nga aggapu iti Dios nga Ama tayo ken ni Apo Hesu-Kristo. ³ Ti Dios nga Ama ti Apo tayo nga Hesu-Kristo ti maidayaw, nga isu iti nangbendisyon kadatayo iti tunggal naispirituan a parabur idiay nainlangitan nga lugar ken ni Kristo. ⁴ Ta pinilina tayo ti Dios nga isu a namati kenni Kristo sakbay iti pannakaparsua iti lubong. Pinilina tayo tapno agbalin tayo nga nasantuan ken nadalus iti sangwananna. ⁵ Babaen iti ayat ti Dios inkeddengna tayon a kas bukodna nga annakna babbaen kenni Hesu-Kristo. Inaramidna daytoy gapu ta naay-ayo isuna nga aramiden ti pagayatanna. ⁶ Nalpas amin dagitoy tapno mapadayawan ti Dios iti paraburna nga isu iti nabaknang nga insagotna kadatayo babaen iti dungdungwenna nga anak. ⁷ Ta gapu ti dungdungwenna nga anak, ket nasubbot tayo babaen ti darana, iti pannakapakawan ti basbasol babaen iti kinabaknang ti paraburna. ⁸ Daytoy nga parabur ket aglaplapusanan nga nangted kadatayo dagiti amin nga kinasirib ken pannakaawat. ⁹ Impakaammo ti Dios kadatayo iti naaramid nga nailimed a kinapudno iti panggep maipapan iti pagayatanna nga impakitanna babaen ken ni Cristo: ¹⁰ nga nu ti tiempon ket maipatungpal para iti pannakakumpleto ti panggepna, pagkaykaysaen nanto amin a banag sadi langit ken ditoy daga nga idaulwan ni Cristo. ¹¹ Kasakbayan iti amin pinilina tayon ni Cristo, babaen iti plinanona nga nangaramid amin a banag babaen iti pinanggena, ¹² tapnun agbiagtayo para iti pannakaidaydayawan ti dayagna, nga datayo iti umuna nga nagtalek kenni Cristo. ¹³ Babaen ken ni Cristo nangngeganyo met laeng iti pudno a sao, ti naimbag a damag iti pannakaisalakanyo babaen ken ni Cristo, nga isu met laeng iti pinatiyo ken minarkaanna tayo babaen iti naikari nga espirito santo. ¹⁴ Iti Espirito ket isu iti mangpatalged a tawidentayo aginggana nga iti kinabaknang ket matagikua para iti pakaidaydayawan ti dayagna. ¹⁵ Gapu iti daytoy, manipud iti tiempo nga nangngegak maipanggep iti pammatiyo kenni Apo Hesus ken maipangngep ti ayat yo kadagiti amin a nasantuan nga naisina kenkuana, ¹⁶ Saanak nga nagsardeng nga agyamyaman iti Dios para kadakayo ken dakdakamaten kadagiti karkararag ko. ¹⁷ Agkararagak nga ti Dios iti Apo Jesu-Kristo tayo, ti nadayag nga Ama, maited kuma kadakayo iti espirito ti kinasirib ken panangilatak iti pannakaammo na, ¹⁸ nga iti mata ti pusoyo ket malawlawagan kuma para kadakayo tapnu maamwanyo nu anya iti talged ti ayab tayo, anya dagiti kinabaknang iti dayag a tawiden na kadagiti nailasin a para kenkuana-- ¹⁹ ken nu anya iti aglaplapusanan a kinaimbag ti pannakablin na kadatayo nga namati babaen iti trabaho ti pigsa iti pannakabalin na. ²⁰ Daytoy ti pannakabalin nga nagtrabaho kenni Cristo idi pinagungar ti Dios manipud iti patay ket pinatugaw na a kas makannawan nga imana idiay nainlangitan nga lugar. ²¹ Nangatngato kadagiti amin nga adda turay na, pannakabalin, pagturayan ken tunggal nagan nga nanaganan saan laeng nga daytoy a panawen , ngem iti umay a panawen. ²² Inkabil ti Dios amin nga banag babaen iti sakaanan ni Cristo ken naited kenkuana ti panangidaulo iti amin nga banag iti Iglesia. ²³ Nga isu ti bagi na, iti naan-anay nga isu iti mangpunno kadagiti amin a banag, ti amin nga wagas.

Chapter 2

¹ Adda nga natay kayo idi gapu iti kinasukir ken kadagiti basbasolyo ² nga isu ti naminsan a pinagbia-ganyo, babaen iti wagas ditoy lubong, babaen kadagiti turay iti panakabalin ti tangatang, iti espiritu nga agtrabtrabaho kadagiti anannak ti kinasukir. ³ Maysa tayo met idi nga kadwa dagiti saan nga namati ken agtigtignay babaen iti dakes a tarigagay iti lasag tayo, aramiden tayo ti pagayatan iti lasag ken iti panunut, ken amin tayo iti gagangay nga kasasaad ket annak ti pungtot a kas kadagiti sabsabali. ⁴ Ngem gapu ta nabaknang ti Dios iti asi gapu ti dakkel nga ayatna nga isu ti nangayat kadatayo, ⁵ kabayatan nga natay tayo iti basol, inikkan natayo ti baro nga biag a mairaman ken Kristo- naisalakankayo babaen iti parabur- ⁶ ken napagungar tayo ken makipagtugaw tayo iti nainlangitan nga lugar a kadwatayo ni Kristo Hesus. ⁷ Inaramid na daytoy tapno iti masakbayan maipakitana ti nabaknang nga paraburna babaen iti kaasina keni Kristo Hesus. ⁸ Gapu iti parabur ket naisalakan kayo babaen ti pammati. Ken daytoy ket saan nga naggapu kadatayo, ngem sagut nga naggapu iti Dios, ⁹ saan nga manipud iti aramid, tapno saan nga agpannakel ti siasinoman. ¹⁰ Gapu ta datayo dagiti aramid ti Dios, naparsua ken ni Kristo-Hesus tapno agaramid ti kinaimbag nga nabayagen nga pinanggep ti Dios a pagnaen tayo. ^{11 12} Ngarud laglagipenyo nga iti naminsan ket Hentil kayo iti lasag, naawagan kayo nga "dagiti saan a nakugit nga pagano" babaen iti maawagan nga panagkugit ti lasag babaen iti ima dagiti tattao. Gapu ta iti dayta nga panawen dakayo ket naisina ken ni Kristo, ken naiyadayo manipud kadagiti tattao ti Israel ken saanyo nga ammo ti tulag iti sapata ti Dios, awan namnamayo maipapan ti masakbayan, ken awan ti Dios ditoy lubong. ¹³ Ngem ita, ken ni Kristo-Hesus dakayo nga dati nga adayo iti Dios ket naiyasideg iti Dios babaen ti darana ni Kristo. ¹⁴ Gapu ta isu ti kapia tayo gapu ta inaramidna dagiti Judio ken dagiti Hentil nga maymaysa nga tattao. Babbaen iti bagina ket dinadaelna iti pader ti gurang-gura nga namagsina kadatayo iti tunggal maysa. ¹⁵ Dayta ket, winaswasna ti linteg dagiti bibilin ken dagiti annuroten tapno agaramid isuna ti baro a tattao nga nagtaud kadagiti dua nga tattao, kas nangkapia. ¹⁶ Inaramidna daytoy tapno pagmaymaysaenna dagiti agsinnumbangir nga tattao iti maymaysa a bagi ti Dios babaen iti krus, pinukawna ti gurang-gura iti nagbaetanda. ¹⁷ Immay ni Jesus ken inwaragawagna ti ebanghelyo ken iti kapiana a para kadagiti adda iti adayo ken kapia kadagiti adda iti asideg. ¹⁸ Ta babaen ken ni Jesus mabalin tayo nga umasideg iti maymaysa nga Espiritu iti Ama. ¹⁹ Dakayo nga Hentil saan kayon nga ganggannaet ken sangsangaili, nu diketdi agkakailyan kayon kadagiti naisina para iti Dios, dagiti kamkameng ti pamilya iti Dios. ²⁰ Dagitoy ket nabangon iti rabaw ti pondasiyon dagiti apostoles ken dagitipropeta, ket ni Kristo Hesus a bukodna ti pasuli. ²¹ Babaen iti pannakabalin ni Hesus ti intero nga patakder ti pamilyana ket namagkakamang ken immado a kas templo a naisina para iti Apo, ²² kenkuana ada met nga nabangon kayo a pagtaengan ti Espiritu ti Dios.

Chapter 3

¹ Isut gapu na nga siak ni pablo, adepen ni Kristo Hesus para kadagit Hentil ² No nangnangngegyon ti sagot ti Dios nga inted na kanyak para kadakayo, ³ maipanggep kadagiti naidulin nga kinapudno nga naipaltiing kanyak maipapan kadagiti susurat kong kadakayo iti naglabas. ⁴ No basaenyo daytoy ket maawatanyo dagiti kapanunutak iti daytoy a palimed nga kinapudno maipapan keni Kristo, ⁵ naidulin iti sabali nga henerasyon naipablaak ita kadagiti apostolna ken kadagiti propetana nga sasantuan iti ispirito. ⁶ gapu ta dagiti hentil ket kadwa tayo met nga agtagikwa ken kamkameng damet iti bagi ni Kristo Hesus babaen iti ibanghelyo. ⁷ Gapu iti panaggunay ti pannakabalin ti Dios babaen iti sagot na nga parabur nagbalinak nga adepenna. ⁸ Naited kanyak datoy nga sagot, wen siak ti kakapsutan kadagiti inlasin iti Dios, tapno ipaduyakyakko ti ibanghelyo nga saan nga matukod nga kinadayag ni Kristo ⁹ ken tapno malawlawagan ti kaadwan maipanggep iti planon ti Dios, nga isu ket namarswa iti isuamin nga banbanag. ¹⁰ kas resulta, maipakaamo kadagiti agtaktakem ken addaan turay iti nailangitan nga banbanag para iti iglesia ti saan nga matukod nga kinasirib ti Dios, ¹¹ babaen metlaeng iti naiatang ken Kristo Hesus nga Apo tayo ti planona nga saan nga agbabaliw. ¹² Gapu ken Kristo naaddaan tayo iti tured ken dalan nga addaan talged gapu iti panamati tayo kenkwana. ¹³ Ngarud dawatek kadakayo nga saan kayo nga maupay kadagiti rigrigat ko para metlaeng kadakayo, nga isu ket pakaidayawanyo. ¹⁴ Iti daytoy nga banag agparintumengak iti Ama, ¹⁵ nga ti tunggal pakaigapwan dagiti pamilya idgay langit ken itoy daga nga nainaganan ken naiparswa, ¹⁶ tapno patalgedanna kayo, babaen ti kinabaknang ti dayagna, ta ti ispirito nga adda iti mangpapigsa kadakayo babaen ti pannakabalin iti ispirito nga adda kadakayo; ¹⁷ babaen iti pammatiyo ni Kristo iti agtaeng kadagiti pusoyo, ken masapul nga ayat ti agtalimeng kadakayo, ¹⁸ tapnu iti kasta maawatanyo metlaeng dagiti inlasin iti Dios, no kasano kalawa ken kaatiddog ken kangato ken kauneg ti panagayat ni Kristo, ¹⁹ tapnu maammuanyo ti aglaplapusanan nga ayat ni Kristo, tapno mapnek kayo iti kina Dios iti dios. ²⁰ kenkwana a makaaramid kadagiti amin a banag, nasursurok ngem kadagiti kiddawem wenno panunuten tayo, babaen iti pannakabalina nga agtrabtrabaho kadatayo, ²¹ kenkwana iti dayag iti iglesia ken ni Kristo Hesus iti amin nga henerasyon nga awan patinggana Amen.

Chapter 4

¹ Ngarud, kas maysa a balud para iti Apo, allukuyenkayo nga agbiag a maiyannurot iti nangayaban ti Dios kadakayo, ² iti kinapakumbaba, kinaemma, ken kinaanus nga mang-ayat iti tunggal maysa. ³ Aramidenyo amin a kabaelanyo nga mangsaluad iti panagmaymaysayo iti Espiritu. ⁴ Adda maysa a bagi, ken maysa nga Espiritu, kas kaadda iti namnama iti nakaayabanyo. ⁵ Ken adda maysa nga Apo, maysa a pammati, ken maysa a pannakabunyag, ⁶ maysa nga Dios ken Ama ti amin, isu a mangiturturay ti amin, ken babaen ti amin. ⁷ Tunggal maysa kadatayo ket naikkan iti sagut babaen iti rukod ti sagut ni Kristo. ⁸ Kas kinuna iti Nasantoan a Surat, idi immuli iti langit ket inkuyogna dagiti naibalud. Ket inikkanna iti sagut dagiti tattao. ⁹ (Anya ti kayat a sawen daytoy nga pagsasao, "Immuli isuna"? Kayatna a sawen nga immulog isuna iti kaunggan a paset iti daga. ¹⁰ Nu siasino ti immulog ket isu metlaeng ti immuli idiay langit tapno punuenna amin a banbanag. ¹¹ Nangisagut ni Kristo iti kakastoy: sagut nga agbalin nga apostol, ¹² dagiti dadduma ket propeta, mangaskasaba, papastor ken dagiti manursuro, tapno maisagana dagiti namati iti napudno a panagserbi, ket tapno bumileg iti bagi ni Kristo, ¹³ agingga agsangsangkamaysa tayto iti pammati ken pannakaammo iti Anak ti Dios, ket dumakkel ken pudno a mataengan iti pammati tayo ken Kristo. ¹⁴ Ket saantayon ton nga kas kadagiti ubbing nga nalaka nga itaytayab ken iyang-angin dagiti sursuro dagiti manangalilaw a panursuro dagiti tattao. ¹⁵ Ngem ketdi, ibagatayo iti kinapudno nga nabuyogan iti ayat ken dumakkel tayo iti wagas ni Kristo nga isu ti ulo. ¹⁶ Isu, nga nagkaykaysaan ken nagsusuupan dagiti amin a namati. Isutgapuna nga nu agtitinulong dagiti amin a paset ti bagi dumakkel ti sibubukel a bagi babaen iti ayat. ¹⁷ Ngarud, ibagak daytoy kadakayo, iti nagan ti Apo, ballaagankayo a saankayon nga agbiag a kas kadagiti Hentil a kasla awan serbi ti panunotda. ¹⁸ Nasipnget ti panunotda ket saanda nga mapadasan ti agbiag iti Dios, ken natangken ti pusoda. ¹⁹ Saandan nga ibain ti bagbagida nga mangar-aramid kadagiti nakarimrimon nga aramid ken amin nga kinaagom. ²⁰ Ngem saan nga kastoy ti naamwanyo maipanggep kenni Kristo. ²¹ Nu nangegyo ken naisurwan kayon iti maipanggep kenkuana, ket dayoty ti pudno nga maipanggep kenni Hesus. ²² Masapol nga ibellengyon ti daan a kinataoyo nga maiyannurot iti daan nga aramidyo gapo iti manangalilaw a tarigagay, ²³ tapno mapabaro ti ispiritu iti panunotyo, ²⁴ ken tapno agbalinkayo nga baro a tao nga inaramid ti Dios iti kinalinteg ken kinasanto ti kinapudno. ²⁵ Ngarud, ibellengyon ti kinaulbod. " Agsaokayo iti pudno iti kaarubayo,"gaputa paset kayon iti tunggal maysa. ²⁶ "Agungetkayo ngem saankayo nga agbasol." Saanyo nga itulok a lumnek diay init nga adda pay ti ungetyo, ²⁷ saanyo nga ikkan iti gundaway ti diablo. ²⁸ Siasinuman nga agtatakaw saan koman nga agtakaw, ngem ketdi, agtrabaho ket usarenna ti imana tapno adda maibingayna kadagiti agkasapulan. ²⁹ Awan koman ti nasasakit nga ibalikas ti ngiwatyo, ngem ketdi, dagiti sao a makaliwliwa iti tao a makasapol, ken tapno maparaburan ti siasinuman nga agdengdengeg. ³⁰ Saanyo nga pagladingiten ti Santo Espiritu ti Dios, nga isu ti nangselyo kadakayo iti aldaw ti pannakaisalakan. ³¹ Itulokyo nga amin a saem ken gura, ken pungtot, pananglais, ket maikkat kadakayo, kastamet iti kinadakes. ³² Agbalinkayo a nasayaat, naalumanay, ken manangpakawan iti tunggal maysa, a kas iti Dios nga sidadaan a nangpakawan kadakayo babaen ken Kristo.

Chapter 5

¹ Ngarud tuladen tayo ti Dios a kas ayatenna nga annak, ² ken agiinnayat tayo a kas ti panagayat ni Kristo kadatayo ket intedna ti bagina para kadatayo a kas sagot ken daton, a makaay-ayo nga ayamuom, iti Dios. ³ Ti kinaderrep wenno anyaman nga kinarugit wenno ti kinaagom ket saan koma a maisingasing kadakayo, nga isu ti saan nga nasayaat para kadagiti santo a para ti Dios - ⁴ wenno ti kinabastos, ti awan kais-iskan nga sarsarita wenno ti nalabes nga angaw, a saan nga maiyannatop ngem ti ketdi panagyaman. ⁵ Ta ammotayo nga saan nga agtawid ti pagarian ti Dios ti kinaderrep, ti kinarugit, wenno naagom nga tao, nga isu ti panagrukbab kadagiti didiosen. ⁶ Madi kayo agpaal-lilaw iti ippes nga sasao. Gapu kadagitoy a banbanag ket agdissuor ti pungtot iti Dios kadagiti annak ti kinasukir. ⁷ Ngarud saan kayo nga makikadwa iti dakes nga aramidda. ⁸ Dakayo ket dati nga adda iti sipnget ngem ita adda kayun ti lawag ti Dios. Ngarud agbiag kayo a kas annak ti lawag - ⁹ gapu ta ti bunga ti lawag ket kinaimbag, kinalinteg ken kinapudno, ¹⁰ - nga mangipakita no anya ti makaay-ayo iti Apo. ¹¹ Saan kayo nga makianamong kadagitoy nga aramid ti sipnget, ngem ibutaktakyo ida, ¹² gapu ta dagitoy nga nalimed nga aramid ket nakababain uray nu iladawan laeng. ¹³ Amin nga banag ket makita babaen ti lawag, ¹⁴ gapu ta lawaganna ti amin dagitoy. Isu nga naisurat, "Agriingkayo, dakayo a nakaturog ken agungar kayo manipud iti patay ket ni Kristo ti manglawag kadakayo." ¹⁵ Ngarud, annadanyo ti panagbiagyo, saan a nakuneng ngem agbalin kayo a nasisirib a tattao. ¹⁶ Salimetmetan iti tiempo gapu ta dagiti aldaw ket dakesen. ¹⁷ Saan tayo nga agkunkunneng ngem ketdi awaten tayo nu anya ti pagayatan ti Dios. ¹⁸ Ken saan kayo nga agbarbartek iti arak nga agturong iti pakapardian ngem mapno kayo iti Ispiritu Santo, ¹⁹ makitungtung kayo iti tunggal maysa babaen kadagiti salmo ken imno ken naispirituan a kankanta, ken naimpuswan a panagdayaw iti Apo, ²⁰ kanayon nga agyaman iti Dios Ama iti amin nga banbanag iti nagan ni Jesu-kristo nga Apo tayo; ²¹ agpaituray kayo iti tunggal maysa a kas panagraem ken ni Kristo. ²² Dagiti asawa a babai ket masapul nga agpaituray iti asawada a lalaki a kas iti Apo. ²³ Gapu ta ti asawa a lalaki ket isu ti ulo ti asawana a babai, a kas ken ni Kristo nga ulo iti iglesia ken ti Manangisalakan ti bagi. ²⁴ Ngem kas iti iglesia nga agpaituray ken ni Kristo, masapul ngarud nga kasdiay met dagiti asawa a babai kadagiti asawada a lalaki iti amin nga banag. ²⁵ Dagiti asawa a lalaki, ayatenyo dagiti asawayo a babai a kas panagayat ni Kristo iti iglesia ket inpaayna ti bagina para kenkuana, ²⁶ tapno pasantuen isuna babaen ti panangdalus ti danum nga isu ti sao, ²⁷ tapno iyawatna iti bukodna a bagi ti Iglesia a nadayag, awan mantsana wenno biddutna wenno anyaman a kas kadagitoy ngem ketdi iglesia a nasantuan ken awan pagkuranganna. ²⁸ Iti kasta met lang a wagas, masapul nga ayaten dagiti asawa a lalaki dagiti asawada a kas bukodda a bagi. Ti siasinoman a mangayat iti bukodna nga asawa ayatenna ti bagina. ²⁹ Awan ti siasinoman a mangbusor iti bukodna a bagi ngem pakannena ketdi ken ayatenna a kas ti panagayat ni Kristo iti Iglesia, ³⁰ gapu ta paset tayo ti bagina. ³¹ "Gapu iti daytoy ket panawan ti lalaki dagiti amana ken inana ket makipagnaig iti asawana a babai; ken ti dua a lasag ket agbalinen a maymaysa." ³² Daytoy ket palimed a nadayag, ngem ti ibagbagak ket maipapan ken ni Krsito ken ti Iglesiana. ³³ Nupay kasta, masapul nga ayaten ti tunggal maysa kadakayo iti asawana a babai a kas iti bagina, ken masapul nga raemen ti asawa a babai iti asawana a lalaki.

Chapter 6

¹ Annak, agtulnog kayo kadagiti nagannakyo, ta daytoy ti rumbeng. ² "Dayawem da amam ken inam" (ta daytoy ti umuna nga bilin a napakuyugan iti kari), ³ tapno rumang-ay kayo, ken umatiddug iti panagbiagyo ditoy lubong." ⁴ Ken dakayo nagannak a lallaki, saanyo pagpungtuten dagiti annakyo, nu di ket padakkelenyo ida iti disiplina ken bilbilin ti Apo. ⁵ Dakayo a tagabo, agtulnog kayo kadagiti amoyo nga addaan respeto ken buteng, napudno kuma dagiti panagpuspusoyo, kas ken Kristo. ⁶ Saan laeng kuma a nagaget kayo intun addada a mangbuybuya kadakayo, ngem ketdi kas adipenni Kristo, natulnog kay kuma a mangaramid iti pagayatan ti Dios manipud kadagiti puspusuyo. ⁷ Naragsakkay kuma nga agserbi para iti Apo a saan laeng a para kadagiti tattao, ⁸ laglagipenyo nga nu anyaman iti aramiden ti maysa a tao a nasayaat, tagabo man wenno nawaya, awatennanto ti gun-guna nga aggapu iti Apo. ⁹ Ken dakayo am-amo, kasta met iti aramidenyo kadagiti tagabuyo, saanyo kuma a butbutngen ida, ta ammoyo nga agpadpada ti Apoyo sadi langit, ket awan idumdumana. ¹⁰ Kamaudiananna, naregta kay kuma babaen iti bileg ti Apo. ¹¹ Isuotyo amin a kabal ti Dios, tapno mabalinyo ti agtakder a mangsaranget kadagiti anyaman a panggep ti kabusor. ¹² Ta saan kayo a makigubgubat iti lasag ken dara, ngem kadagiti dakes nga espiritu nga adda iti tangatang ken iti kasipngetan. ¹³ Isuotyo ngarud amin a kabal ti Dios tapno kabaelanyo ti agtakder a mangsaranget iti daytoy a dakes nga panawen, ken aramidenyo amin a kabaelanyo tapno natibker kayo. ¹⁴ Ngarud agtakder kayo a sititibker, ibarekesyo ti sintoron iti kinapudno ken kabal iti kinalinteg, ¹⁵ ken ti gagar kas pannakasapatosyo a mangiwaragawag iti Naimbag a Damag ti kapya, ¹⁶ ken kanayun kuma nga adda kadakayo ti sarapa iti pammati, tapno mabalinanyo nga sanggaen amin dagiti umap-apoy a pana ti kabusor. ¹⁷ Ken alaenyo a pannakahelmet ti pannakaisalakan ken kampilan iti Espiritu, nga isu ti sao iti Dios, ¹⁸ babaen iti panagkiddaw ken panagkararag iti amin a tiempo iti Espiritu, naridam kuma dagiti espirituyo a kankanayun ken ikararagyo amin nga annak ti Dios. ¹⁹ Ken ikararagandak, tapno ti mensahe ket maited kanyak iti panawen nga ipakaammok iti palimed iti ebanghelyo, ²⁰ ta isu iti nakaayabak a kas pannakabagi ni Kristo, ta iti pannakaibaludko ket naturedak a mangipakaammo kadagiti rumbeng nga ikasabak. ²¹ Tapno maammuanyo ti kasasaadko ken amin nga ar-aramidek, ibaunko ni Tikico nga ay-ayatek a kabsat ken matalek nga agserserbi iti Apo, tapno isuna ti mangibaga amin kadakayo. ²² Daytoy ti makagapu nu apay nga ibaunko isuna kadakayo, tapno maammuanyo ti kasasaadmi ket maliwliwa ti pusoyo. ²³ Talna koma ti makikaaada kadayo kakabsat, ken ayat nga addaan iti pammati manipud iti Dios Ama kenni Apo Hesu Kristo. ²⁴ Parubor koma ti makikaadda kadagiti awan patinggana nga mangay-ayat kenni Apo Hesu Kristo.