17. Devlesko savezo e Davidosa

O Šaul sas prvo Izraelosko kraljo. Sas vučo thaj zgodno, baš sar o them kamlas. O Šaul sas lačho kraljo prve brša dok vladilas e Izraelosa. Ali askal postanisardas opako rom savo či čholas kan ko Del, pa o Del odabirisardas aver rome savo avela jek đes kraljo umesto leste.

O Del odabirisardas jećhe terne Izraelcone te avel kraljo posle o Šaul. Lesko alav sas David. O Davido sas čobano andar o gav Betlehem. Ande razne prilike, dok lelas sama pe pire dadesko stado, o David mudardas e lavos thaj e medvedo save napadnisardine e bakhren. O Davido sas ponizno thaj pravedno rom savo paćalas thaj sas verno e Devlešće.

O Davido postanisardas silno vojniko thaj vođa. Kana sas o David još terno čhavo, borisajlo protiv jek divo alavesa Golijat. O Golijat sas obučime vojniko, zuralo thaj skoro trin meterja vučo! Ali o Del pomožisardas e Davido te mudarel e Golijate thaj te spasisarel e Izraelconen. Nakon godova, o David pobedisaras ande but e bitke pe Izraelošće dušmaja, andar soste o them veličisarelas les.

O Šaul postanisardas ljubomorno andar godova kaj o them volilas e Davide. O Šaul but drom lijas te mudarel les, pa o David garavelas pes katar o Šaul. Jek đeš, o Šaul rodelas e Davido te mudarel les. O Šaul dijas ande isto špilja kaj o David garadolas katar o Šaul, ali o Šaul či dikhlas les. O Davido sas akana zurale paše pašo Šaul thaj šaj te mudarel les, ali či mudardasles. Umesto godova, o David čindas kotor katar e Šaulešći haljina te dokažil e Šaulešće kaj či kamel te mudareles te vo avel kraljo.

Po krajo o Šaul mulo ande bitka, a o David postanisardas kraljo po Izrael. Vo sas lačho kraljo, thaj o them volilas les. O Del blagoslovisardas e Davido thaj ćerdas les uspešno. O David borisajlo ande but e bitke thaj o Del pomožisardas les te pobedisarel e Izraelošće dušmajen. O David osvoisardas o Jeruzalem thaj ćerdas les pire glavno gavesa. Dok o David vladilas, o Izrael postanisardas moćno thaj barvalo.

O Davido kamlas te vazdel hramo kaj sa e Izrealcurja šaj te slavisaren e Devles thaj te prinosisaren lešće žrtve. Skoro štar šela (400) brš, o them slavilas e Devle thaj prinosisarenas lešće žrtve ando šatori e sastanonengo savo o Mojsije sagradisardas.

Ali o Del bičhaldas e proroko e Natane e Davidešće akale porukasa: "Pošto san tu rom ratniko, či sagradija akava hramo pale mande. Ćo čhavo sagradila les. Ali me but blagoslovisarava tut. Jek katar će potomkurja vladila sagod kraljo mungre themesko zauvek!" Jedino e Davidesko potomko savo šaj te vladisarel zauvek si o Mesija. O Mesija si e Devlesko odabraniko savo spasila akale theme katar lenđe bezeha.

Kana o David ašundas kala alava, odma zahvalisardas e Devlešće thaj slavisardasles kaj obećisardas e Davidešće kava baro čast thaj but e blagoslovjurja. O David či džanglas kana o Del ćerela sa gadava. Međutim sago vi kaj dogodisajlo, e Izraelcurja moraš te ažučaren još but e vrjama maj sigo nego so avela o Mesija, skoro milje (1.000) brš.

O David vladisardas pravedno thaj verno but e brša, thaj o Del blagoslovisardasles. Ali pašo krajo pe trajosko, gadno pogrešisardas protiv o Del.

Jek đes, dok sas sa e Davidošće vojnikurja dur katar o ćher thaj vodinas e bitke, vo dikhlas andar piro dvoro jećhe šukar romlja sar najol. Lako alav si Betšeba.

Umesto te boldel o šoro, o David bičhaldas varekas pale late te anenla leste. Sutas lasa thaj bičhaldas lat ćhere. Nedugo posle godova e Betšeba bičhaldas poruka e Davidešće thaj phendas lešće kaj si khamni.

E Betšebako rom, rom alavesa Urije, sas jek katar e Davidešće majlačhe vojnikurja. O David akhardas e Urija palpale katar e bitka thaj phendas lešće te džal thaj te avel pire romnjasa. Ali o Urije odbisardas te džal ćhere dok sas aver vojnikurja ande borba. Pa o David bičhaldas e Urijas palpale ande borba te čhol e generalos kote kaj si e dušmaja maj zurale te vo šaj avel mudardo.

Nakon so sas o Urije mudardo, o David lija romnjaće e Betšeba. Maj posle bijandas e Davidešće čhaves. O Del zurales holjajlo zbog godova kaj ćerdas o David, pa bičhaldas e prorokos e Natanes te phenel e Davidešće savo bilačhipe sas lesko bezah. O Davido pokaisajlo pale pire bezeha thaj o Del jartosardas lešće. Dži ko krajo pe trajosko o Davido džalas e Devlešće dromesa thaj paćalas lešće čak vi ande phare vrjame.

Ali sagod kazna pale lesko bezah, lesko čhavo mulo. Isto gajda pale Davidosko trajo sas borbe ande lešći famija, thaj e Davidošći snaga zurale slabolas. Vi ako o David nas verno e Devlešće, o Del sas ipak verno thaj ispunisarda pire obećanja. Maj posle e Davide thaj e Betšeba sas još jek čhavo, thaj akhardineles Salomon.

Bibliske paramiča andar e: 1. Samuil 10; 15-19; 24; 31; 2. Samuil 5; 7; 11-12